ပါတီစုံအထွေထွေရွေးကောက်ပွဲကို လာမယ့် ဒီဇင်ဘာလမှာ ကျင်းပမယ်
*****************
(ပြည်တွင်း) ဧပြီ ၉
၂၀၂၅ ခုနှစ် ပါတီစုံအထွေထွေရွေးကောက်ပွဲကို လာမယ့် ဒီဇင်ဘာလမှာ ကျင်းပဖို့ရှိနေတယ်လို့ ပြည်ထောင်စုရွေးကောက်ပွဲကော်မရှင်က ပြောဆိုထားပါတယ်။
နိုင်ငံရေးပါတီတစ်ရပ် ထူထောင်လိုသူအနည်းဆုံး ၁၅ ဦးက နိုင်ငံရေးပါတီများ မှတ်ပုံတင်ခြင်းဥပဒေ ပုဒ်မ ၃ ပုဒ်မခွဲ(က)နဲ့အညီ ပါတီတည်ထောင်ခွင့်များလျှောက်ထားလာမှုအပေါ် ပြည်ထောင်စုရွေးကောက်ပွဲကော်မရှင်က ဥကဒေနှင့်အညီ စိစစ်၍ မှတ်ပုံတင်ခွင့်ပြုလျက်ရှိနေတယ်လို့လည်း ရွေးကောက်ပွဲကော်မရှင်က ပြောပါတယ်။
၂၀၂၅ ခုနှစ် အထွေထွေရွေးကောက်ပွဲတွေကို ဒီဇင်ဘာလအတွင်းမှာ ကျင်းပဖို့ရှိတာကြောင့် နိုင်ငံရေးပါတီတည်ထောင်ခြင်းနဲ့ မှတ်ပုံတင်ခြင်း၊ ပါတီတွေပူးပေါင်းပြီး ပါတီတစ်ခုတည်းအဖြစ် တည်ထောင်ခြင်းလုပ်ငန်းတွေကို ပြည်ထောင်စုရွေးကောက်ပွဲကော်မရှင်အနေနဲ့ ရွေးကောက်ပွဲအမီ ဆောင်ရွက်နိုင်ဖို့နဲ့ နိုင်ငံရေးပါတီတွေအနေနဲ့ ရွေးကောက်ပွဲဆိုင်ရာလုပ်ငန်း/မဲဆွယ်စည်းရုံး ခြင်းဆိုင်ရာလုပ်ငန်းတွေဆောင်ရွက်ဖို့အတွက် အချိန်လုံလောက်စွာရရှိစေနိုင်ဖို့အလို့ငှာ နိုင်ငံရေးပါတီတည်ထောင်ခွင့်လျှောက်ထားလိုသူတွေဟာ ၂၀၂၅ ခုနှစ် မေလ ၉ ရက်နောက်ဆုံးထားပြီး ပြည်ထောင်စုရွေးကောက်ပွဲကော်မရှင်ကို လျှောက်ထားကြဖို့ အသိပေးကြေညာထားပါတယ်။
