#နိုင်ငံတကာသတင်း
◼ထရန့်အခွန်များကြောင့် ကုန်ဈေးနှုန်းများ မြင့်တက်လာမည်ဟု အမေရိကန်နိုင်ငံသား၇၃ ရာခိုင်နှုန်းယူဆ
ကမ္ဘာ့နိုင်ငံအများစုမှ သွင်းကုန်များအပေါ် အခွန်သစ်များ စည်းကြပ်ရန် သမ္မတဒေါ်နယ်ထရန့် ၏ လုပ်ရပ်ထွက်ပေါ်လာခဲ့ပြီးနောက် စားသုံးသူကုန်ပစ္စည်း အမြောက်အမြားဈေးနှုန်းမြင့်တက်လာခြင်းကိုရင်ဆိုင်ရန် အမေရိကန်နိုင်ငံသား အများစုက ပြင်ဆင်နေကြကြောင်း Reuters/Ipsos စစ်တမ်းက တွေ့ရှိခဲ့သည်။
သွင်းကုန်ပစ္စည်းအားလုံးနီးပါးအပေါ်အခွန်သစ်များစည်းကြပ်ခဲ့ပြီးနောက်လာမည့်ခြောက်လတွင် ၎င်း တို့ နေ့စဉ် ဝယ်ယူနေကျ ပစ္စည်းဈေးနှုန်းများ မြင့်တက်လာလိမ့်မည်ဟု စစ်တမ်းတုံ့ပြန်သူ ၇၃ ရာခိုင်နှုန်းက ယူဆကြောင်း သုံးရက်ကြာပြုလုပ်ခဲ့ပြီး တနင်္ဂနွေနေ့ကအဆုံးသတ်ခဲ့သည့် စစ်တမ်းက တွေ့ရှိခဲ့သည်။
စစ်တမ်းတုံ့ပြန်သူ ၄ ရာခိုင်နှုန်းကသာ ဈေးနှုန်းများ ကျလာမည်ဟု ထင်မြင်ကြောင်း ပြောကြားကြပြီး ကျန်ဖြေဆိုသူများတွင် အပြောင်းအလဲမရှိဟု ပြောသူများပါဝင်သလို မတုံ့ပြန်သူများလည်း ပါဝင်သည်။
ဆယ်စုနှစ်များစွာအတွင်း အမေရိကန်၏ အကြီးမားဆုံးအခွန်တိုးမြှင့်မှုများကို ဒေါ်နယ်ထရန့် က ပြီးခဲ့သည့်သီတင်းပတ်အတွင်း ကြေညာခဲ့ပြီးနောက် စတော့ရှယ်ယာဈေးကွက်များတွင် အမေရိကန်ဒေါ်လာ ထရီလီယံ နှင့် ချီ၍ ဆုံးရှုံးမှုများ ဖြစ်ပေါ်ခဲ့သည် ။
အခွန်များကြောင့် ဈေးနှုန်းများကို မြင့်တက်လာစေကာ အမေရိကန်နှင့် ကမ္ဘာတစ်ဝန်းတွင် စီးပွားရေးကျဆင်းမှုကပ်ဖြစ်လာနိုင်ကြောင်း စီးပွားရေးပညာရှင်များက ဟောကိန်းထုတ်ကြသည်။
စစ်တမ်းတုံ့ပြန်သူ ၅၇ ရာခိုင်နှုန်းက ထရန့်၏ အခွန်သစ်များကို ဆန့်ကျင်ကြောင်း ပြန်ကြားခဲ့ကြပြီး ၎င်းတို့အနက် လေးပုံ တစ်ပုံသည် ဒေါ်နယ်ထရန့်၏ ရီပတ်ဘလီကန်ပါတီဝင်များ ဖြစ်သည်။
အခွန်သစ်များကို ထောက်ခံကြောင်း ပြောကြားသူမှာ ၃၉ ရာခိုင်နှုန်းရှိပြီး နိုင်ငံတကာကုန်သွယ်ရေးတွင် အခြားနိုင်ငံများက အမေရိကန်အပေါ် အခွင့်ကောင်းယူနေကြကြောင်း ထရန့်၏အစိုးရ၏ ပြောကြားမှုကို သဘောတူသူမှာလည်း ၅၂ ရာခိုင်နှုန်းရှိကြောင်း စစ်တမ်းက တွေ့ရှိခဲ့သည်။
ယင်းအမြင်မှာ ကုန်သွယ်ရေးအတားအဆီးများ လုပ်ဆောင်ရခြင်း၏ အဓိကအကြောင်းရင်းဖြစ်ကြောင်း ဒေါ်နယ်ထရန့် က မကြာခဏပြောကြားလေ့ရှိပြီး ယင်းအမြင်နှင့် သဘောမတူကြောင်း ပြန်ကြားသူ ၄၄ ရာခိုင်နှုန်းက ပြောကြားကြသည်။
ယခုစစ်တမ်းအား နိုင်ငံတစ်ဝန်းမှ အရွယ်ရောက်ပြီးသား အမေရိကန်နိုင်ငံသား ၁၀၂၇ ဦးကို အွန်လိုင်းမှတစ်ဆင့် မေးမြန်းပြုစုထားပြီး ရာခိုင်နှုန်းမှာ ၃ ရာခိုင်နှုန်း အတိမ်းအစောင်းဖြစ်နိုင်ကြောင်း သတင်းက ဖော်ပြသည်။
သတင်း-ရဲမင်း
ကိုးကား-Reuters
