လွတ်လပ်သူကိုသာ မေတ္တာမျှပါ

ချစ်ခြင်းမေတ္တာကို ရွေးချယ်ရင် ကိုယ့်အတွက် သီးသန့်ဖြစ်တဲ့ တစ်ဦးဆိုင်နာမ် အချစ်မျိုးကိုပဲ ရွေးချယ်ပါ ။ အခြားသူနဲ့ မျှဝေနေရမယ် ၊ ပုန်းလျှိုးကွယ်လျှိုး ချစ်မြတ်နိုးရမယ်ဆိုရင်လေ အစတည်းက မပတ်သက်တာအကောင်းဆုံးပဲ ။ ဒါကြောင့် သူများလူကို မလုယူမိစေနဲ့ ၊ တစ်ဖက်ဆီကနေ ဖောက်ပြန်ပြီး ကိုယ်နဲ့လာရောသူကိုလည်း လက်မခံမိစေနဲ့ ။

ချစ်ခြင်းမေတ္တာက ပျော်စရာပဲ ဖြစ်သင့်တာ ၊လွတ်လပ်ပျော်ရွှင်မှုတွေ ရှိနေမှ အချစ်ရဲ့ ရသမြောက်တာ ။ သူများလူကို လုယူတာ ၊ ဖောက်ပြန်တာတွေဟာ ဘယ်တောမှမပျော်ရဘူး ။

ချစ်တဲ့သူကို ပိုင်ဆိုင်ရရင် ပျော်ရမယ်အထင်နဲ့ လုယူတယ် ၊ သူနဲ့သာဆို ပိုသာယာမယ်အထင်နဲ့ ဇယားရှုပ်တယ် … တကယ်တော့ အမှားပဲ ၊ ဘယ်တောခါမှ စိတ်မချမ်းသာရဘူး အမြဲ ပူလောင်ရတယ် ။ တစ်ပါးသူပစ္စည်းခိုးယူတယ် ၊ လူမသိအောင် ရှောင်ပုန်းရတယ် ဆိုမှတော့ ဘယ်လိုလုပ် လပ်ပြာလုံရပါ့မလဲ ။ အဲလိုလုပ်ရပ်မျိုး လုပ်ထားသူက အမြဲတမ်း သိမ်ငယ်နေရတယ် ၊ အရောင်မထွက်ဘူး ၊ အကြည်ဓာတ်လည်းရမနေဘူး ။

ပတ်ဝန်းကျင်မှာလဲ တွေ့နေရတာပဲ အငယ်နှောင်းထားတာတွေ ၊ ဖောက်ပြန်တာတွေ … ခုခေတ်မှာ ပိုလို့တောင် ဆိုးပါသေးတယ် ။ လွယ်လင့်တကူ ဖောက်လွဲဖောက်ပြန် လုပ်နေကြတာ ။ သူတို့ပျော်နေရလား ကြည့်လိုက် ၊ ဘယ်သူမှမပျော်ရဘူး ။ အမြဲပူလောင်နေကြတာ ၊ လူတကာရဲ့ တံတွေးခွက်မှာ ပက်လက်မျောနေကြတာ ။

" ဘဝက တိုတိုလေး ၊ ကိုယ်လုပ်ချင်တာ ဖြစ်အောင်လုပ် ၊ ဘယ်သူ့မှ ဂရုမစိုက်နဲ့ " ဆိုတာက ဘယ်သူ့ကိုမှ မထိခိုက်စေတဲ့ လုပ်ရပ်မျိုးအတွက်ပဲ ဆိုလိုတာဖြစ်တယ် ။ သူများအိမ်ထောင်ရေးတွေ ၊ စိတ်ခံစားချက်တွေကို ထိခိုက်နေတာမျိုးဆိုမလုပ်ရဘူး ။ ကိုယ်ကြိုက်ရာ ကိုယ်လုပ်တယ် ဆိုလည်းပဲ လူပီသတဲ့လုပ်ရပ်မျိုးတော့ ဖြစ်ရမှာပဲပေါ့ ။

လောကမှာ လူတွေအများကြီး ရှိပါလျက်နဲ့ မလွတ်လပ်တဲ့သူကိုမှ ရွေးချယ်ရသလား ။ အဲလိုလူကိုမှ ရွေးချယ်ပြီး ပတ်သက်တာက ကိုယ့် role ကိုယ် နိမ့်ချလိုက်တာပဲ ။ ကိုယ်ဟာ လွတ်လပ်တဲ့သူနဲ့ မထိုက်တန်တဲ့သူတစ်ယောက်လို ၊ ပုန်းလျှိုကွယ်လျှို နေရတဲ့သူတစ်ယောက်လို ဘဝမျိုးကို ရွေးချယ်တာ ၊၊ သူများအပိုင်ကို လုယူပြီး ဒါက ငါ့လူပါလို့ လူတွေအလယ်ချပြရဲသလား ။

ချစ်တဲ့စိတ်ကြောင့် ကျူးလွန်မိတယ် ဆိုတာဟာ တကယ်တော့ ဖောက်ပြန်သူတို့ရဲ့ မုသားစကားလှလှတစ်ခုပဲ ။ ဒါကို အချစ်လို့ မခေါ်ထိုက်ဘူး ၊ အတ္တပဲ ။ အချစ်ဟာ ရွေးချယ်မှုပါ ။ အချစ်ကရွေးချယ်လို့မရဘူး … သူ့အလိုလိုဖြစ်လာတာဆိုရင်တောင် ကိုယ့်အသိက ပြန်ထိန်းတတ်ရတယ် ။ ဆန္ဒကို သိက္ခာနဲ့ ထိန်းနိုင်ရမှာပဲပေါ့ ။ လူအချင်းချင်းတွေ့ကြပြီး .. စကားတွေပြောကြမယ် ၊ Chemistry မိတယ် ၊ သဘောကျတယ် ဆိုတာ အချစ်ပဲလေ ။ ကိုယ့်ကို ရင်ခုန်စေမဲ့သူက ဒီလူတစ်ယောက်တည်း လောကမှရှိတာမှမဟုတ်ပဲ ။ အခြားသူတွေနဲ့လည်း ထပ်ဆုံနိုင်ပြီး ၊ အချစ်က ထပ်မံပေါက်ဖွာလာနိုင်သေးတာပဲ မဟုတ်လား ။

Cheat လုပ်ခံရတဲ့ သူကလည်း အကောင်းဘက်ကကြည့်ရင် ဖောက်ပြန်တာကို သိခွင့်ရခြင်းဟာ ကိုယ့်အတွက် ကောင်းတဲ့အရာတစ်ခုပဲ ။ ကို့ယ့်ကို ဘယ်လောက်ထိ လှည့်စားပြီး ၊ ဘယ်လို လိမ်ညာနေမှန်း မသိသူ ၊ ကိုယ့်ကို စိတ်ရင်းအမှန်နဲ့ မချစ်တော့တဲ့သူကို ကိုယ့်ဘေးကနေ ဖယ်ထုတ်ခွင့်ရတာ ။ အဲ့ဒီ့လို လူတစ်ယောက် ဆုံးရှုံးရတာဟာ ကိုယ့်အတွက် နစ်နာစရာလည်း မဟုတ် ။

အချစ်ရေး ၊ အိမ်ထောင်ရေးနဲ့ ပတ်သက်လို့ ဘယ်သူ့ဆီကမှ လုယူထားတာမဟုတ်ဘူး ၊ ဖောက်ပြန်တာ မဟုတ်ဘူးဆိုတဲ့ သူတွေက အမြဲပျော်ရွှင်ရတယ် ။ ရဲရဲတင်းတင်းနေထိုင်ရတယ် ။ ပြဿနာတွေ ၊ ကတောက်ကဆတွေရှိတိုင်းလည်း ခဏလေးအတွင်း ပြန်ညှိယူနိုင်တယ် ။ ဘယ်တောခါမှ မပူလောင်ရဘူး ။ ဒါကြောင့် လွတ်လပ်တဲ့ လူတစ်ယောက်ကိုသာ မေတ္တာမျှပါ ။

အဲလိုမှမဟုတ်ပဲ ဖောက်ပြန်မယ် ၊ တခြားသူဆီက လုယူမယ်ဆိုရင် ပိုင်ဆိုင်ရလည်း ပျော်ရမယ် မထင်နဲ့ ။

- Thar Htwe -

#အချစ်နှင့်ဘဝရဲ့ညီမျှခြင်း