ပျဉ်ထောင်ကျေးရွာရှိ အမျိုးသမီးတစ်ဦးအား အကြမ်းဖက် PDF များက လက်နက်ငယ်ဖြင့် အကြောင်းမဲ့သတ်ဖြတ်
*****************
(မှုခင်း) မတ်လ ၂၁
စစ်ကိုင်းတိုင်းဒေသကြီး၊ ခင်ဦးမြို့နယ်၊ ပျဉ်ထောင်ကျေးရွာမှ ဒေသခံပြည်သူအမျိုးသမီးတစ်ဦးအား အကြမ်းဖက် PDF များမှ မတ်လ ၂၀ ရက်နေ့က လက်နက်ငယ်ဖြင့် လာရောက်ပစ်ခတ်ခဲ့သဖြင့် သေဆုံးခဲ့ကြောင်း သိရသည်။
ဖြစ်စဉ်မှာ ခင်ဦးမြို့နယ်၊ ပျဉ်ထောင်ကျေးရွာနေ ဒေါ်ခင်ညွန့်၊ ၆၆ နှစ်၊ (ဘ)ဦးဘိုးမော်သည် မတ်လ ၂၀ ရက်နေ့ ညနေ ၃ နာရီ ၃၀ မိနစ်အချိန်ခန့်တွင် ကျေးရွာ၏ အနောက်ဘက်ရှိ ပဲစိုက်ခင်း၌ အလုပ်လုပ်ကိုင်နေစဉ် အကြမ်းဖက် PDF များရောက်ရှိလာပြီး ဒေါ်ခင်ညွန့်အား ၎င်းတို့၏အကြမ်းဖက်လုပ်ရပ်များအပေါ် ထောက်ခံအားပေးမှု မရှိသေကြောင့်ဟုဆိုကာ လက်နက်ငယ်ဖြင့် ပစ်ခတ်ခဲ့သောကြောင့် ကျည်ထိမှန်ဒဏ်ရာများရရှိကာ သေဆုံးခဲ့ခြင်းဖြစ်ကြောင်း သိရသည်။
အကြမ်းဖက် PDF များသည် မြို့၊ ရွာများအတွင်းဝင်ရောက်၍ အတင်းအဓမ္မလူသစ်စုခြင်း၊ ဆက်ကြေးကောက်ခံခြင်းများ လုပ်ဆောင်လျက်ရှိပြီး ၎င်းတို့အလိုကျ လိုက်ပါလုပ်ဆောင်ခြင်းမရှိသော ဒေသခံပြည်သူများ၊ အစိုးရဝန်ထမ်းများနှင့် သံဃာတော်များကို ခေါင်းစဉ်အမျိုးမျိုးတပ်၍ လူသားမဆန်စွာ လုပ်ကြံ၊ သတ်ဖြတ်မှုများကို မကြာခဏ လုပ်ဆောင်လျက်ရှိပြီး ထိုသို့လုပ်ဆောင်နေသည့် အကြမ်းဖက်သမားများအား လုံခြုံရေးတပ်ဖွဲ့ဝင်များက လိုအပ်သည့် တုံပြန်မှုများ ဆောင်ရွက်နိုင်ရန်အတွက် လုံခြုံရေးလုပ်ငန်းများအား တိုးမြှင့်ဆောင်ရွက်လျက်ရှိကြောင်း သတင်းရရှိသည်။
