အနံကြီးကွင်းကျယ် Dimension သစ်နဲ့ လာတဲ့ Huawei ခေါက်ဖုန်း
သူလိုကိုယ်လို မြင်နေကျ 19.5:9 , 20:9 , 21:9 တွေနဲ့ မဟုတ်တဲ့ ဖုန်းပါ။
ဈေးကွက်နဲ့ ကွဲထွက်နေတဲ့ ဖုန်း form factor သစ်ကို Huawei က Pura X ခေါက်ဖုန်းမှာ ချပြလိုက်ပါတယ်။ Huawei Pura X က ပုံမှန်ဖုန်းတွေထက် screen အနံ ပိုကျယ်တဲ့ 16:9 aspect ratio သစ်ကို သုံးလာတာပါ။ တက်ဘလက်နဲ့ ကွန်ပျူတာတွေမှာ တွေ့ရတတ်တဲ့ အချိုးပါ။
အရင်တုန်းက 16:9 အချိုးသုံး ဖုန်းတွေ ထွက်ခဲ့ပေမယ့် အခုတော့ မျိုးသုဉ်းသွားတဲ့ ဒီဇိုင်းတစ်မျိုးလို့ ဆိုရမှာပါ။ ဒီဖက်ရှင်ကိုပဲ ယောက်သွားခွံစတိုင် Clamshell ခေါက် Huawei Pura X မှာ ပြန်သုံးလာတာ ဖြစ်ပါတယ်။ အချိုးအတိုင်းဆို Pura X က အမြင့် height ၁၄၃.၂ မီလီမီတာနဲ့ အနံ width ၉၁.၇ မီလီမီတာ ရှိမှာပါ။
ခေါက်ထားချိန်မှာတော့ height နဲ့ width က ၉၁.၇ မီလီ x ၇၄.၃ မီလီ ဖြစ်လာပါတယ်။ အနံကျဉ်းကျဉ်း ဖုန်းတွေလောက် လက်ထဲ ကိုင်ရတာ သက်တောင့်သက်သာ မဖြစ်ပေမယ့် ရုပ်ရှင်ကြည့် ၊ ဂိမ်းဆော့တော့ တော်တော်လေး မိုက်ပါလိမ့်မယ်။ အတွင်း screen ၆.၃ လက်မ ၊ အပြင် Screen ၃.၅ လက်မ ရှိပြီး Screen နှစ်မျိုးလုံး LTPO OLED Panel ၊ 120Hz Refresh Rate ပေးထားပါတယ်။
Cover Screen မှာ customizable animations တွေနဲ့ live options ပါတဲ့ wallpapers မျိုးစုံ ထည့်ပေးထားသလို ဖုန်းခေါ်တာ ၊ စာပို့တာ ၊ သီချင်းနားထောင်တာ ၊ ကင်မရာသုံးတာကိုလည်း ဖုန်းဖွင့်စရာမလိုဘဲ cover Screen ပေါ်ကနေ လုပ်သွားလို့ ရမှာပါ။ Video Call ခေါ်တာကိုတော့ အတွင်း screen ပေါ်က 10MP ကင်မရာသုံးပါတယ်။
Cover Screen ရဲ့ အပေါ်ဘက်မှာ သုံးလုံးတန်း ကင်မရာ module ပါပြီး ကင်မရာ setup အနေနဲ့ RYYB sensor နဲ့ OIS ပါ f/1.6 အပါချာသုံး 50MP wide camera ၊ RYYB sensor ပါ 40MP f/2.2 Ultrawide ကင်မရာနဲ့ OIS ပါပြီး 3.5x optical zoom ဆွဲနိုင်မဘ့် 8MP Telephoto ကင်မရာတို့ သုံးထားပါတယ်။ ကင်မရာ sensor တွေ ဘေးမှာလည်း Huawei Mate 70 Pro စီးရီးမှာ ပါတဲ့ spectral image sensor ထည့်ထားပါတယ်။
Huawei Pura X မှာ 4720mAh ဘက်ထရီ dual cell နဲ့ လာပြီး 66W wired နဲ့ 40W wireless charging ပါပါတယ်။ Pura X မှာ သုံးထားတဲ့ chipset အကြောင်း မသိရသေးပေမယ့် ဂရပ်ဖိုက်ပြားသုံး အပူထိန်းစနစ်တွေ ပါသလို တရုတ်ဂြိုလ်တုတွေ သုံးထားတဲ့ ဂြိုလ်တုဆက်သွယ်ရေးစနစ်လည်း ထည့်ထားပါတယ်။
Huawei Pura X ရဲ့ နောက်ထပ်ထူးခြားချက်တစ်ခုက Android app လုံးဝ မပါတဲ့ နောက်ဆုံးပေါ် Huawei ကိုယ်ပိုင် OS နည်းပညာဖြစ်တဲ့ HarmonyOS 5 ကို ပထမဆုံးသုံးလာတာပါ။ ဒီဆော့ဖ်ဝဲလ်ထဲမှာ Huawei ရဲ့ AI assistant ဖြစ်တဲ့ Xiaoyi လည်း ပါပါတယ်။
ဈေးကွက်ထဲမှာ Huawei Pura X ကို အနက် ၊ အဖြူ ၊ ငွေ သုံးရောင်နဲ့ ထွက်ပြီး ပုံမှန်ဗားရှင်းနဲ့ Collector Edittion ဆိုပြီး နှစ်မျိုးလာပါတယ်။ ပုံမှန်ဗားရှင်း 12/256GB မော်ဒယ်ကို ၇၄၉၉ ယွမ် (၁၀၃၅ ဒေါ်လာ) ကနေ စပါတယ်။ အမြင့်ဆုံး RAM 16GB / 1 TB storage ကိုတော့ ၉၉၉၉ ယွမ် (ဒေါ်လာ ၁၃၈၀) နဲ့ ရောင်းချသွားမှာပါ။