နည်းပြက ပွဲထိုးဖူးဖို့ လိုရဲ့လား
တိုက်ခိုက်ရေးအားကစားမှာ လေ့ကျင့်သူတွေက နည်းပြဆရာကို ရွေးချယ်အပ်လာကြတယ်။ ဒါကလည်း သူတို့အမှားမဟုတ်ပါဘူး။ ပိုက်ဆံပေးပြီး သင်တာပဲ။ ပိုကောင်း၊ ပိုတော်တဲ့နည်းပြကို အပ်ချင်ကြတာပါ။ ဒါဆိုရင် ပိုကောင်း၊ ပိုတော်တဲ့ နည်းပြဆိုတာ ဘာကိုဆိုလိုတာလဲ။ ထပ်မေးစရာရှိတာက နည်းပြက ပွဲထိုးဖူးဖို့ လိုရဲ့လား။
ပိုကောင်း၊ ပိုတော်တဲ့ နည်းပြဆိုတာကို အရင်ဆုံးသုံးသပ်ကြည့်ရအောင်။ နည်းပြဆိုတာ ကစားသမားကို စနစ်တကျလေ့ကျင့်ပေးနိုင်ရမယ်။ နည်းစနစ်ပြည့်ဝရမယ်။ ပွဲမတိုင်ခင်မှာ နည်းဗျူဟာချပေးနိုင်ရမယ်။ ပြိုင်ဘက်ရဲ့ အားနည်းချက်ကို အကဲခတ်တတ်ရမယ်။ ပွဲထိုးနေချိန်မှာလည်း ကိုယ့်လူရဲ့ အားနည်းချက်ကို ပြင်ပေးနိုင်ရမယ်။ ပြိုင်ဘက်ရဲ့ ဟာကွက်ကိုလည်း ဖော်နိုင်ရမယ်။ ဒါတင်မက ကိုယ့်ကစားသမားရဲ့ အနေအထိုင်နဲ့ အပြောအဆိုကိုလည်း သွန်သင်ပေးနိုင်ရမယ်။ ဒါတွေက နည်းပြကောင်းရဲ့ အလုပ်ပါပဲ။
နည်းပြက ပွဲထိုးဖူးဖို့ လိုရဲ့လား။ အပေါ်စာပိုဒ်မှာ ရေးသွားတဲ့ နည်းပြကောင်းအချက်တွေထဲမှာ နည်းပြက ပွဲထိုးဖူးရမယ်ဆိုတဲ့ အချက်မပါဘူး။ ဟုတ်တယ်။ ပွဲမထိုးဖူးလည်း နည်းပြကောင်းဖြစ်နိုင်ပါတယ်။ ဒီထက်ပိုပြောရရင် ပွဲမထိုးဖူးလည်း ကမ္ဘာကျော်နည်းပြဖြစ်နိုင်ပါတယ်။ Joe Calzaghe ဆိုရင် ဝိတ်တန်းနှစ်ခုမှာ ကမ္ဘာ့ချန်ပီယံဖြစ်ခဲ့ဖူးပြီး ကြေးစားဘဝမှာ ရှုံးပွဲမရှိပါဘူး။ ဒါပေမယ့် သူ့ကိုသင်ပေးတဲ့ နည်းပြ (အဖေ) Enzo Calzaghe က ဘောက်ဆင်မထိုးဖူးပါဘူး။ နည်းပြမလုပ်ခင်တုန်းက ဂစ်တာလေး တဒေါင်ဒေါင်ခေါက်နေသူပါ။
Cus D'Amato ဆိုတာက ဘောက်ဆင်သမိုင်းမှာ ကြီးကျယ်ခမ်းနားတဲ့ နည်းပြကြီးပါ။ Mike Tyson ရဲ့ နည်းပြလို့လည်း ဆိုနိုင်ပါတယ်။ နည်းပြ Cus D'Amato လည်း ကြေးစားပွဲမထိုးဖူးပါဘူး။ ဒါပေမယ့် Mike Tyson အပါအဝင် Floyd Patterson နဲ့ Jose Torres တို့ကို ကမ္ဘာ့ချန်ပီယံဖြစ်အောင် လေ့ကျင့်ပေးဖူးတယ်။
Deontay Wilder ကို ဟဲဗီးဝိတ်ချန်ပီယံဖြစ်အောင် လေ့ကျင့်ပေးသူက Jay Deas တဲ့။ နည်းပြ Jay Deas လည်း ဘောက်ဆင်မထိုးဖူးပါဘူး။ အရင်က မှုခင်းသတင်းထောက်ပါ။ မှုခင်းသတင်းထောက်ကနေ ဘောက်ဆင်နည်းပြလုပ်တာပါ။ အခုဆိုရင် နည်းပြ Ben Davison က Anthony Joshua ကို လေ့ကျင့်ပေးနေတယ်။ အရင်တုန်းက Tyson Fury ကိုလည်း လေ့ကျင့်ပေးဖူးပါတယ်။ ဒါပေမယ့် နည်းပြ Ben Davison က ကြေးစားပွဲမထိုးဖူးပါဘူး။ အပျော်တမ်းကစားဖူးတယ်။ နောက်ဘောလုံးသမားဘဝကနေ ဘောက်ဆင်နည်းပြဝင်လုပ်တာပါ။
Tyson Fury ရဲ့ လက်ရှိနည်းပြက SugarHill Steward ဖြစ်ပါတယ်။ နည်းပြ SugarHill Steward လည်း ပွဲမထိုးဖူးပါဘူး။ အရင်က စားဖိုမှုးလုပ်တယ်။ ရဲအရာရှိလည်း ဖြစ်ခဲ့ဖူးပါတယ်။ အခုဆိုရင် ကမ္ဘာကျော်နည်းပြဖြစ်နေပါပြီ။ ဒါပေမယ့် SugarHill Steward ရဲ့ ဦးလေးက Emanuel Steward ပါ။ နည်းပြကြီး Emanuel Steward က ကမ္ဘာ့ချန်ပီယံ (၄၁) ယောက်ကို လေ့ကျင့်ပေးဖူးပြီး SugarHill Steward လည်း ဦးလေးဆီကနေ ပညာသင်ယူခဲ့ရပါတယ်။
နည်းပြ Greg Jackson က Jackson Wink MMA Academy ကို ပူးတွဲပိုင်ဆိုင်သူပါ။ Jon Jones နဲ့ Georges St-Pierre တို့ရဲ့ ဆရာပါ။ နည်းပြ Greg Jackson လည်း ပွဲမထိုးဖူးပါဘူး။ ပြည်တွင်းဘက်ကို ပြန်သွားရအောင်။ ဆရာဦးဝင်းဇင်ဦးနဲ့ ဆရာကျော်စိုးတို့လည်း ထိပ်တန်းရိုးရာလက်ဝှေ့နည်းပြတွေပါ။ သူတို့ပွဲထိုးတာလည်း မကြားဖူးပါဘူး။
ကဲ . . . အချက်အလက်ကလည်း စုံသလောက်ဖြစ်နေပါပြီ။ လိုရင်းကို ပြန်ကောက်ရအောင်။ နည်းပြဆိုတာ ကစားသမားကို နည်းစနစ်ကောင်းအောင် သင်ပေးနိုင်ရမယ်။ ပွဲအတွက် နည်းဗျူဟာချမှတ်ပေးနိုင်ရမယ်။ ဒါက အဓိကအချက်ပါဲ။ ဒီအချက်တွေ မပြည့်စုံရင် ပွဲတစ်သောင်းထိုးဖူးလည်း နည်းပြကောင်း မဖြစ်နိုင်ပါဘူး။ ပွဲထိုးဖူးခြင်း၊ ပွဲမထိုးဖူးခြင်းက သာမညပါ။ ဒါပေမယ့် ပွဲထိုးဖူးရင် ပိုကောင်းပါတယ်လို့ ဆိုချင်ပါတယ်။
