ပန်းဆယ်မျိုး
==========
ပန်းဆယ်မျိုးဆိုသည်မှာ လူများသုံးစွဲနေကြသော ပစ္စည်းများကို ထုတ်လုပ်သည့် အနုပညာလုပ်ငန်းဆယ်မျိုးကို ဆိုလိုသည်။ "ဘုရားမတင် နတ်မဝင် လူတွင်ဆယ်မျိုးပန်း" ဟုလည်း အဆိုရှိသည်။ ၎င်းပန်း(၁၀)မျိုးတို့မှာ ပန်းပဲ၊ ပန်းထိမ်၊ ပန်းတဉ်း၊ ပန်းတော့၊ ပန်းတမော့၊ ပန်းရန်၊ ပန်းပု၊ ပန်းပွတ်၊ ပန်းချီ နှင့် ပန်းယွန်းတို့ ဖြစ်ကြပါသည်။ (အမှတ်စဉ်တို့ကို "ပဲ၊ တိမ်၊ တဉ်း၊ တော့၊ မော့၊ ရန်၊ ပု၊ ပွတ်၊ ချီ၊ ယွန်း" ဟူသော အလွယ်မှတ်အတိုကောက်အစီအစဉ်အတိုင်း စီစဉ်ထားခြင်း ဖြစ်ပါသည်။)
(၁) ပန်းပဲ
ပန်းပဲဆိုသည်မှာ သံကို မီးအားကောင်းကောင်းဖြင့် ရဲနေအောင်ဖုတ်၍ လိုရာသံထည်ပစ္စည်းပြုလုပ်သည့် လုပ်ငန်းဖြစ်သည်။
ပန်းပဲတို့သည် ပေါက်ပြား၊ တူရွင်းငန်းပြား၊ ပုဆိန်၊ ရဲတင်း၊ တူ၊ ပဲခွပ်၊ ပေါက်ချွန်း၊ တူးရွင်း၊ ထွန်ခြစ်၊ လှည်းသံပတ်၊ လှည်းဝင်ရိုး၊ ဆိတ်မျက်လုံး၊ ကတ်ကြေး၊ ဓား စသည်တို့ကို ပြုလုပ်သည်။
************************
(၂) ပန်းထိမ်
ပန်းထိမ်ဆိုသည်မှာ ရွှေထည်ငွေထည်ပြုလုပ်သော လုပ်ငန်းဖြစ်သည်။
ရွှေပန်းထိမ်တို့သည် နားတောင်း၊ နားဆွဲ၊ နားကပ်၊ ကြယ်သီး၊ လက်စွပ်၊ လက်ကောက်၊ ဆွဲကြိုး စသည်တို့ကို ပြုလုပ်သည်။ ငွေပန်းထိမ်တို့သည် သောက်ရေဖလား၊ ဧည့်ခံဖလား၊ ဆုဖလား၊ ဒိုင်း၊ ခါးပတ်၊ ဓားအိမ် စသည်တို့ကို ပြုလုပ်သည်။
************************
(၃) ပန်းတဉ်း
ပန်းတဉ်းဆိုသည်မှာ ကြေးထည်ပစ္စည်းများကို ပြုလုပ်သော လုပ်ငန်းဖြစ်သည်။
ပန်းတဉ်းတို့သည် ကြေးစည်၊ မောင်း၊ ကြေးနောင်၊ ခြူ၊ ဆည်းလည်း၊ ခေါင်းလောင်း၊ လင်းကွင်း၊ ဖလား၊ ကြေးအိုး၊ ဇွန်း၊ ကြေးလင်ပန်း၊ ဟင်္သာအလေး၊ ကြေးသပိတ် စသည်တို့ကို ပြုလုပ်သည်။
************************
(၄) ပန်းတော့
ပန်းတော့ဆိုသည်မှာ အင်္ဂတေဖြင့် ရုပ်လုံးများ၊ ခြူးပန်းခြူးနွယ် အလှပန်းခက်များကို ပြုလုပ်သော လုပ်ငန်းဖြစ်သည်။
ပန်းတော့တို့သည် အင်္ဂတေသရွတ်တို့ဖြင့် ခြင်္သေ့ရုပ်၊ နဂါးရုပ်၊ ပန်းခက်ပန်းနွယ် စသည်တို့ကို ပြုလုပ်သည်။
************************
(၅) ပန်းတမော့
ပန်းတမော့ဆိုသည်မှာ ကျောက်ဆစ်လုပ်ငန်းဖြစ်သည်။
ပန်းတမော့တို့သည် ဘုရားဆင်းတု၊ သိမ်တိုင်၊ ကျောက်စာတိုင်၊ ခြင်္သေ့ရုပ်၊ ဆင်ရုပ်၊ သမင်ရုပ်၊ ကျောက်ပျဉ်၊ ကျော်ငရုတ်ဆုံ၊ ကျောက်စားပွဲ စသည်တို့ကို ပြုလုပ်သည်။
************************
(၆) ပန်းရန်
ပန်းရန်ဆိုသည်မှာ မြေအုတ်၊ ကျောက်အုတ်တို့ကို အင်္ဂတေနှင့် တွဲကပ်၍ လိုအပ်သောအဆောက်အအုံများ တည်ဆောက်သော လုပ်ငန်းဖြစ်သည်။
ပန်းရန်တို့သည် တိုက်အိမ်၊ ဘုရားစေတီ၊ တံတား စသည်တို့ကို တည်ဆောက်သည်။
************************
(၇) ပန်းပု
ပန်းပုဆိုသည်မှာ သစ်သားကိုလည်းကောင်း၊ ဆင်စွယ်ကိုလည်းကောင်း အရုပ်များ၊ ပန်းများ ထုလုပ်သော လုပ်ငန်းဖြစ်သည်။
ပန်းပုတို့သည် လူရုပ်များ၊ တိရစ္ဆာန်များ၊ ခြူးပန်းခြူးနွယ် အလှပန်းခက်များကို ထုလုပ်သည်။
************************
(၈) ပန်းပွတ်
ပန်းပွတ်ဆိုသည်မှာ သစ်သားကို လုံးချောအောင် ပွတ်ခံ၍ လူ့အသုံးအဆောင် ပြုလုပ်သော လုပ်ငန်းဖြစ်သည်။
ပန်းပွတ်တို့သည် ထီးရိုး၊ ကုတင်ခြေထောက်၊ စားပွဲခြေထောက်၊ တန်ဆောင်းပွတ်လုံး၊ လက်ရန်းပွတ်လုံးတို့ကို ပြုလုပ်သည်။
************************
(၉) ပန်းချီ
ပန်းချီဆိုသည်မှာ သက်ရှိသတ္တဝါပုံများ၊ သက်မဲ့အရာဝတ္ထုပုံများကို ဆေးရောင်အမျိုးမျိုးဖြင့် သရုပ်ပေါ်အောင်ရေးဆွဲသော လုပ်ငန်းဖြစ်သည်။
ပန်းချီတို့သည် လူ၊ တိရစ္ဆာန်၊ အရာဝတ္ထုပုံ၊ ရှုမျှော်ခင်းပုံ၊ ဒီဇိုင်းပုံ၊ ကာတွန်းပုံတို့ကို ရေးဆွဲသည်။
************************
(၁၀) ပန်းယွန်း
ပန်းယွန်းဆိုသည်မှာ ယွန်းထည်ပစ္စည်းအမျိုးမျိုးကို ပြုလုပ်သော လုပ်ငန်းဖြစ်သည်။
ပန်းယွန်းတို့သည် သပိတ်၊ ဆွမ်းအုပ်၊ လက်ဖက်အုပ်၊ မောင်းထောင်ခွက်၊ သောက်ရေခွက်၊ ကွမ်းအစ်၊ ဆေးတောင်း၊ ဆေးလိပ်သေတ္တာ စသည်တို့ကို ပြုလုပ်သည်။
*********************** #credit