နိုဗိုစီဗစ်မြိုရှိ မြန်မာကောင်စစ်ဝန်ချုပ်ရုံးကို နစက ဥက္ကဋ္ဌဖွင့်လှစ်ပေးခဲ့
*******************
(ပြည်တွင်း) မတ်လ ၁၀
ရုရှားနိုင်ငံသမ္မတရဲ့ ဖိတ်ကြားချက်အရ ရုရှားနိုင်ငံသို့ နိုင်ငံတော်အဆင့် တရားဝင်ချစ်ကြည်ရေးခရီးစဉ် ရောက်ရှိနေတဲ့ နစက ဥက္ကဋ္ဌ၊ နိုင်ငံတော်ဝန်ကြီးချုပ်၊ ဗိုလ်ချုပ်မှူးကြီးမင်းအောင်လှိုင်က မတ်လ ၉ ရက်နံနက်ပိုင်းမှာ ရုရှားနိုင်ငံ၊ နိုဗိုစီဗစ်မြို့ရှိ မြန်မာကောင်စစ်ဝန်ချုပ်ရုံးအား ကိုယ်တိုင်ဖွင့်လှစ်ပေးခဲ့ပါတယ်။
မြန်မာကောင်စစ်ဝန်ချုပ်ရုံးအား နစက ဥက္ကဋ္ဌ၊ ဒု-ဝန်ကြီးချုပ်နှင့် နိုင်ငံခြားရေးဝန်ကြီးဌာန ပြည်ထောင်စု ဝန်ကြီးဦးသန်းဆွေ၊ နိုဗိုစီဗစ်ဒေသ အုပ်ချုပ်ရေးမှူး မစ္စတာ တရာ့ ဗနီကော့ဗ်အန်ဒရေ အလက်ဇန်ဒရိုဘစ်ချ် တို့က ဖဲကြိုးဖြတ်ဖွင့်လှစ်ပေးခဲ့ကြပါတယ်။ အဲဒီနောက် နစကဥက္ကဋ္ဌမှ မြန်မာကောင်စစ်ဝန်ချုပ်ရုံးဆိုင်းဘုတ်ကို အမွှေးနံ့သာများပက်ဖျန်းပေးခဲ့ပြီး ကောင်စစ်ဝန်ချုပ် ရုံးဝန်ထမ်းမိသားစုများနှင့် နိုဗိုစီဗစ်မြို့မှာ သင်တန်းတက်ရောက်နေတဲ့ သင်တန်းသားအရာရှိများ ကို တွေ့ဆုံခဲ့ပါတယ်။
တွေ့ဆုံရာမှာ မြန်မာနိုင်ငံနှင့် နိုဗိုစီဗစ်မြို့ကြား ချစ်ကြည်ရင်းနှီးမှုနှင့် ပူးပေါင်းဆောင်ရွက်မှုများ တိုးတက်အောင်ဆောင်ရွက်ရန်လိုအပ်မှု၊ ကုန်သွယ်မှုများတိုးတက်စေရေး ဝိုင်းဝန်းကြိုးပမ်းဆောင် ရွက်ပေးစေလိုမှု၊ နိုဗိုစီဗစ်မြို့ရှိ တက္ကသိုလ်များမှာ ပညာတော်သင်များ ပညာသင်ကြားနိုင်ရေး ထပ်မံစေလွှတ်ရန်စီစဉ်လျက်ရှိမှုတို့ကို ပြောကြားခဲ့ပါတယ်။
အဲဒီနောက် နစက ဥက္ကဋ္ဌမှ ကောင်စစ်ဝန်ချုပ်ရုံး ဝန်ထမ်းမိသားစုများနှင့် သင်တန်းသားအရာရှိများ၏ လိုအပ်ချက်များကိုမေးမြန်းပြီး စားသောက်ဖွယ်ရာများနှင့် ချီးမြှင့်ငွေများပေးအပ်ခဲ့ပါတယ်။
အဆိုပါ မြန်မာကောင် စစ်ဝန်ချုပ်ရုံးဖွင့်ပွဲမှာ ဒု-ဝန်ကြီးချုပ်နှင့် နိုင်ငံခြားရေးဝန်ကြီးဌာန ပြည်ထောင်စုဝန်ကြီးဦးသန်းဆွေမှ နိုဗိုစီဗစ်မြို့မှာ မြန်မာကောင်စစ်ဝန်ချုပ်ရုံးကို ဖွင့်လှစ်နိုင်ခဲ့ခြင်းက နှစ်နိုင်ငံဆက်ဆံရေးရဲ့ သမိုင်းမှတ်တိုင်တစ်ခုဖြစ်ပြီး နိုဗိုစီဗစ်ဒေသတွင်နေထိုင်တဲ့ ရုရှားနိုင်ငံသားများအတွက် မြန်မာနိုင်ငံနှင့်ချိတ်ဆက်ပေါင်းကူးရန်၊ နှစ်နိုင်ငံကြား နားလည်မှုမြှင့်တင်ရန်၊ နိုဗိုစီဗစ်ဒေသဝန်းကျင်ရှိ မြန်မာအသိုင်းအဝိုင်းကိုကူညီစောင့်ရှောက်ပြီး ကောင်စစ်ဆိုင်ရာ ဝန်ဆောင်မှုများပေးအပ်နိုင်ရန်အတွက် ဖွင့်လှစ်ခဲ့ခြင်းဖြစ်တယ်လို့ ပြောကြားခဲ့ပါတယ်။
