ကမ္ဘာပေါ်က အကြီးဆုံး လူလုပ်ကျွန်း
ကမ္ဘာပေါ်မှာ လူသားတွေ တည်ဆောက်ခဲ့သမျှ လူလုပ်ကျွန်းတွေ အနက်မှာတော့ နယ်သာလန်နိုင်ငံက Flevopolder ကျွန်းက အကြီးဆုံးဖြစ်ပါတယ်။
၃၇၅ စတုရန်းမိုင် ကျယ်ဝန်းတဲ့ ဒီကျွန်းကို ၁၉၅၀ နဲ့ ၁၉၆၀ ခုနှစ်များအတွင်းမှာ တည်ဆောက်ခဲ့တာ ဖြစ်ပါတယ်။
ယခင်က Zuiderzee လို့ခေါ်တဲ့ ပင်လယ်အော်ကြီးကို ပိတ်ဆို့ပြီး IJsselmeer ဆိုတဲ့ ရေချိုကန်ကြီးအဖြစ် ပထမဆုံး ပြောင်းလဲခဲ့ပါတယ်။ ပြီးတော့မှ ဒီကန်ကြီးထဲက ရေတွေကို စုပ်ထုတ်ပြီး ကုန်းမြေအဖြစ် ပြောင်းလဲခဲ့တာ ဖြစ်ပါတယ်။
ဒီလိုလုပ်ဖို့ တာတမံကြီးတွေ၊ ရေစုပ်စက်ရုံတွေ၊ မြောင်းတွေ အများကြီး တည်ဆောက်ခဲ့ရပါတယ်။ ဒါဟာ နယ်သာလန်နိုင်ငံရဲ့ "Zuiderzee Works" လို့ခေါ်တဲ့ စီမံကိန်းကြီးရဲ့ အစိတ်အပိုင်းတစ်ခု ဖြစ်ပါတယ်။
ဒီကျွန်းကို တည်ဆောက်ရတဲ့ အကြောင်းကတော့ နယ်သာလန်နိုင်ငံဟာ နိမ့်ပါးတဲ့ မြေပြင်ပေါ်မှာ တည်ရှိပြီး ပင်လယ်ရေမျက်နှာပြင်အောက်မှာ ရှိတဲ့ နေရာတွေလည်း အများကြီးရှိပါတယ်။
လူဦးရေတိုးပွားလာတာနဲ့အမျှ နေထိုင်ဖို့၊ စိုက်ပျိုးဖို့ မြေနေရာလိုအပ်လာတဲ့အခါ ပင်လယ်ထဲကနေ မြေယာအသစ်တွေ ဖန်တီးဖို့ စဉ်းစားခဲ့ကြတာပါ။ ဒါ့အပြင် တဖက်ကတည်း ရေကြီးမှုအန္တရာယ်ကို ကာကွယ်နိုင်ဖို့ ရည်ရွယ်ခဲ့ပါတယ်။
ယခုအခါမှာတော့ ဒီကျွန်းပေါ်မှာ စိုက်ပျိုးရေးလုပ်ငန်းတွေ အများကြီး လုပ်ကိုင်နေကြပါတယ်။ ဂျုံ၊ အာလူး၊ ကြက်သွန်နီ စတဲ့ သီးနှံတွေကို စိုက်ပျိုးပြီး နယ်သာလန်နိုင်ငံရဲ့ စားနပ်ရိက္ခာဖူလုံရေးကို အထောက်အကူပြုနေပါတယ်။
ဒါ့အပြင် Lelystad နဲ့ Almere လို မြို့သစ်တွေလည်း ဒီကျွန်းပေါ်မှာ ပေါ်ထွန်းလာခဲ့ပါတယ်။ အထူးသဖြင့် Almere မြို့ဟာ နယ်သာလန်နိုင်ငံရဲ့ အမြန်ဆုံးကြီးထွားနေတဲ့ မြို့တစ်မြို့ဖြစ်ပြီး လူနေထိုင်မှု ပြဿနာကို ဖြေရှင်းပေးနေပါတယ်။
ဒီကျွန်းဟာ ပင်လယ်ရေမျက်နှာပြင်အောက် ၃ မီတာလောက်မှာ ရှိနေတာမို့ ရေစုပ်ထုတ်တဲ့စနစ်တွေ၊ တာတမံတွေကို အမြဲထိန်းသိမ်းနေရပါတယ်။ ဒါမှမဟုတ်ရင် ရေအောက်ပြန်ရောက်သွားမှာပါ။
ဒီလူလုပ်ကျွန်းကြီးဟာ အမြဲလိုလို ရေမင်း နဲ့ စစ်ခင်းနေရတဲ့ ဒတ်ချ်တို့အတွက် အောင်မြင်မှု တရပ်လို့လည်း ဆိုနိုင်ပါတယ်။
