အိမ်မွေး တိရိစ္ဆာန်တွေအတွက် ကမ္ဘာ့ ပထမဆုံး စမတ်ဖုန်း လာပြီ
=====================================
လူတွေအတွက် စမတ်ဖုန်းတွေ ထွက်ပေါ်လာတာ တော်တော်ကြာပါပြီ။ အခုတော့ အိမ်မွေး တိရိစ္ဆာန်တွေလည်း ခေတ်မှီလာတော့မှာ ဖြစ်ပြီး သူတို့အတွက် ကမ္ဘာ့ပထမဆုံး စမတ်ဖုန်း ထွက်လာပါပြီ။
ထူးခြားဆန်းသစ်တဲ့ နည်းပညာ ထုတ်ကုန်တွေကို ပြသနေတဲ့ Mobile World Congress (MWC) 2025 မှာ ClocalMe က အိမ်မွေး တိရိစ္ဆာန်တွေအတွက် ကမ္ဘာ့ ပထမဆုံး စမတ်ဖုန်းကို ပြသလိုက်ပါတယ်။ PetPhone လို့ အမည်ပေးထားပြီး အိမ်မွေး တိရိစ္ဆာန်နဲ့ သူတို့ရဲ့ ပိုင်ရှင်တွေအကြားမှာ ဆက်သွယ်နိုင်မှာ ဖြစ်ပါတယ်။
PetPhone ဟာ ပိုင်ရှင်တွေက သူတို့ရဲ့ အိမ်မွေး တိရိစ္ဆာန်တွေကို စောင့်ကြည့်နိုင်ဖို့ ရည်ရွယ်ဖန်တီးထားတာ ဖြစ်ပါတယ်။ အဲဒီဖုန်းရဲ့ အလုပ်လုပ်ပုံက ဒီလိုပါ။ အဲဒီဖုန်းဟာ တိရိစ္ဆာန်တွေရဲ့ အသံ၊ ဟောင်သံနဲ့ တခြား အပြုအမူတွေကို မှတ်သားထားဖို့ ပရိုဂရမ် ရေးဆွဲထားပါတယ်။ ဥပမာ သင့် ခွေးဟာ နေမကောင်းဖြစ်တာ သို့မဟုတ် ကြောက်လန့်နေတာတွေ ဖြစ်ရင် ဖုန်းက ပိုင်ရှင်ကို အသိပေးမှာ ဖြစ်ပါတယ်။ ပိုင်ရှင်က ခွေး စိတ်သက်တောင့်သက်သာ ဖြစ်အောင် ဖုန်းကနေ အသံနဲ့ ပြောကြားနိုင်မှာ ဖြစ်ပါတယ်။
ဒါတင်မကသေးပါဘူး။ GPS, WiFi နဲ့ Bluetooth လို Tracking နည်းပညာတွေ ပါတဲ့အတွက် သင့် အိမ်မွေး တိရိစ္ဆာန် ဘယ်နေရာကို ရောက်နေသလဲ ဆိုတာ သိရှိနိုင်ပါတယ်။ အိမ်မွေး တိရိစ္ဆာန်တွေရဲ့ ကျန်းမာရေးကို စောင့်ကြည့်နိုင်တဲ့ နည်းပညာလည်း ပါပါတယ်။
Ref : Tech Explorers