ဒီရုပ်ရှင်ကို အခုမှ ကြည့်မိတဲ့ ကိုယ့်အတွက်ကတော့ နောက်ကျမှ ကြည့်မိလေခြင်းလို့တောင် ခံစားရစေပါတယ်။Oscar သုံးခုရ ရုပ်ရှင်တစ်ခုဖြစ်တဲ့အပြင် ဖြစ်ရပ်မှန်ရုပ်ရှင်လည်းဖြစ်တာမလို့ လူတိုင်း ကြည့်ကိုကြည့်သင့်တဲ့ ရုပ်ရှင်တစ်ခုဖြစ်ပါတယ်။
ဇာတ်လမ်းကတော့ အဓိက သရုပ်ဆောင်နှစ်ယောက် ဒွန် နှင့် တိုနီ တို့ရဲ့ နယ်လှည့်ဖျော်ဖြေရေးခရီး အကြောင်းပဲဖြစ်ပါတယ်။၁၉၆၂နောက်ပိုင်းကို အခြေပြု ရိုက်ကူးထားပြီး အဲ့အချိန်တုန်းက အသားရောင် အဖြူအမဲ ခွဲခြားမှုတွေက အနည်းနဲ့အများ လွှမ်းမိုးမှုရှိနေသေးတာပေါ့။တိုနီကတော့ အီတီလီယန် လူဖြူ တစ်ယောက်ဖြစ်ပြီး သူက ပိုက်ဆံရရင် အကုန်လုပ်တဲ့ ကျပန်းအလုပ်သမားတစ်ယောက်ဖြစ်ပါတယ်။ဒါပေမယ့် သူလုပ်ပေးရမယ့် အလုပ်ကိုတော့ နည်းနည်းလေးမှ မလစ်ဟင်းဘဲ မရရအောင် တိတိကျကျ လုပ်ပေးတဲ့ လူစားမျိုးဖြစ်ပါတယ်။တိုနီ အလုပ်လုပ်တဲ့ ကော်ပါးဆိုင် က ယာယီပိတ်သွားတော့ တိုနီလည်း အလုပ်လက်မဲ့ဖြစ်သွားပါတယ်။ဒီလို အလုပ်လက်မဲ့ ဖြစ်နေတဲ့ အချိန်မှာ အလုပ်ပေးဖို့ဖြစ်လာတဲ့သူကတော့ ဒွန် ဖြစ်ပါတယ်။ဒွန်ကတော့ လူမဲ ဒေါက်တာဘွဲ့ရ တစ်ယောက်ဖြစ်ပြီးတော့ စန္ဒယား ပညာရှင် တစ်ယောက်ဖြစ်ပါတယ်။တိုနီက ဒွန်ရဲ့ ၈ ပတ်ကြာ နယ်လှည့်ဖျော်ဖြေပွဲကို တစ်ပွဲမှ မလွတ်ဘဲ အချိန်မှီအောင် ကားမောင်းလိုက်ပို့ပေးရမှာဖြစ်ပါတယ်။တိုနီလည်း အလုပ်မရှိ ပိုက်ဆံရတာလည်းမဆိုးတော့ လူမဲ တစ်ယောက်ကို လူဖြူတစ်ယောက်က ကားမောင်းလိုက်ပို့ဖို့အကြောင်းဖန်လာပါတော့တယ်။ဒီလိုနဲ့ ဒွန်ကို တိုနီက ကားမောင်းပို့ပေးရင်း ဇာတ်လမ်းလေးကို အစပျိုးထားပါတယ်။ဒွန်က လူမဲတစ်ယောက်ဖြစ်ပေမယ့် လူဖြူတစ်ယောက်လို နေထိုင်ပြီး တိုနီကတော့ လူဖြူဆိုပေမယ့် လူမဲနေသလို ဖြစ်သလိုနဲ့ လွှတ်လွှတ်လပ်လပ် နေတဲ့ လူစားမျိုးပါ။ပြီးတော့ တိုနီက ဒေါသကို ရှေ့တန်းတင်ပြီး ပြသာနာတွေကို လက်နဲ့ပဲ ဖြေရှင်းတတ်တဲ့လူစားမျိုးဖြစ်ပေမယ့် ဒွန်ကတော့ စကားအပြောအဆိုကအစ ယဉ်ကျေးတဲ့ အသုံးအနှုန်းတွေနဲ့ သည်းခံစိတ် အားကောင်းတဲ့ လူမဲတစ်ယောက်ဖြစ်ပါတယ်။တိုနီတစ်ယောက် ဒွန်ရဲ့ ဖျော်ဖြေပွဲတွေကို အချိန်မှီ လိုက်ပို့ပေးနိုင်ဖို့ လမ်းမှာတွေ့မယ့် ပြသနာတွေကို ဘယ်လိုဖြေရှင်းမလဲ... ဒွန်ရဲ့ နောက်ဆုံးဖျော်ဖြေပွဲအပြီး တိုနီတစ်ယောက် သူ့မိသားစုစီကို ခရစ်စမတ်နေ့အမှီရော အိမ်ပြန်ရောက်နိုင်မလားဆိုတာ စိတ်၀င်တစားကြည့်ရှုရမှာဖြစ်ပါတယ်။
