MWC 2025 ပွဲက အဆန်းပြားဆုံး စမတ်ဖုန်းများ
နည်းပညာထုတ်ကုန်ပြပွဲတွေထဲမှာ အကြီးဆုံးဖြစ်တဲ့ Mobile World Congress (MWC) ပွဲက နှစ်တိုင်းဆိုသလို ပရိသတ်တွေကို ဖမ်းစားနိုင်တဲ့ ထုတ်ကုန်တွေ တပုံကြီး ချပြနေကျပါ။
MWC 2025 မှာလည်း စက်ရုပ်တွေကနေ စမတ်ဖုန်းတွေအထိ နည်းပညာထုတ်ကုန်သစ်တွေ ချပြခဲ့ပါတယ်။ ၄ ရက်လုံးလုံး တစ်ကမ္ဘာလုံးက စောင့်ကြည့်ရတဲ့ ထုတ်ကုန်အဆန်းတွေထဲမှာ အခုပြောမယ့်ဖုန်းတွေလည်း ပါပါတယ်။
(၁) သုံးခေါက်ချိုး Infinix flip ဖုန်း
Infinix က ဒီနှစ် MWC ပွဲမှာ Zero စီးရီး Mini Tri-Fold ဖုန်းတစ်မျိုး ပြသသွားပါတယ်။ ထူးခြားတာက ထောင်လိုက် သုံးဆစ်ချိုး ခေါက်နိုင်တဲ့ ဒီဇိုင်းဖြစ်ပြီး hinge ပတ္တာနှစ်ခုနဲ့ လာတာပါ။ ရိုးရိုးဖုန်းတစ်လုံးအရွယ်အစားကနေ လက်တစ်ဝါးအရွယ်ရောက်အောင် ခေါက်ချလို့ ရပါတယ်။ ကျောဘက်မှာ အလျားလိုက် dual camera setup သုံးထားပြီး တခြား အချက်အလက်တွေတော့ မသိရသေးပါဘူး။
(၂) အပါးဆုံးဖုန်း Tecno Spark Slim
5.75mm ပဲ ထူတဲ့ ကမ္ဘာ့အပါးဆုံးဖုန်းကို Tecno က ချပြလိုက်ပါတယ်။ ဘက်ထရီပါဝါ 5200mAh သုံးထားပြီး ဒီလောက်ပါးအောင် ဖန်တီးနိုင်တာ ချီးကျူးစရာပါ။ Tecno Spark Slim မှာ ၆.၇၈ လက်မ 3D Curved AMOLED display နဲ့ လာပြီး 144Hz refresh rate ပါပါတယ်။
ကျောဘက် အလျားလိုက်ကင်မရာအိမ်ထဲမှာ 50MP ကင်မရာနှစ်လုံးကို အဖြူရောင် LED မီးနဲ့ အလှဆင်ထားတာပါ။ ဒီဖုန်းက ဈေးကွက်ထဲဝင်မဝင် မသေချာပေမယ့် ဈေးကွက်ထဲ ရောက်ရင်တော့ အပါးဆုံးရောင်းတန်းဝင် Slim ဖုန်း ဖြစ်လာနိုင်ပါတယ်။
(၃) ကင်မရာတစ်လုံးလို သုံးနိုင်မယ့် ဖုန်း
Nubia တံဆိပ် Focus 2 Ultra ဖုန်းက zoom level ကို လက်နဲ့ လှည့်ပြီး manual ချိန်နိုင်တဲ့ physical rotating lens တပ်ထားတဲ့ ဖုန်းပါ။ f/1.47 aperture ပါ 50MP sensor နဲ့ လာပြီး ပရော်ဖက်ရှင်နယ် ကင်မရာတစ်လုံးလို ဖြုတ်တပ်နိုင်တဲ့ ကင်မရာ grip ပါ support ပေးထားပါတယ်။
တခြား spec တွေက သိပ်မမြင့်ပေမယ့် ပေါင် ၃၀၀ ဈေးနဲ့ ဝင်လာမယ့် ဒီဘတ်ဂျက်ဖုန်းက ကင်မရာကလိချင်သူတွေအကြိုက် တန်ဖိုးသင့်ထုတ်ကုန် ဖြစ်လာမှာပါ။
(၄) ဆိုလာစွမ်းအင်သုံး Infinix ဖုန်း
MWC 2025 မှာ နောက်ထပ် ဆန်းတဲ့ ဖုန်းက Infinix ရဲ့ ဆိုလာစွမ်းအင်သုံး concept ဖုန်းပါ။ perovskite solar cells သုံးထားလို့ ပုံမှန် ဆီလီကွန်ဆဲ်တွေထက် ပိုပါးပြီး စွမ်းအင်လည်း ပိုထိရောက်မှု ပိုပါတယ်။
ဖုန်းအပူမလွန်အောင် စွမ်းအင်ထိန်းညှိပေးမယ့် Maimum Power Point Tracking စနစ်လည်း ထည့်ပေးထားပါတယ်။ ဆိုလာအားသွင်းစနစ် 2W ပဲ ထွက်လို့ လက်ရှိသုံးနေတဲ့ charging တွေကို ယှဉ်မရပေမယ့် concept အနေနဲ့တော့ အတော်လေး စိတ်ဝင်စားဖို့ကောင်းတဲ့နည်းပညာပါပဲ။
