သူဌေးတွေအတွက် ဒူဘိုင်းမှာ ဖွင့်လိုက်တဲ့ iPhone ဆိုင်

သူကြွယ်တွေနေတဲ့ မြို့မှာ သူဌေးတွေပဲ ဝယ်ကိုင်နိုင်မယ့် ဖုန်းအရောင်းဆိုင်တစ်ဆိုင် ပေါ်လာပါတယ်။

luxury brand တွေနဲ့ နာမည်ကြီးတဲ့ Caviar က ဒူဘိုင်း Tamani Arts Tower မှာ သူ့ရဲ့ ပထမဆုံး showroom ဖွင့်လိုက်တာပါ။ Caviar ဆိုတာက တန်ဖိုးကြီးဖုန်းတွေကို ကျောက်မြတ်ရတနာနဲ့ ရှားပါးသတ္ထုတွေ သုံးပြီး luxury ဖုန်းဖြစ်အောင် ဖန်တီးနေတဲ့ ကုမ္ပဏီပါ။

အရင်က Caviar ရဲ့ customize ထုတ်ကုန်တွေကို ပါတနာစတိုးတွေကနေပဲ ရောင်းခဲ့တာ ဖြစ်ပြီး အခုတော့ ကိုယ်ပိုင် showroom နဲ့ ဖုန်းစရောင်းလာတာ ဖြစ်ပါတယ်။ ဒီ showroom က ဈေးကွက်ထဲ ရောင်းနေတဲ့ iPhone တွေထက် အဆပေါင်းများစွာ ပိုဈေးမြောက်တဲ့ custom အထူးထုတ် iPhone တွေ ရောင်းချသွားမှာပါ။

Caviar ရဲ့ showroom မှာ နောက်ဆုံးထွက် ဒေါ်လာ ၁၄၆၃၀ တန် iPhone 16 Pro Max Tourbillon Carbon Gold သစ်လည်း မိတ်ဆက်ခဲ့ပါတယ်။ tourbillion နာရီစက်တစ်လုံးရဲ့ ဒီဇိုင်းနဲ့ ပေါင်းထားတဲ ဒီဖုန်းအပြင် ရွှေသားနဲ့ပဲ ထုတ်ထားတဲ့ Ultra Gold iPhone 15 Pro Max လည်း ပြသခဲ့ပါတယ်။