ရုရှားကို မြန်မာလုပ်သား ၂၄ ဦး စတင်စေလွှတ်
ရန်ကုန်၊ မတ် ၆
ရုရှားနိုင်ငံကို မြန်မာအလုပ်သမား ၂၄ ဦး စတင်စေလွှတ်လိုက်ကြောင်း နစက အလုပ်သမားဝန်ကြီးဌာနကနေ သိရပါတယ်။
နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင် ရုရှားနိုင်ငံကို ရောက်ရှိနေချိန်မှာ ဝန်ကြီးဌာနဘက်က Pilot Project အနေနဲ့ မတ်လ ၅ ရက်နေ့မှာ စေလွှတ်ခဲ့တာလည်း ဖြစ်ပါတယ်။
မြန်မာလုပ်သားများအတွက် အလုပ်အကိုင်အခွင့်အလမ်းတွေ ရရှိစေဖို့နဲ့ လုပ်ခလစာ ပိုမိုကောင်းမွန်တဲ့ နိုင်ငံတွေထံ လုပ်သားစေလွှတ်ခြင်းဖြင့် လုပ်သားဈေးကွက် တိုးချဲ့ရှာဖွေနိုင်ဖို့ ရည်ရွယ်စေလွှတ်ခဲ့တာလို့ ဆိုပါတယ်။
ပြည်ပအလုပ်အကိုင်အကျိုးဆောင် လိုင်စင်ရအေဂျင်စီ Vista International Co., Ltd ရဲ့ အစီအစဉ်နဲ့ ရုရှား Join-Stock Company ‘Inturd’ Co., Ltd ထံ ကျွမ်းကျင်မြန်မာလုပ်သား ၄၅ ဦးအနက် ကနဦးအစီအစဉ်နဲ့ လုပ်သား ၂၄ ဦးကို စေလွှတ်ခဲ့တာပါ။
လုပ်သားတွေ စေလွှတ်နိုင်ရေးအတွက် ဖေဖော်ဝါရီလ ၂၈ ရက်နေ့မှာ အလုပ်ရှင်၊ အလုပ်သမား အလုပ်ခန့်ထားမှုဆိုင်ရာ သဘောတူစာချုပ်ချုပ်ဆိုခြင်း၊ မတ်လ ၃ ရက်မှာ ပြည်ပအလုပ်အကိုင် လမ်းညွှန်သင်တန်းသင်ကြားပို့ချခြင်းနဲ့ ပြည်ပအလုပ်အကိုင် အလုပ်သမားသက်သေခံကတ် (OWIC) ကတ်တွေ ပြုလုပ်ပေးခဲ့ပါတယ်။
မြန်မာနိုင်ငံနဲ့ ရုရှား အလုပ်သမားနှင့် လူမှုကာကွယ်စောင့်ရှောက်ရေးဝန်ကြီးဌာနအကြား အလုပ်သမားရေးရာ ပူးပေါင်းဆောင်ရွက်ရေးဆိုင်ရာ နားလည်မှုစာချွန်လွှာ MOU ရေးထိုးနိုင်ဖို့ ညှိနှိုင်းဆောင်ရွက်နေတယ်လို့လည်းသိရပါတယ်။
လက်ရှိမှာ MOU လက်မှတ်ရေးထိုးထားတာ မရှိသေးပေမယ့်လည်း နှစ်နိုင်ငံချစ်ကြည်ရင်းနှီးမှုကို ရှေးရှုပြီး Pilot Project နဲ့ စေလွှတ်တာဖြစ်တယ်လို့ သိရပါတယ်။
သတင်း - BETV Business