#ပြည်တွင်းသတင်း
◼ကီလီဆိပ်ကမ်းအနီး သမ္ဗာန်ယာဉ်တိမ်းမှောက်ရာတွင် ပျောက်ဆုံးနေသူရုပ်အလောင်းပြန်တွေ့
ရန်ကုန်မြစ်ကီလီဆိပ်ကမ်းအနီး သမ္ဗာန်ယာဉ်တစ်စီးတိမ်းမှောက်ရာတွင် ပျောက်ဆုံးနေသူတစ်ဦး၏ ရုပ်အလောင်းကို ယနေ့(မတ် ၆ ရက်) နံနက် ၇ နာရီခန့်တွင် ကီလီဆိပ်ကမ်း၌ပြန်လည်တွေ့ရှိကြောင်း မေတ္တာအလင်းရောင်လူမှုကူညီရေးအသင်းထံမှသိရသည်။
"စဖြစ်ကတည်းကရှာဖွေရေးတွေဆက်တိုက်လုပ်ခဲ့တာ။ ဒီနေ့မနက်ကီလီဆိပ်ကမ်းမှာ လူသေ အလောင်းတွေ့တယ်ဆိုပြီးအကြောင်းကြားလို့ သွားရောက်ဆယ်ယူပြီး ရန်ကုန်ဆေးရုံကြီးကို ပို့ဆောင်ခဲ့ပါတယ်" ဟု အဆိုပါအသင်းမှတာဝန်ရှိသူတစ်ဦးက ပြောသည်။
သေဆုံသူမှာ အသက်(၁၇) နှစ်အရွယ်ရှိမောင်ဟိန်းဇာနည်ဦးဖြစ်ပြီး ရုပ်အလောင်းကို ရန်ကုန်ဆေးရုံကြီးသို့ပို့ဆောင်ထားကာ ၎င်း၏မိသားစုဝင်များလာရောက်ကြည့်ရှုပြီးဖြစ်ကြောင်း မေတ္တာအလင်းရောင်လူမှုကူညီရေးအသင်းထံမှသိရသည်။
ယခုလမတ် ၄ ရက်၊ မွန်းလွဲ ၂ နာရီ ၅၅ မိနစ်ခန့်တွင် သမ္ဗာန်မောင်းသူအပါအဝင်ခရီးသည် ၁၂ ဦး လိုက်ပါလာသောသမ္ဗာန်ယာဉ်တစ်စီးသည် ကီလီဆိပ်ကမ်းအနီးတွင်တိမ်းမှောက်ကာ ၁၁ ဦးအား အခင်းဖြစ်သည့်နေ့တွင် အသက်ရှင်လျက်ကယ်ဆယ်နိုင်ခဲ့ပြီး ရန်ကုန်ပြည်သူ့ဆေးရုံကြီးသို့ ပို့ဆောင်ခဲ့ကြောင်း မြန်မာနိုင်ငံမီးသတ်တပ်ဖွဲ့ကထုတ်ပြန်ထားသည်။
သတင်း - ပိုင်လေး
ဓာတ်ပုံ - မေတ္တာအလင်းရောင်လူမှုကူညီရေး
