" မသီတာအတွက် တစ်ခွက်
ဧရာဝတီမြစ်ကြီးအတွက် တစ်ခွက်
ပြန်မလာနိုင်တော့တဲ့
ဘော်ဒါအတွက် တစ်ခွက် " ဆိုပြီး
ချာလီနဲ့ ကျွန်တော် အရက်ခွက်တွေကို
ကိုင်မြှောက်ပြီး ဆုတောင်းရင်း
သောက်ခဲ့ ဖူးတာပေါ့။
ခု၊ ကျွန်တော်သောက်မယ့်
တတိယခွက်တိုင်းက ချာလီအတွက်ဖြစ်ရပြီ။
အေးစက်တောင့်တင်းနေတဲ့ ချာလီရဲ့
ဆေးထိုးအပ်တန်းလန်းနဲ့ ရုပ်ကလပ်ကို
လူတွေက ရှာတွေ့ခဲ့ကြသတဲ့လေ။
လက်မောင်းမှာ လက်တင်အမေရိက
တော်လှန်ရေး သမား သေနတ်ကိုင်ဆရာဝန်ရဲ့
ရုပ်ပုံလွှာကို မင်ကြောင်ထိုးထားတဲ့
ကျွန်တော့်သူငယ်ချင်း ချာလီ။
သူ့အခန်းလေးထဲမှာ
ခြေချစရာ နေရာမရှိအောင်
ပြည့်နှက်နေတဲ့စာအုပ်ပုံ ကြီးထဲက
အသိတရားလေးတစ်ခုတောင်
ချာလီ ရမသွားခဲ့တာ ဘာကြောင့်လဲလို့
ကျွန်တော် တွေးနေမိတယ်။ အဲ့ဒီ
ချောက်ကမ်းပါးကြီးထဲ ခုန်ချသွားရင်
လေထီးမပွင့်ပဲ အသက်ဆုံးရတယ်လို့
ကျွန်တော် အခါခါပြောလျှက်နဲ့ဗျာ ။
▪️ပါပီယွန် ( ဂွတ်ဘိုင်ချာလီ/မှ )
