၂၀၀၇ ခုနှစ်ဆိုတာ ဘောလုံးလောကရဲ့အကူးအပြောင်းကာလလို့ ပြောရမလားပဲ။ မြက်ခင်းစိမ်းတွေပေါ်မှာ ဩဇာသက်ရောက်မှု အတော်လေး ကြီးမားခဲ့တဲ့ ဂန္တဝင် ကတုံးကြီး ဇီးဒန်းက အနားယူသွားခဲ့ပြီ။ ရော်နယ်ဒို (ဒိုကြီး) တို့၊ ရော်နယ်ဒင်ညိုတို့က
လည်း အသက် ၃၀ ထဲဝင်လာကြပြီဖြစ်သလို၊ ဘရာဇီးလ်သားတွေရဲ့ထုံးစံအတိုင်း အောင်မြင်လာတဲ့နောက်ပိုင်းမှာ ဘောလုံးကို ကောင်းကောင်းမကန်ကြတော့ဘူး။
လူးဝစ်ဖီဂိုတို့၊ ရီဗယ်ဒိုတို့ဆိုတာလည်း အသက် ၃၅ ကျော်လာကြလို့ ခြေစွမ်းတွေက ထိုးကျနေပြီ။ ဆိုလိုတာက ဘောလုံးလောကအတွက် သွေးသစ်လောင်းပေးမဲ့ ပါရမီရှင်လူငယ်ခြေတက် ကစားသမားတွေ လိုအပ်နေချိန်ပေါ့။
အဲ့တုန်းက ခရစ်စတီယာနို ရော်နယ်ဒို၊ ဆံရှည်မက်ဆီတို့ဆိုတာလည်း တော-က်မဲ့မီးခဲ အရှိန်တရဲရဲ အဆင့်မှာပဲ ရှိနေသေးတယ်။ ဒီလိုနဲ့ စင်မြင့်ထက်ကိုရောက်လာတဲ့သူက ကာကာ။
ဘောလုံးသမားတစ်ယောက်ရဲ့ဥပဓိရုပ်မျိုး လုံးဝမရှိပဲ ပျိုမဒီတွေ အသဲစွဲ မင်းသားတစ်ယောက်ရဲ့ရုပ်ရည်မျိုးနဲ့ ဘရာဇီးလ်ကစားသမားတစ်ယောက်က အေစီမီလန်ကိုရောက်လာတော့ ပုရိသတွေတင်မကပဲ ဘဲလေးတွေရော၊ ဘဲကြီးတွေပါ စတင်သတိထားမိခဲ့ကြတယ်။ အဲ့တုန်းက ဘရာဇီးလ်ဘောလုံးမင်းသားက အသက် ၂၅ လောက်ရှိနေပြီ။
ဒါကြောင့် သူ့မှာ အရည်အသွေးတစ်ခုရှိတယ်ဆိုတာကို ပရိသတ်တွေက သိထားကြတယ်၊ ဒါပေမဲ့ ဘယ်လောက် အတိုင်းအတာထိ ခြေစွမ်းပြနိုင်လဲဆိုတာကို မခန့်မှန်းနိုင်ကြသေးဘူး။ ကာကာအတွက် အရည်အချင်းစစ် စာမေးပွဲ လိုအပ်နေတယ်။
အဲ့စာမေးပွဲက ၂၀၀၆ ခုနှစ် ချန်ပီယံလိဂ်ပြိုင်ပွဲနဲ့အတူ ကာကာဆီကို ဆိုက်ဆိုက်မြိုက်မြိုက်ပဲ ရောက်လာပါလေရော။ အဲ့ဒီအချိန်က ရွှေထီးဆောင်း သရဲနီတို့နဲ့ ချန်ပီယံလိဂ် ဆီမီးဖိုင်နယ်မှာ တွေ့ကြတယ်။
ပွဲစပြီး သိပ်မကြာခင် ၅ မိနစ်လောက်မှာပဲ ယူနိုက်တက်မှာ ခြေစွမ်းပြနေတဲ့ ရော်နယ်ဒိုက အဖွင့်ဂိုးကို ကောက်သွင်းလိုက်တယ်။ ဒါပေမဲ့ ၂၂ မိနစ်မှာ ကာကာက မီလန်အတွက် ချေပဂိုးပြန်သွင်းပေးခဲ့တယ်။ ဒီဂိုးက သိပ်တော့ မထူးဆန်းပါဘူး။
ထူးဆန်းတဲ့ဂိုးက ပွဲချိန် ၃၇ မိနစ်မှာ ဖြစ်ပျက်သွားတာ။ ယူနိုက်တက်ဘက် ဂိုးစည်းနားမှာ ဘောလုံးရသွားတဲ့အချိန် ကာကာက ဘောလုံးကိုခေါင်းတိုက်ပြီး ဖလက်ချာကို ကျော်ပြေးတယ်။ ဘောလုံးက ခုန်ဆွခုန်ဆွနဲ့ ဖြစ်နေတုန်း Heinze က ဝင်ဖြ-တ်လုဖို့ ကြိုးစားတယ်။
အဲ့တာလည်း မရဘူး၊ ဘရာဇီးစတိုင်လ်နဲ့ ဘောလုံးကို တော့ယူပြီး ညာဘက်ကို ထပ်လှည့်ထွက်တယ်၊ အနောက်ကနေ အီဗရာဝင်လာတော့ ဘောလုံးကို ခေါင်းနဲ့ကုန်းတိုက်ပြီး ဖြ-တ်ကျော်သွားပါလေရော။ ပြီးတာနဲ့ ဂိုးသမား ဗန်ဒါဆာကြီးနဲ့ နှစ်ယောက်တည်း တွေ့တဲ့အချိန် အေးအေးဆေးဆေးပဲ ကန်သွင်းယူလိုက်တယ်။
အီဗရာနဲ့ Heinze တို့ကတော့ ကာကာရဲ့ပြုစားမှုမှာ အချင်းချင်း ဝင်တိုက်မိပြီး လဲကျသွားလို့ ဒီတိုင်းရပ်ကြည့်နေရုံကလွဲပြီး တခြားဘာမှမလုပ်နိုင်ခဲ့.....။
ဒီနေ့မှာတော့ ကာကာရဲ့အဆိုပါ သမိုင်းဝင်သွင်းဂိုးက ၁၇ နှစ်တိတိ ပြည့်သွားခဲ့ပါပြီ။
Credit to football corner
