" လူမှားပြီး ချစ်မိတာတဲ့ မှားပြီး အချစ်ခံရတာတဲ့ "
ရေတွင်းပျက်ကြီးနားက သိပ်လှပြီး တခြားအပင်တွေထက် စောပြီးပွင့်တဲ့ ကံ့ကော်ပင်ကြီးတစ်ပင် ။ ကံ့ကော်ပင်ကြီးနဲ့ယှဥ်တွဲပြီး ခံစားရမှာတော့ နုပျိုလန်းဆန်းနေတဲ့ ဆယ်ကျော်သက်ကလေးတွေရဲ့ ခံစားချက်တွေ ။
အဆော့သန်တဲ့ ကောင်လေးကြောင့် သရဲရှိပါတယ်ဆိုပြီး နာမည်ကြီးခဲ့ရတဲ့ ကံ့ကော်ပင်ကြီး ။ ရပ်ကွက်ထဲက စကားဖွာကြတဲ့သူတွေကြောင့် ရေတွင်းထဲမှာ နဂါးရှိပါတယ်ဆိုပြီး သတင်းကြီးသွားခဲ့တဲ့ ရေတွင်းပျက်ကြီး ။
သူငယ်ချင်းခြောက်ယောက်ရဲ့ ငယ်ဘဝဇာတ်လမ်းကို ရေးဖွဲ့ထားတဲ့ ဝတ္ထုတစ်ပုဒ် ။ကျောင်းသားဘဝရဲ့ လွတ်လပ်မှုတွေ ပျော်ရွှင်မှုတွေ ဗရုတ်ကျမှုတွေကို ပြန်ခံစားရပြီး လွမ်းဆွတ်ခဲ့ရတယ် ။
ကိုယ်ကြိတ်ပြီးသဘောကျနေတဲ့သူအတွက်
ကျောင်းစာတွေ ဝိုင်းကူးပေးရတာဟာလည်း ဆယ်ကျော်သက်ဘဝမှာ ရင်ခုန်ပျော်ရွှင်ခဲ့ရတဲ့ အလုပ်တစ်ခုပဲမဟုတ်လား ။
ကဗျာတွေဝါသနာပါတဲ့ စိုးချစ်ဆိုတဲ့ ကောင်ကလေးကို ကြိတ်ပြီး ချစ်ခဲ့ရတဲ့ သိပ်မလှတဲ့ ကောင်မလေး ခင်မေတင့်
သူတို့နှစ်ဦးကြားထဲ အချစ်ဆိုတဲ့အရာ
ဝင်ရောက်လာတဲ့အခါ ဘယ်လိုဆက်ဖြစ်ကြမှာလဲ ။
ကံ့ကော်ဦးတစ်ပွင့်နဲ့ ရှုပ်ထွေးသွားခဲ့တဲ့ နုပျိုတဲ့
အချစ်တစ်ခု ။ ရင်ခုန်သံတစ်ပုဒ် ။
ရင်ခုန်စိတ်ကစားတတ်စအရွယ်မှာ လူတိုင်းကြုံခဲ့
ရတဲ့ အချစ်ဆိုတဲ့အရာအကြောင်းကို လူငယ်ဆန်ဆန် ပေါ့ပေါ့ပါးပါးနဲ့ ရယ်စရာလေးတွေပါအောင် ရေးဖွဲ့ထားတဲ့ ဝတ္ထုတစ်ပုဒ်ပေါ့ ။
မှားပြီး အချစ်ခံရတဲ့ ကောင်မလေး နဲ့
ဟန်ဆောင်ပြီး ချစ်လိုက်ရတဲ့ ကောင်ကလေးမှာ
ဘယ်သူ့ကို သနားကြမှာလဲ ။
" ကံ့ကော်ပွင့်တွေ မပွင့်နိုင်တော့တာနဲ့ပဲ အချစ်တွေ ပြန်လည် မရှင်သန်နိုင်တော့ဘူးလို့ ယူဆနေသလားဟင် "
#ကံ့ကော်နီ #မင်းလူ
