#ယနေ့ထုတ်သတင်းစာ_နိုင်ငံတကာသတင်း
◼ အွန်လိုင်းလိမ်လည်မှုလုပ်ငန်းများမှ ကယ်ထုတ်ထားသူ သက်ဆိုင်ရာ နိုင်ငံသားများအားခေါ်ယူရန် ပြည်ပအစိုးရများကို ထိုင်း တိုက်တွန်းမည်
မြန်မာနိုင်ငံအတွင်းရှိ အွန်လိုင်းလိမ်လည်မှုလုပ်ငန်းများမှ ကယ်ထုတ်ထားသော သက်ဆိုင်ရာ နိုင်ငံသားများအား ပြန်လည်ခေါ်ယူရေးအတွက် အခြားနိုင်ငံများမှ အစိုးရများနှင့် အားချင်း အဆက်အသွယ်လုပ် တိုက်တွန်းရန် နိုင်ငံခြားရေးဝန်ကြီးဌာနကို ညွှန်ကြားထားကြောင်း ထိုင်းအစိုးရ ဒုတိယဝန်ကြီးချုပ်နှင့်ကာကွယ်ရေးဝန်ကြီး ဖူသမ်ဝီချာယာချိုင်းက ဖေဖော်ဝါရီ ၂၅ ရက်တွင် ထုတ်ဖော်ပြောကြားလိုက်သည်။
မြန်မာဘက်ခြမ်း အွန်လိုင်းလိမ်လည်မှုလုပ်ငန်းများမှ လူပေါင်း ၇ဝဝဝ ခန့်ကို ကရင်ပြည်နယ် ဘီဂျီအက်ဖ်တပ်ဖွဲ့က ကယ်ထုတ် ထားပြီးနောက် ထိုင်းကာကွယ်ရေးဝန်ကြီးက အထက်ပါအတိုင်း ပြောကြားခဲ့ခြင်းဖြစ်သည်။
ဘီဂျီအက်ဖ်အနေဖြင့်၎င်းတို့ခေါ်ထုတ်ထားသူများကို ဆက်လက်လက်ခံထိန်းသိမ်းပေးထားရန် အခက်အခဲရှိလာနိုင်သည်ဖြစ်ရာ ၎င်းတို့ထိန်းသိမ်းထားသူအားလုံးကို တစ်ကြိမ်တည်းဖြင့်ပြန်လွှတ်ခဲ့ပါက ထိုင်းနိုင်ငံဘက်သို့ အစုအပြုံလိုက်ပြေးလွှားဝင်ရောက်လာနိုင်ကြောင်း ထိုင်းကာကွယ်ရေးဝန်ကြီးက ပြောကြားထားသည်။
သို့ဖြစ်ရာ မြန်မာဘက်ခြမ်း အွန်လိုင်းလိမ်လည်မှုလုပ်ငန်းများမှ ကယ်ထုတ်ထားသူ ၇ဝဝဝ ခန့်ကိုပြန်လည်ခေါ်ယူရေးအတွက် သက်ဆိုင်ရာနိုင်ငံများ မှ အစိုးရများကို တိုက်တွန်းရန် နိုင်ငံခြားရေးဝန်ကြီးဌာနအား ညွှန်ကြားထားကြောင်း ထိုင်းကာကွယ်ရေးဝန်ကြီးက ထုတ်ဖော်ပြောကြားထားသည်။
ထိုင်းနိုင်ငံခြားရေးဝန်ကြီးမာရစ်အနေဖြင့် မြန်မာဘက်ခြမ်းရှိ သက်ဆိုင်ရာ နိုင်ငံသားများကို ပြန်လည်ခေါ်ယူရေးအတွက် သက်ဆိုင်ရာပြည်ပအစိုးရများကို ဖေဖော်ဝါရီ ၂၇ ရက်တွင် အသိပေးတိုက်တွန်းမည်ဖြစ်ကြောင်း ထိုင်းကာကွယ်ရေးဝန်ကြီးအဆိုအရ သိရသည်။
လက်ရှိအချိန်တွင် မြန်မာဘက်ခြမ်းအွန်လိုင်းလိမ်လည်မှုလုပ်ငန်းများမှ ကယ်ထုတ်ထားသူများအနက် တရုတ်နိုင်ငံသား ၆ဝဝ ကျော်ကို တရုတ်အစိုးရကပြန်လည်ခေါ်ယူထားပြီးဖြစ်သည်။
ကျန်ရှိဆဲ တရုတ်နိုင်ငံသားများကို ဆက်လက်လွှဲပြောင်းအပ်နှံရေးအတွက် မကြာမီကာလအတွင်း ထိုင်း၊ တရုတ်နှင့် မြန်မာတို့အကြား သုံးနိုင်ငံဆွေးနွေးပွဲကျင်းပမည်ဖြစ်ကြောင်း ထိုင်းကာကွယ်ရေးဝန်ကြီးက ပြောကြားထားသည်။
