ကိုဗစ်ချေးငွေ ပြန်မဆပ်သူစာရင်းကို သတင်းစာတွင် ကြေညာမည်
ရန်ကုန်၊ ဖေဖော်ဝါရီ ၂၅
ကိုဗစ်-၁၉ ရန်ပုံငွေမှ ချေးငွေရယူပြီး ပြန်လည်ပေးဆပ်ခြင်းမရှိတဲ့ ကုမ္ပဏီ/လုပ်ငန်းစာရင်းကို နိုင်ငံပိုင်သတင်းစာမှာ ကြေညာမယ်လို့ ကိုဗစ်-၁၉ ကြောင့် ဖြစ်ပေါ်လာနိုင်သည့် စီးပွားရေးသက်ရောက်မှုများအပေါ် ကုစားရေးလုပ်ငန်းကော်မတီက အသိပေးလာပါတယ်။
ကုမ္ပဏီ/လုပ်ငန်းအမည်၊ လုပ်ငန်းရှင်အမည်၊ နေရပ်လိပ်စာအပြည့်အစုံကို ထည့်သွင်းပြီး သတင်းစာမှာ ဖော်ပြသွားမယ်လို့ ဆိုပါတယ်။
နေပြည်တော်ကော်စီနယ်မြေ၊ တိုင်းဒေသကြီးနဲ့ ပြည်နယ်အသီးသီးက ကိုဗစ်-၁၉ ရန်ပုံငွေမှ ၂၀၂၄ ခုနှစ်၊ ဒီဇင်ဘာလအထိ အတိုး၊ အရင်း လုံးဝမပေးဆပ်တဲ့ ကုမ္ပဏီ/လုပ်ငန်း ၄၈၆ ခုအထိ ရှိကြောင်းလည်း ထုတ်ပြန်ချက်အရ သိရပါတယ်။
လုပ်ငန်းကော်မတီအနေနဲ့ ကိုဗစ်-၁၉ ကြောင့် ထိခိုက်မှုရှိခဲ့တဲ့ စီးပွားရေးလုပ်ငန်းတွေကို ချေးငွေသက်တမ်း ၁ နှစ် (အတိုးနှုန်း ၁ ရာခိုင်နှုန်း)နဲ့ ၂၀၂၀ ပြည့်နှစ်၊ ဧပြီလမှ စတင်ကာ ချေးငွေတွေ ထုတ်ပေးခဲ့တာပါ။
ယခုအခါ ချေးငွေသက်တမ်း ၃ နှစ် ပြည့်မြောက်ကျော်လွန်ခဲ့ပြီဖြစ်လို့ ကုမ္ပဏီ/လုပ်ငန်းတွေကို ၂၀၂၄ ခုနှစ် ဇွန်လ ၃၀ ရက်န့အထိ ချေးငွေအရင်းနဲ့ အတိုးတွေကို အမြန်ဆုံးပေးဆပ်ဖို့ ဇွန်လ ၆ ရက်နေ့မှာ ကြေညာခဲ့ပါတယ်။
ဒါ့အပြင် အချိန်မီ လာရောက်ပေးဆပ်ခြင်းမရှိရင် လုပ်ငန်းတစ်ခုချင်းကို နိုင်ငံပိုင်သတင်းစာတွေကနေ ထုတ်ပြန်အသိပေးခြင်း၊ စီမံခန့်ခွဲမှုနည်းလမ်းအရ အရေးယူခြင်းတွေကို ဆက်လက်ဆောင်ရွက်သွားမယ်လို့လည်း အသိပေး ထုတ်ပြန်ထားပါတယ်။
