ရီးရဲလ်တို့ ဂိုးလိုအပ်နေချိန်မှာ ကယ်တင်ပေးခဲ့တာက ဝါရင့်ကြီး မိုဒရစ်ပါပဲ။ ကိုက် ၃၀ အကွာကနေ ကန်သွင်းယူပေးခဲ့ပြီး အသင်းကို အသက်ရှူချောင်စေခဲ့တာပါ။ ဘတ်ပီ၊ ဗင်နီရှပ်တို့ ဂိုးရဖို့အတွက် တိုင်ပတ်နေခဲ့ပြီး မိုဒရစ်ရဲ့ သွင်းဂိုးသာ မရခဲ့ဘူးဆိုရင် မလွယ်ဘူး။ ဂီရိုနာကလည်း ဂိုးမပေးရဖို့ကို တော်တော်လေး အားထုတ်နေခဲ့တာပါ။
မိုဒရစ်သွင်းသွားတာကလည်း ရှယ်ကြီး။ ရင်ဘတ်နဲ့ထိန်းတယ်၊ ဘောလုံးက မြေကြီးပေါ်ကျပြီး ပြန်တက်လာချိန်မှာ အပိုင်ကန်ထည့်သွားတာ။ လှချက်ပဲ။ ဂိုးသမားလည်း ဘာမှမတတ်နိုင်တော့ဘူး။ ဘောလုံးက သူ့အနားရောက်လာမှ ပိုပိုဝေ့သွားတာလည်း ပါတယ်။ အသက် ၃၈ နှစ်အရွယ် ကစားသမားကြီးဟာ အရေးပါတဲ့ ဦးဆောင်ဂိုးကို လှလှပပသွင်းယူပေးခဲ့တာပါ။
ဗယ်လ်ဗာဒီနဲ့ ဘယ်လင်ဟမ်တို့ မကစားနိုင်တဲ့အချိန် ကွင်းလယ်ကို သူ ဦးဆောင်ခဲ့ရတယ်။ သူ လူစားမလဲခင်အချိန်ထိ အကောင်းဆုံးလုပ်ပြသွားတာပါ။ ဘတ်ပီအတွက် ကွင်းလယ်ကနေ ကန်တင်ပေးခဲ့တဲ့ အလုံးဆိုလည်း ကောင်းလွန်းတယ်။ ဘတ်ပီရဲ့ ကန်ချက်ကို ဂိုးသမားသာ မမိခဲ့ရင် မိုဒရစ်ဟာ လှပတဲ့ ဖန်တီးမှုတခုပါ ရခဲ့ဦးမှာပါ။ ရီးရဲလ်တို့ ၂-၀နဲ့ နိုင်ခဲ့ပြီး နောက်တဂိုးကို ဗင်နီရှပ်က သွင်းပေးခဲ့ပါတယ်။
