#ပြည်တွင်းသတင်း
◼UWSP/UWSA က ယခုနှစ်အတွင်းလုပ်ဆောင်မည် အချက်ကိုးချက်ထုတ်ပြန်
UWSP/UWSA က ယခုနှစ်အတွင်း အဓိကလုပ်ဆောင်မည့်အချက်ကိုးချက်ကိုထုတ်ပြန်ခဲ့ကြောင်း “၀” အခြေစိုက် သတင်းမီဒီယာများက ယမန်နေ့(ဖေဖော်ဝါရီ ၁၉ ရက်) တွင်ဖော်ပြထားသည်။
ပြီးခဲ့သည့် ၂၀၂၄ ခုနှစ် ဗဟိုလုပ်ငန်းနှစ်ချုပ်အစည်းအဝေးကို UWSP/UWSA က ငါးရက်ကြာကျင်းပပြုလုပ်ပြီးနောက် ရှေ့ဆက်လုပ်ဆောင်မည့် အချက်ကိုးချက်ပါ လုပ်ငန်းစဉ်များကို ဆက်လက် ချမှတ်နိုင်ခဲ့ကြောင်း အဆိုပါသတင်းများတွင်ဖော်ပြထားသည်။
ယင်းအချက်များမှာ နိုင်ငံရေးစနစ်ပြုပြင်ပြောင်းလဲမှုများ ဆက်လက်အကောင်အထည်ဖော်ခြင်း၊ မန်ဆိုင်သတ္တုတွင်းပြန်လည်ဖွင့်လှစ်ခြင်း၊ တရားမဝင်လုပ်ငန်းများအား အချိန်နဲ့တပြေးညီထိန်းချုပ်စိစစ်ခြင်း၊ နိုင်ငံခြားဆက်ဆံရေးတိုးမြှင့်ခြင်း၊ သဘာဝစွမ်းအင်များဖြင့်လျှပ်စစ်ဓာတ်အားထုတ်လုပ်မှုတိုးမြှင့်ခြင်း၊ "တရုတ်-မြန်မာ စီးပွားရေးလမ်းကြောင်း" ကိုအသုံးပြု၍ စီးပွားရေးဖွံ့ဖြိုးတိုးတက်မှု အားဖြည့်ခြင်း၊ စိုက်ပျိုးရေးလုပ်ငန်းများကိုမြှင့်တင်၍ တောင်သူများ၏ဝင်ငွေတိုးမြှင့်ခြင်း၊ ပညာရေးစနစ်ပြုပြင် ပြောင်းလဲမှုဆောင်ရွက်ခြင်း၊ ကျန်းမာရေးစနစ်တိုးတက်စေရန် ရင်းနှီးမြှုပ်နှံမှုများပြုလုပ်ခြင်း စသည့် အချက်များချမှတ်နိုင်ခဲ့ကြောင်း သိရသည်။
ဗဟိုကော်မတီဒုဥက္ကဋ္ဌပေါင်းအိုက်ခမ်းက အစီရင်ခံစာတင်ပြရာတွင် "နိုင်ငံတော်၏ရည်ရွယ်ချက်ကို မှန်ကန်စွာ၊ တိကျစွာဆောင်ရွက်ရန်၊ ၂၀၂၅ ခုနှစ်တွင် စိန်ခေါ်မှုများ ရှိသော်လည်း တိုင်းပြည်နှင့် ပြည်သူတို့အတူတကွအားတင်း၍ အနာဂတ်ကိုတည်ဆောက်သွားမည်" ဟု ပြောကြားခဲ့သည်။
အဆိုပါ အစည်းအဝေးပွဲသို့ UWSA မှစစ်ဦးစီးချုပ်ပေါက်ယိုချမ်း၊ ဒုတိယ စ်ဦးစီးချုပ် ဦးကျောက်ကျုံတန်၊ ၁၇၁ စစ်ဒေသ နိုင်ငံရေးမှူးတာ့ဆမ်ရုန်း၊ တရားစီရင်ရေးဌာန အတွင်းရေးမှူး လီအိုက်ရှင်း၊ တပ်မဟာမှူးဗဟိုအလုပ်မှုဆောင်ကော်မတီဝင် ပေါက်ကျွင်းလုံ၊ ၁၇၁ စစ်ဒေသ စစ်ဦးစီးမှူး လီထန်းပေါက်နှင့် အခြားသက်ဆိုင်ရာအရာရှိများ တက်ရောက်ခဲ့ကြောင်းသိရသည်။
လက်ရှိမြန်မာနိုင်ငံအနှံ့အပြားတွင် တပ်မတော်နှင့်တိုင်းရင်းသားလက်နက်ကိုင်အဖွဲ့များကြား တိုက်ပွဲများဖြစ်ပွားနေသော်လည်း “UWSA” သည် တပ်မတော်နှင့် တိုက်ပွဲများဖြစ်ပွားခြင်းမရှိဘဲ ကြားနေဝါဒကိုကျင့်သုံးလျက်ရှိကြောင်းထုတ်ပြန်ထားသည်။
