နိုင်ငံပိုင်သယံဇာတတွေကို ဥပဒေမဲ့ခိုးထုတ်တဲ့လုပ်ငန်းတွေကနေ ရှောင်ရှားကြဖို့ လုပ်ကိုင်နေကြတဲ့ပြည်သူတွေကို နစက သတိပေး
(ပြည်တွင်း)ဖေဖော်ဝါရီ ၂၀

ပြည်သူတွေအနေနဲ့ အကြမ်းဖက်အုပ်စုတွေနဲ့ လက်နက်ကိုင်သောင်းကျန်းသူတွေကို အားပေးထောက်ပံ့မှုပြုနေတဲ့ ဥပဒေမဲ့သယံဇာတခိုးထုတ်တဲ့ လုပ်ငန်းတွေမှာ ပါဝင်လုပ်ကိုင်တာတွေကနေ အထူးသတိပြုရှောင်ရှားကြဖို့ နစက က နှိုးဆော်ထားပါတယ်။နိုင်ငံရဲ့ သယံဇာတပစ္စည်းတွေကို မတော်လောဘနဲ့ ဥပဒေမဲ့ ခိုးထုတ်နေကြပြီး အကြမ်းဖက်အုပ်စုတွေနဲ့ လက်နက်ကိုင်သောင်းကျန်းသူတွေကို ထောက်ပံ့ နေမှုတွေကို နိုင်ငံတော်အနေနဲ့ စိစစ်ဖော်ထုတ်ပီဲး လိုအပ်သလို တိုက်ဖျက်ဆောင်ရွက်သွားမယ်လို့လည်း ဆိုပါတယ်။

မတော်လောဘနဲ့ ဥပဒေမဲ့ နိုင်ငံပိုင်သယံဇာတ ပစ္စည်းတွေကို ခိုးထုတ်ကြရာမှာ ဥပဒေကို မသိနားမလည်တဲ့အပြင် ဆင်းရဲနွမ်းပါးတဲ့ ဒေသခံ ပြည်သူတွေကို ငွေကြေးနဲ့ဆွဲဆောင်စည်းရုံးကာ အလုပ်လုပ်ကိုင်စေတာကိုလည်း တွေ့ မြင်နေရတယ်လို့ နစက ကပြောပါတယ်။

နိုင်ငံတော်အတွင်းက ဒေသအချို့မှာ ဖြစ်ပေါ်နေတဲ့ အကြမ်းဖက် တိုက်ခိုက်မှုတွေ၊ လက်နက်ကိုင်သောင်းကျန်းမှုတွေကို အခွင့်ကောင်းယူကာ မတော်လောဘ စီးပွားရေးသမားတွေက နိုင်ငံပိုင်သယံဇာတပစ္စည်းတွေကို ဥပဒေမဲ့ခိုးထုတ်နေကြပြီး အကြမ်း ဖက်အုပ်စုတွေကိုထောက်ပံ့တာ၊ လက်နက်ကိုင်သောင်းကျန်းသူတွေကို ထောက်ပံ့တာတွေကို လုပ်ဆောင်နေကြတယ်လို့လည်း ပြောဆိုထားပါတယ်။

ခုလို လုပ်ကိုင်တာဟာ အကြမ်းဖက်မှုတိုက်ဖျက်ရေးဥပဒေအရ အကြမ်းဖက်မှုကို အားပေးမှုမြောက်ပြီး ဥပဒေမဲ့ ခိုးထုတ်မှုတွေမှာ ဝင်ရောက်လုပ်ကိုင်နေကြတဲ့ ပြည်သူတွေ သတိပြုကြဖို့လိုတယ်လို့လည်း နစက က သတိပေးထားပါတယ်။

နိုင်ငံတော်ဟာ နိုင်ငံတော်မှာရှိတဲ့ မြေအားလုံး၊ မြေပေါ်မြေအောက်၊ ရေပေါ်ရေအောက်နဲ့ လေထုအတွင်းက သယံဇာတပစ္စည်းအားလုံးကို ပင်ရင်းပိုင်ရှင်ဖြစ်တယ်လို့ ဖွဲ့စည်းပုံအခြေခံဥပဒေမှာ အတိအလင်းပြဋ္ဌာန်းထားတယ်လို့ နစက ပြောပါတယ်။

ဒါ့အပြင် နိုင်ငံပိုင်သယံဇာတပစ္စည်းတွေကို စီးပွားရေးအင်အားစုတွေက ထုတ်ယူသုံးစွဲတာကို ကွပ်ကဲကြီးကြပ်နိုင်ဖို့ လိုအပ်တဲ့ ဥပဒေ ပြဋ္ဌာန်းရမယ်လို့ အခြေခံဥပဒေ ပြဋ္ဌာန်းထားချက်နဲ့အညီ နိုင်ငံပိုင်သယံဇာတပစ္စည်းတွေရဲ့ သက်ဆိုင်ရာကဏ္ဍအလိုက် ဥပဒေတွေကိုလည်း ပြဋ္ဌာန်းထားရှိပြီး သယံဇာတထုတ်ယူတာ လုပ်ငန်းတွေကို သက်ဆိုင်ရာဥပဒေတွေနဲ့အညီ ဆောင်ရွက်ခွင့်ပြုထားတယ်လို့ နစက က သတင်းထုတ်ပြန် ပြောဆိုထားပါတယ်။