ပုသိမ်ကြီးမြို့တွင် အမည်မသိအမျိုးသား (၂) ဦးမှ မော်တော်ယာဉ်ပိုင်ရှင်အမျိုးသားကို ဓားဖြင့်ထိုးပြီး၊ ယာဉ်နှင့် ပိုက်ဆံအိတ်တို့ကို လုယူသွား
ဖေဖော်ဝါရီ ၁၃
မန္တလေးတိုင်းဒေသကြီး၊ ပုသိမ်ကြီးမြို့၊ မြကျောက်ဘုရား YANKON စားသောက်ဆိုင်အနီးတွင် အမည်မသိအ မျိုးသား (၂) ဦးမှ မော်တော်ယာဉ်ပိုင်ရှင်အမျိုးသားတစ်ဦးကို ဓားဖြင့်ထိုးပြီး၊ ယာဉ်၊ ဖုန်းနှင့် ပိုက်ဆံအိတ်တို့ကို လုယူသွားကြောင်း သိရသည်။
ယင်းဖြစ်စဉ်မှာ ဖေဖော်ဝါရီလ ၁၁ ရက် ည ၁၀ နာရီအချိန်ခန့်တွင် မန္တလေးမြို့ ၃၈ လမ်း၊ ၇၆×၇၈ လမ်းကြားတွင် မော်တော်ယာဉ်ပိုင်ရှင် ဦးညွှန့်ဝင်းမှ လမ်းဘေးသို့ အပေါ့သွားစဉ် ၎င်းနောက်မှ မော်တော်ဆိုင်ကယ် (၂) စီးဖြင့် အမည်မသိအမျိုးသား (၄) ဦးရောက်ရှိလာပြီး ဦးညွှန့်ဝင်းကိုင်ဆောင်သည့် ဖုန်းကို ထိုအမည်မသိအမျိုးသားများမှ စစ်ဆေးရာ VPN ပါသည်ဟုပြောကာ မော်တော်ယာဉ်ပေါ်သို့ ထိုအမည်မသိအမျိုးသား (၄) ဦးအနက် (၂) ဦးမှာ ယာဉ်ပိုင်ရှင်နှင့်အတူ ပုသိမ်ကြီးဘက်သို့ မောင်းနှင်ပြီး ယာဉ်ပိုင်ရှင်မှာ အနောက်မှ ထိုင်စီးပြီး ကားစတီယာတိုင်လှည့်လိုက်သောကြောင့် ၎င်းကိုထိုးကြိတ်ပြီးနောက် ဓားဖြင့် ထိုးခဲ့ပြီး လမ်းဘေးသို့ထားခဲ့ကြောင်း သိရသည်။
“အမျိုးသား (၂) ဦးက ဆိုင်ကယ်တစ်ယောက်တစ်စီးစီးပြီး ကားနောက်ကိုလိုက်လာတယ်။ (၂) ယောက်က ကားပေါ်လိုက်လာတာ။ (၂) ယောက်ထဲက (၁) ယောက်က ကားမောင်းတယ်။ အဲ့ချိန်မှာ ကားပိုင်ရှင်က အနောက်ကနေ ကားစတီယာတိုင်ကို ဆွဲလှည့်လိုက်တာ။ သူကိုထိုးကြိတ်ပြီး၊ ဓားနဲ့ထိုးတာ” လို့ မြေပြင်အားသွားရောက်ကူညီသည့် မြို့ခံလူမှုကူညီရေးအသင်းက တာဝန်ရှိသူတစ်ဦးမှ ပြောသည်။
ထိုအမည်မသိအမျိုးသားများ၏ နှိပ်စက်မှုကြောင့် ယာဉ်ပိုင်ရှင်အမျိုးသား၏ မျက်ကွင်းများဖူးရောင်ညိုမဲပြီး၊ ညာဘက်နို့အုံအောက်ပေါက်ပြဲဒဏ်ရာ(၁) ချက်၊ ဘယ်ဘက်ခြေထောက်ပြတ်ရှဒဏ်ရာ (၁) ချက်တို့ ရရှိသောကြောင့် ၎င်းကို ပုသိမ်ကြီးမြို့ လခရလှည့်ကင်းတပ်ဖွဲ့မှ တွေ့ရှိပြီး ၎င်းကိုမြို့ခံလူမှုကူညီရေး အသင်းအား ဆက်သွယ်ပြီး မန္တလေးပြည်သူ့ဆေးရုံကြီးသို့ ပို့ဆောင်လိုက်ကြောင်း သိရသည်။
အဆိုပါလုယက်ခံရသည့် ယာဉ်မှာ MDY-15/9C-1964 Maxll-99 အဖြူရောင်ယာဉ်ဖြစ်ပြီး ယာဉ်ပိုင်ရှင်အမျိုးသားမှာ မဟာအောင်မြေမြို့တွင် နေထိုင်သည့် အသက်(၅၇) နှစ်အရွယ် ဦးညွှန့်ဝင်းဖြစ်ကြောင်း သိရသည်။
Photo – Credit
#သတင်းဟင်းလေးအိုးကြီး
