မျက်စိကျိန်းလောက်အောင် တောက်ပရမှာလား
===============================
စိတ်ဓာတ်ကျနေတဲ့ ကြယ်မင်းသမီးလေးက ခမည်းတော် ကြယ်မင်းကြီးကိုမေးတယ်။
“ဖေဖေ...သမီးကို လူတွေ ကြည့်မရကြဘူးထင်တယ်”
“ဘယ်လူတွေတုန်း သမီးရဲ့”
“ကြည့်မရတဲ့လူတွေပေါ့ ဖေဖေရယ်...”
“မုန်းတဲ့လူတွေပေါ့...”
“ဟုတ်...”
“သမီးစကားကို ဖေဖေ ပြန်ပြောကြည့်မယ်နော်...သမီးကို ကြည့်မရတဲ့လူတွေက ကြည့်မရဖြစ်နေလို့ သမီးစိတ်ညစ်နေတယ်။ ဟုတ်တယ်နော်...”
“ဟုတ်...”
“သမီးကို ကြည့်မရတဲ့လူ တစ်ယောက်ရှိတိုင်းရှိတိုင်းမှာ သမီးကို မျှော်ပြီးကြည့်ကြည့်နေတဲ့လူ အနည်းဆုံး ဆယ်ယောက်လောက်ရှိတယ်ဆိုတာရော သမီးသတိထားမိလား...”
“အဲဒါ ဘယ်သူတွေလဲ ဖေဖေ...”
”ထိပ်ဆုံးက အဖေပေါ့”
“...”
“နောက် သမီးရဲ့ သူငယ်ချင်းတွေ၊ မိတ်ဆွေတွေ၊ သမီးမသိပေမဲ့ သမီးကို ချစ်တဲ့လူတွေလေ။ အဲဒီလူတွေအတွက် သမီး တောက်ပရလိမ့်မယ်သမီး”
“ဟုတ်”
“သမီးကိုမုန်းသူတစ်ယောက်အတွက် မှေးမှိန်ပြတယ်ဆိုတာ သမီးကို တောက်ပစေချင်တဲ့ချစ်သူဆယ်ဦးအပေါ် တာဝန်မကျေရာကျတယ်သမီး”
“ဒါဆို သမီးကအမှောင်ကိုခွင်း အလင်းကိုဆောင်ရမယ်ပေါ့”
“အမှောင်ဆိုတာ သမီး ဘာကို ခေါ်ချင်တာလဲ။ အလင်းဆိုတာရော သမီး ဘာကို ခေါ်ချင်တာလဲ။”
“ဟိုလေ...”
“တိတိကျကျအဖြေမပေးနိုင်တာ အန္တရာယ်ရှိတယ်သမီး။ ဒါ့ပြင် သမီးအတွက် အမှောင်ဆိုတာ တချို့လူတွေအတွက် အလင်းဖြစ်နိုင်သလို၊ သမီးရဲ့အလင်းဟာ တချို့လူတွေအတွက် အမှောင်ဖြစ်နိုင်တာကို သတိပြုဖို့လိုတယ်။”
“ဒါဆို သမီးက ဘာလုပ်ရမှာလဲ။ မလိုသူတွေ မျက်စေ့ကျိန်းလောက်အောင် တောက်ပရမှာလား”
“ဒီလိုရှိတယ်သမီးရဲ့။ သမီးကို ချစ်တဲ့လူတွေက သမီးဘယ်လောက် စူးစူးရှရှထက်ထက်မြက်မြက် တောက်ပသည်ဖြစ်စေ မျက်စေ့ကျိန်းတယ်လို့ မထင်သလို သမီးကို မုန်းတဲ့လူတွေက သူတို့အတွက် သမီးဘယ်လောက် မှိန်ဖျော့ပေးသည်ဖြစ်စေ မျက်စေ့ကျိန်းပြီး ကြည့်မရဖြစ်မှာပဲ”
“အဲဒီတော့...”
“သရဖူတိုင်းမှာ သူ့အတာနဲ့သူ အလေးချိန်ရှိတယ် သမီး။ သမီးဟာကြယ်မင်းသမီးတပါးမို့ သမီးရဲ့ သရဖူမှာလည်း အလေးချိန်ရှိတယ်။ သမီးဟာ မွေးဖွားလာကတည်းက တောက်ပဖို့မွေးဖွားလာတာဖြစ်တယ်။ ကြယ်မှန်ရင်တောက်ပရမှာဖြစ်လို့ မတောက်ပတဲ့ကြယ်ဆိုတာ ကိုယ့်သရဖူကိုယ်မနိုင်တဲ့ကြယ်ပဲ။ သမီးဟာ ကိုယ့်သရဖူကိုယ်နိုင်တဲ့ကြယ်တစ်ပွင့်ဆိုတာ ဖေဖေယုံကြည်တယ်။ ဒါကြောင့် သမီးဟာ တောက်ပရလိမ့်မယ်။ တောက်ပမယ့်တောက်ပ မလိုသူတွေ မျက်စေ့ကျိန်းရုံလောက် မတောက်ပနဲ့။ ကန်းသွားလောက်အောင် တောက်ပလိုက်စမ်းပါ ချစ်သမီး။”
(တောက်ပရမှာကြောက်နေသော၊ ကြောက်ကြောက်နှင့်တောက်ပနေရသော လောကရှိ လုပ်ငန်းနယ်ပယ်အသီးသီး၊ ပညာရပ်အသီးသီး၊ နေရာအသီးသီးမှ ကြယ်ပွင့်အားလုံးသို့)
