အီလွန်မတ်စ် ကြွယ်ဝမှု ဒေါ်လာဘီလျံ ၄၀၀ အောက် ကျဆင်း
` OpenAI ကို ဝယ်ဖို့ လေသံပစ်နေတဲ့ အီလွန်မတ်စ်ရဲ့ ကြွယ်ဝမှု ဒေါ်လာဘီလျံ ၄၀၀ အောက် ပထမဆုံးအကြိမ် ကျဆင်းသွားခဲ့ပါတယ်။
အီလွန်မတ်စ်ရဲ့ ဓနဥစ္စာဒီရေက Tesla ရှယ်ယာနဲ့ ချိတ်ဆက်နေတာပါ။ ပြောရရင် အီလွန်မတ်စ်ဆီ ဝင်တဲ့ ပိုက်ဆံရဲ့ ၆၀% ကျော်က Tesla အစုရှယ်ယာနဲ့ ခံစားခွင့်တွေက လာပါတယ်။ ဒီတော့လည်း Tesla ရှယ်ယာ ဂဏန်းနှစ်လုံးစာ ကျဆင်းတဲ့နောက် အီလွန်မတ်စ် စီးပွားရေးထိလာတာ အဆန်းတော့ မဟုတ်ပါဘူး။
ဒီဇင်ဘာလလယ်မှာ အမြင့်ဆုံး တက်ခဲ့ပြီးနောက် Tesla ရှယ်ယာဈေး ၂၇% အထိ ထိုးကျလာနေပါတယ်။ အီလွန်မတ်စ် တွန်းတင်ခဲ့တဲ့ ဒေါ်နယ်ထရမ့် သမ္မတဖြစ်သွားပြီးနောက် Tesla ကုမ္ပဏီ အခုထက်ပို ကြီးပွားဦးမယ်လို့ မျှော်လင့်ချက်နဲ့ ဒီဇင်ဘာလယ်တုန်းက Tesla ရှယ်ယာတွေ အမြင့်ဆုံးဈေးပေါက်ခဲ့တာပါ။
Tesla ရှယ်ယာဈေး အမြင့်ဆုံးအချိန်မှာ အီလွန်မတ်စ်ရဲ့ ချမ်းသာကြွယ်ဝမှုက ဒေါ်လာ ၄၈၆.၄ ဘီလျံအထိ ရောက်ခဲ့ပါတယ်။ ခေတ်သစ်စီးပွားရေးသမိုင်းမှာ ဒီလောက် ချမ်းသာတဲ့သူကို မမြင်ဖူးခဲ့ကြပါဘူး။ ပြီးခဲ့တဲ့အပတ်ကတော့ Tesla စတော့ရှယ်ယာတွေ အဆိုးဆုံး ကျခဲ့တဲ့ အပတ်ပါ။
Tesla ရဲ့ထိပ်တန်း ဥရောပဈေးကွက်ဖြစ်တဲ့ ဂျာမနီမှာ ၂၀၂၁ နောက်ပိုင်း ရောင်းအား ၅၉% အထိ အဆိုးဆုံး ထိုးကျသွားခဲ့သလို BYD လို တရုတ်ကုမ္ပဏီတွေ ပြိုင်ဆိုင်မှုကောင်းတဲ့ တရုတ်မှာလည်း အရင်နှစ်ကထက် ရောင်းအား ၁၁.၅% ကျသွားခဲ့ပါတယ်။
အီလွန်မတ်စ်ကတော့ Tesla ကားရောင်းအားကျနေချိန်မှာ အိမ်ဖြူတော်အရေးကို ပိုအာရုံကျနေပုံပါပဲ။ ဘတ်ဂျက်ဖြတ်မယ့် DOGE ဌာနသစ်ကို ကိုင်ပြီးကတည်းက USAID ကို ဖြုတ်ဖို့ လုပ်နေသလို ဖက်ဒရယ်ဝန်ထမ်းတွေ လူလျှော့ပြီး ဘဏ္ဍာရေးဌာနတွင်း ငွေပေးချေတဲ့ နောက်ကြောင်းတွေ လိုက်နေတာတွေ လုပ်နေပါတယ်။
Tesla ရှယ်ယာဈေးကျပြီး ဓနဥစ္စာ ဒေါ်လာ ဘီလျံ ၄၀၀ အောက်ရောက်သွားပေမယ့် လက်ရှိ ဒေါ်လာ ၃၉၄.၆ ဘီလျံကြွယ်ဝတဲ့ အီလွန်မတ်စ်က ဒုတိယအချမ်းသာဆုံးသူဌေး မတ်ခ်ဇူကာဘတ်ထက် ဒေါ်လာ ၁၄၀ ဘီလျံကျော် ချမ်းသာနေတုန်းပါပဲ။