နဗီးလ် - ငါတကယ် ကြားရတာကို မင်သက်မိတယ် ၊ ရှက်လည်းရှက်မိတယ်ကွ ။
စတိုင်ဂါ - ကျွန်တော်လည်း ဝမ်းနည်းတာပေါ့ ၊ ကျွန်တော့ကို သူ ဒီလို ဆက်ဆံတဲ့ အပေါ်မှာ အများကြီး ခံစား ခဲ့ရတယ် ။ ဒါပေမယ့် ကျွန်တော် က မီဒီယာတွေဆီ ပြေးသွားပြီး အော်ဟစ် ပြောဆို တတ်တဲ့သူမျိုး မဟုတ်ခဲ့ဘူးလေ ။

ဘတ်စတီယန် ရှဝိန်း စတိုင်ဂါ ဟာ မန်ချက်စတာ ယူနိုက်တက် မှာ ၁၈ လ ကြာသာ ရှိနေခဲ့ပါတယ် ။ လူးဝစ် ဗန်ဟား ရဲ့ လက်ရင်းတပည့်တယောက် ဖြစ်တဲ့ စတိုင်ဂါ ဟာ နယ်သာလန် နည်းပြကြီး မန်ယူနိုက်တက် ပဲ့ကိုင်ရှင် ဖြစ်နေတဲ့ အချိန်မှာ အိုးထရက်ဖိုဒ့် ကို ပြောင်းရွှေ့ ရောက်ရှိလာခဲ့သူပါ ။ ပထမဆုံး ရာသီမှာ မန်ယူနိုက်တက် နဲ့ FA Cup ဆွတ်ခူးနိုင်ခဲ့ပါတယ် ။ ဒါပေမယ့် ဒုတိယမြောက် ရာသီမှာတော့ လူးဝစ် ဗန်ဟား ရဲ့ နေရာကို အစားထိုး ဝင်ရောက်လာတဲ့ နည်းပြသစ် ဂျိုဆေး မော်ရင်ညို က စတိုင်ဂါ ကို အသင်းကနေ ဖယ်ရှားပစ်ခဲ့တာပါ ။ ဂယ်ရီ နဗီးလ် နဲ့ ပြုလုပ်ခဲ့တဲ့ The Overlap အစီအစဉ်မှာတော့ စတိုင်ဂါ က မော်ရင်ညို သူ့ကို ဘယ်လို ဆိုးဆိုးရွားရွား ဆက်ဆံ ခဲ့သလဲဆိုတာတွေကို ဖွင့်ဟပြောဆိုသွားခဲ့ ပါတယ် ။

နဗီးလ် - ဂျိုဆေး မော်ရင်ညို နဲ့ မင်းနဲ့ ဘာတွေ ဖြစ်ခဲ့တာလဲ
ရှဝိန်း စတိုင်ဂါ - အိုး ခင်ဗျား သိချင်တယ်ပေါ့ . . . ကောင်းပြီလေ ။

“နွေရာသီမှာပေါ့ ၊ ရာသီသစ် အတွက် ပြင်ဆင်လေ့ကျင့်ဖို့ မန်ချက်စတာ ကို ကျွန်တော် ပြန်ရောက်လာခဲ့တယ် ။ ယူရို မှာ ဂျာမနီ က ဆီမီးအထိ တက်ခဲ့တာဆိုတော့ ကျွန်တော် ပြန်ရောက်တာ နည်းနည်း နောက်ကျသွား ခဲ့တယ်လေ ။ ပထမဆုံးလေ့ကျင့်ခန်း စဆင်းတဲ့ နေ့မှာ ဇလာတန် နဲ့ တွေ့ခဲ့တယ် ။ သူက ရောက်နှင့်နေပြီကိုး ။ တကယ်တော်တဲ့ ကစားသမားပါ ။ အမြင်စူးရှတယ် ၊ တွဲကစားလို့ အရမ်းကောင်းမယ့်ပုံ ပါပဲ”

“ဒါပေမယ့် နောက်တနေ့ မနက် လေ့ကျင့်ရေးကွင်းကို လာချိန်မှာ ဂျွန်မားတော့ဒ် က ကျွန်တော့ကို စောင့်နေခဲ့တယ် ။ မင်းကို အဝတ်လဲခန်းထဲ ဝင်ခွင့်မပြုတော့ဘူးဆိုပြီး ပြောလာခဲ့တာပေါ့ ။ ဘယ်သူက ပြောတာလဲလို့ ပြန်မေးတော့ နည်းပြ ( မော်ရင်ညို ) ဆီကလို့ သူပြန်ပြောတယ်”

နဗီးလ် - မင်းကို ဘာသတိပေးချက်မှ မထုတ်ဘဲနဲ့လား . . . ဘာလို့လဲ
ရှဝိန်း စတိုင်ဂါ - ဘာမှ သတိမပေးဘူး ၊ ကျွန်တော်လည်း မသိဘူးလေ ၊ ဘာလို့လည်းဆိုတာ ။ ဒီတော့ ကောင်းပြီ ဆိုပြီး အဝတ်လဲခန်းထဲက ပစ္စည်းတွေကို သွားယူခိုင်းလိုက်တယ် ၊ ပြီးတော့ ဘယ်မှာ လေ့ကျင့်ရမလဲ မေးတော့ ယူ-၁၆ ရှိတယ် ၊ အဲ့မှာ သွားလေ့ကျင့်လို့ရတယ်ဆိုပြီး သူကပြောတယ် ။

နဗီးလ် - မားတော့ဒ် လေ ၊ သူ အဲ့လို ပြောခဲ့တာလား . . .အိုး
ရှဝိန်း စတိုင်ဂါ - သူလည်း ပြောရတာ ခက်ခဲနေပုံပါပဲ ။

“နေ့လည်ကျတော့ နည်းပြနဲ့ တွေ့ခွင့်ရမလားလို့ ကျွန်တော် တောင်းဆိုခဲ့တယ် ။ အဲ့ဒီမှာ မော်ရင်ညို က မနှစ်တုန်းက ကျွန်တော် ဂျာမန်ကို ပြန်ပြီး ဆေးပြန်ကုတာနဲ့ ပတ်သက်ပြီး သဘောမကျဘူးလို့ ထုတ်ပြောလာခဲ့တယ်ဗျ ။ အဲ့ဒါက လူးဝစ် ဗန်ဟား လက်ထက်တုန်းကလေ ။ လူးဝစ် ကိုယ်တိုင် ခွင့်ပြုလို့ ကျွန်တော် ပြန်ခဲ့တာ ၊ ပြီးတော့ မန်ချက်စတာ ကို ပြန်လာပြီး ဒဏ်ရာအခြေအနေကို အမြဲ သတင်းပို့နေခဲ့တာ”

နဗီးလ် - ယူ-၁၆ ကို အခြား အသင်းကြီးက ဘယ်သူရောက်လာသေးလဲ
ရှဝိန်း စတိုင်ဂါ - မလာပါဘူး ၊ ကျွန်တော် တစ်ယောက်ပဲ လေ့ကျင့်ရတာ ။

“အဲ့ဒီမှာ ကျွန်တော် တစ်ယောက်တည်း ကြံ့ခိုင်ရေး လက်ထောက်နဲ့ ၃ လလောက် လေ့ကျင့်ခဲ့ရတယ် ။ တစ်ယောက်တည်းပေ့ါ ။ ဒါပေမယ့် ကျွန်တော် အရမ်း ပျော်နေခဲ့တာဗျ ၊ မန်ချက်စတာ ယူနိုက်တက် ဂျာစီကို ဝတ်ထားရလို့လေ ၊ ဒီအသင်းက ကျွန်တော့ရဲ့ ဒုတိယ အိမ်ပဲ ။ ဘိုင်ယန်ကနေ ထွက်မယ်လို့ စိတ်ကူးကတည်းက မန်ချက်စတာ ယူနိုက်တက် ကိုပဲ သွားမယ်လို့ ဆုံးဖြတ်ထားခဲ့တာ”

နဗီးလ် - ဟာ ဒါတရားမဝင်ဘူးကွ ။ မင်းမသိဘူးလား ။ အသင်းကြီး ကစားသမား တစ်ယောက်ကို အကြောင်းမဲ့ ဒီလို လုပ်လို့ မရဘူး ။ ငါ အရင် PFA မှာ လုပ်ခဲ့ဖူးတယ် ။ ဒါက တရားမဝင်ဘူး ၊ မင်း တိုင်လို့ရတယ် ။
စတိုင်ဂါ - ဟုတ်လား ၊ မသိပါဘူးဗျာ ၊ အခု သိသွားတော့ ကောင်းတာပေါ့ ။ ဘာလို့လည်းဆိုတာကတော့ ရှင်းပါတယ် ။ သူ ( မော်ရင်ညို ) ကျွန်တော့ကို အသင်းကနေ ရှင်းထုတ်ချင်လို့ပေါ့ ။ အသိသာကြီးပါပဲ ။

နဗီးလ် - ဒါပေါ့ကွာ ၊ ဒါပေမယ့် လုပ်ထုံး လုပ်နည်းတွေ ရှိတယ်ကွ ။ ဒီလို မသင့်လျော်တဲ့ ဆက်ဆံပုံမျိုး ခွင့်ပြု မထားဘူး ။ ငါ တကယ် ကြားရတာ မင်သက်မိတယ် ၊ ရှက်လည်း ရှက်မိတယ်ကွာ ။
စတိုင်ဂါ - ကျွန်တော်လည်း ခံစားရပါတယ် ။ ဒါပေမယ့် ကျွန်တော် က မီဒီယာတွေဆီ ပြေးသွားပြီး အော်ဟစ် ငိုကြွေးတတ်တဲ့ လူမျိုး မဟုတ်ခဲ့ဘူးလေ ။

နဗီးလ် - အသင်းကြီးက လူတွေနဲ့ မင်း မတွေ့ရတော့ဘူးလား
စတိုင်ဂါ - အင်း . . . မတွေ့ ရတော့ဘူးဆိုပါတော့ ။ တခါတလေ သူတို့ ဖြတ်သွားကြတယ် ၊ စာပို့တာတွေ ရှိတယ် ။ ဒါပေမယ့် ဆုံတော့ မဆုံဖြတ်ကြတော့ဘူး ။ ကျွန်တော် လေ့ကျင့်တာကလည်း သူတို့ပြီးမှတို့ ၊ သူတို့ မလာခင်တို့တွေ ဖြစ်နေတာလည်း ပါမှာပေါ့ ။ ဒီ ၃ လ အတွင်းမှာ တစ်နေ့တော့ ငါ မန်ချက်စတာ ယူနိုက်တက် အတွက် ပြန်ကစားခွင့် ရလောက်မှာပါ ဆိုတဲ့ မျှော်လင့်ချက်နဲ့ ကျွန်တော် စောင့်ခဲ့တယ် ။ ဒါပေမယ့် ခင်ဗျား သိပါတယ် ။ ဖြစ်မလာခဲ့ဘူးလေ ။

#crd