ရီမွန်တာဒါဘုရင်ကြီးလို့ တင်စားခံနေရတဲ့ လူးဝစ်အန်နရစ်ချ်ကေး

ပြင်သစ်ကလပ်ပီအက်စ်ဂျီအသင်း၏ စပိန်လူမျိုးနည်းပြ လူးဝစ်အန်နရစ်ချ်ကေးအား စပိန်မီဒီယာများက ရီမွန်တာဒါဘုရင်ကြီး(King of Remontada)ဟု ချီးမွမ်းခေါ်ဆိုနေကြသည်။Remontada ဆိုသည့်စပိန်စကားမှာ အင်္ဂလိပ်လို Comeback ဟုအဓိပ္ပာယ်ရသည်။အန်နရစ်ချ်ကေးအား Comeback King ဟု ချီးမွမ်းနေခြင်းမှာ ဘာစီလိုနာနှင့် ပီအက်စ်ဂျီအသင်းတို့ကို ချန်ပီယံလိဂ်ပြိုင်ပွဲ၌ အသက်ဆက်နိုင်အောင် ဖြစ်နိုင်ခြေအလွန်နည်းသောအနေအထားမှ စွမ်းဆောင်ပေးနိုင်ခဲ့၍ ဖြစ်သည်။(၂၀၁၆-၁၇) ရာသီက အန်နရစ်ချ်ကေးကိုင်တွယ်နေသော ဘာစီလိုနာအသင်းသည် ချန်ပီယံလိဂ်ရှုံးထွက် (၁၆)သင်းအဆင့်တွင် ပီအက်စ်ဂျီအသင်းအား ပထမအကျော့၌ (ဝ-၄)ဂိုးဖြင့် အရေးနိမ့်ခဲ့သည်။အိမ်ကွင်းတွင် ကစားခဲ့သည့် ဒုတိယအကျော့တွင် ဘာစီလိုနာအသင်းက (၆-၁)ဂိုးဖြင့်ပြန်အနိုင်ယူကာ နှစ်ကျော့ပေါင်းရလဒ်(၆-၅)ဂိုးဖြင့် ကွာတားဖိုင်နယ်သို့ တက်ရောက်နိုင်ခဲ့သည်။လက်ရှိတွင် ပီအက်စ်ဂျီအသင်းနည်းပြအဖြစ်တာဝန်ယူနေသော အန်နရစ်ချ်ကေးသည် ယခုရာသီ ချန်ပီယံလိဂ်ကွာတားဖိုင်နယ်ပထမအကျော့တွင် ဘာစီလိုနာအသင်အား (၂-၃)ဂိုးဖြင့် ရှုံးနိမ့်ခဲ့ခြင်းကို အဝေးကွင်းတွင် ပြန်လည်ချေပကာ (၄-၁)ဂိုးဖြင့်အနိုင်ပြန်ရအောင် အံအားသင့်ဖွယ်စွမ်းဆောင်နိုင်ခဲ့သည်။သူ၏ ပီအက်စ်ဂျီအသင်းအနေဖြင့် ဘာစီလိုနာကို ကျော်လွှားနိုင်ရန် အခွင့်အလမ်းအလွန်နည်းပါးနေပြီဟု အားလုံးကယူဆနေချိန်တွင် အန်နရစ်ချ်ကေးက နှစ်ကျော့ပေါင်းရလဒ် (၆-၄)ဂိုးဖြင့် အနိုင်ယူပြီး ဆီမီးဖိုင်နယ်တက်ရောက်ခွင့်အား အရယူပြခဲ့ခြင်းဖြစ်သည်။သို့ဖြစ်ရာ ဘာစီလိုနာနှင့် ပီအက်စ်ဂျီအသင်းတို့ထိပ်တိုက်တွေ့ဆုံမှုများတွင် ဒုတိယအကျော့ပွဲများ၌ မထင်မှတ်သည်များကို လုပ်ပြပြီး ပြန်လာနိုင်ခဲ့သည့် အန်နရစ်ချ်ကေးကို စပိန်မီဒီယာများက King of Remontada ဟု ခေါင်းစဉ်တပ်ကာ ချီးကျူးနေကြခြင်းဖြစ်သည်။ အန်နရစ်ချ်ကေးကမူ မိမိအား ယခုကဲ့သို့ အလွန်အကျွံချီးမြှောက်ခြင်းကို လက်မခံကြောင်း ပြောဆိုခဲ့သည်။