တောင်ကြီး PNO ရှိတဲ့ နယ်မြေကို SSPP ဝင်လာလို့ တိုက်ပွဲဖြစ်မှာစိုးရိမ်နေကြ
ဇန်နဝါရီ ၂၇
ရှမ်းပြည်နယ်တောင်ပိုင်း၊ တောင်ကြီးမြို့နယ်မှာ PNO ပြည်သူ့စစ်စခန်းရှိတဲ့ နယ်မြေကို ရှမ်းပြည်တိုးတက်ရေးပါတီ၊ ရှမ်းပြည်တပ်မတော်(SSPP/SSA) SSPP/SSA တပ်သားတွေမှ ပြီးခဲ့တဲ့ ဇန်နဝါရီလ ၂၀ရက်ကစတင်ပြီး ဝင်ရောက်နေထိုင်နေတဲ့အတွက် တိုက်ပွဲဖြစ်ပွားမှာ စိုးရိမ်နေရတယ်လို့ ဒေသခံတွေထံကနေ သိရပါတယ်။
တောင်ကြီးမြို့နယ်၊ နန်းဟောင်းမွေတော်အုပ်စု၊ ကျောင်းတောရွာကို SSPP တပ်က အင်အား ၁၀၀ ကျော်နဲ့ ဝင်ရောက်လာတာဖြစ်ပြီး သေနတ်သံတွေလည်း ကြားနေရတာကြောင့် တိုက်ပွဲဖြစ်ပွားလာမှာကို စိုးရိမ်နေရပြီး တကယ်လို့ တိုက်ပွဲဖြစ်ပွားလာပါက တိမ်းရှောင်နိုင်ဖို့ အခြေအနေစောင့်ကြည့်နေရတယ်လို့ သိရပါတယ်။
“သေနတ်သံတော့ ရှေ့ရက်တွေက တချက်တချက်ကြားလိုက်ရတယ်။ မနေ့နဲ့ ဒီနေ့တော့ မကြားရသေးဘူး။ တိုက်ပွဲဖြစ်မှာတော့ ကြောက်တာပေါ့၊ ဖြစ်ရင်ပြေးရအောင်လည်း အသင့်ပြင်ထားရတယ်။ အခုထိတော့ နှစ်ဖက်စလုံးက ရွာသားတွေကို ဘာမှအသိပေးလာတာတော့ မရှိသေးဘူး။ တဖက်နဲ့ တဖက် စောင့်ကြည့်နေကြတာလား၊ နားလည်မှုနဲ့ ဝင်လာတာလားလည်း မသိရသေးပါဘူး”လို့ ဒေသခံတယောက်က ပြောပါတယ်။
အဲဒီကျောင်းတောရွာမှာ ပအိုဝ်းပြည်သူ့စစ်(PNO)ရဲ့ တပ်ခွဲ(၉) စခန်းတည်ရှိနေတာ ကြာမြင့်နေပြီဖြစ်ပြီး SSPP တပ်ကတော့ အခုမှသာ စတင်ဝင်ရောက်လာတာဖြစ်ပေမယ့် ရွာအနီးပါတ်ဝန်းကျင်မှာတော့ အရင်က ရံဖန်ရံခါ လှုပ်ရှားသွားလာလေ့ရှိတယ်လို့ သိရပါတယ်။
ဇန်နဝါရီလ ဒုတိယပါတ်ကစတင်ပြီးတော့လည်း တောင်ကြီးမြို့နယ်၊ နန်းဟောင်းမွေတော်အုပ်စု၊ ဘန်ကွဲကျေးရွာမှာ ရှမ်းပြည်တိုးတက်ရေးပါတီ/ရှမ်းပြည်တပ်မတော် (SSPP/SSA) က ကြိုးနဲ့တားကာ စစ်ဆေးရေးဂိတ်ပြုလုပ်ထားပြီး ဖြတ်သန်းသွားလာတဲ့ ကားတွေကို တားဆီးစစ်ဆေးပြီးနောက် ပြောင်းဖူးတင်ဆောင်လာတဲ့ ကားတွေကို တစ်စီး ၃၀၀၀၀ကျပ် ကောက်ခံနေတယ်လို့လည်း သိရပါတယ်။
ဓာတ်ပုံ-gg
Credit - VOM News Agency
#သတင်းဟင်းလေးအိုးကြီး
