ရခိုင်မှာ အရေပြားရောဂါဖြစ်ပွားမှု ပိုမို များပြားလာ
ဇန်နဝါရီ ၁၁
လက်ရှိ ရခိုင်ပြည်နယ်အတွင်းက စစ်ဘေးရှောင်စခန်းတွေမှာ အရေပြားရောဂါဖြစ်ပွားမှု ပိုမို များပြားလာနေတယ်လို့ အဲဒီစစ်ရှောင်တွေကို ကူညီပေးနေသူတွေဆီက သိရပါတယ်။
ပြီးခဲ့တဲ့ မိုးရာသီကာလကတည်းက ပုဏ္ဏားကျွန်းနဲ့ မင်းပြားဒေသတွေမှာ အရေပြားရောဂါ လက္ခဏာတွေဖြစ်တဲ့ ခန္ဓာကိုယ်ယားယံတာ၊ ခူ၊ ဝဲ၊ ပွေး ကဲ့သို့သော အနာတွေ ဖြစ်ပေါ်ခံစားနေရတာဟာ ဒီကနေ့အချိန်အထိ ဖြစ်တယ်လို့ သိရပါတယ်။
လက်ရှိမှာတော့ ပုဏ္ဏားကျွန်း၊ မင်းပြားမြို့နယ်တွေအပြင် သံတွဲ၊ ငပလီ၊ ဂွ၊ ရမ်းဗြဲနဲ့ ကျောက်တော် အစရှိတဲ့ ဒေသတွေမှာလည်း အရေပြားရောဂါတွေ ဖြစ်ပွားလာနေတယ်လို့ သိရပါတယ်။
“စစ်ရှောင်စခန်းတွေမှာက လူဦးရေများတော့ ပတ်ဝန်းကျင် မသန့်ရှင်းဘူး။ သောက်သုံးရေလည်း သန့်ရှင်းမှုမရှိဘူး။ အဲဒီလို အခြေအနေတွေကြောင့် ခန္ဓာကိုယ်ယားယံတာတွေ စဖြစ်လာတာ။ ယားလို့ ကုတ်မိကြတော့ အနာတွေဖြစ်လာတာပေါ့။ အဲဒီကနေမှ ခန္ဓာကိုယ်တခုလုံးကို ပျံ့နှံ့သွားပြီး တယောက်ကနေ တယောက် ကူးကုန်တာ။ ကလေးတွေဆို ပိုဆိုးတယ်” လို့ စစ်ရှောင်တွေကို ကူညီပေးနေသူက ပြောပါတယ်။
ငပလီဒေသမှာဆိုရင် အသက် ၁၅ နှစ်အောက် ကလေးငယ်တွေမှာ အရေပြားရောဂါ ပိုအဖြစ်များနေပြီး ဆေးဝါး လုံလောက်မှုလည်း မရှိတာကြောင့် ထိရောက်တဲ့ ဆေးကုသမှုတွေလည်း မရကြဘူးလို့ ဆိုပါတယ်။
“ငပလီမှာက တခြားနေရာတွေထက်စာရင် ပိုပြီး အဖြစ်များနေတဲ့ သဘောပါ။ လတ်တလော အခြေအနေကတော့ ကျန်းမာရေး စောင့်ရှောက်မှုတွေ အရေးတကြီး လိုအပ်နေတာပေါ့။ အရေပြားရောဂါ ဖြစ်ပွားနေတဲ့ ဒေသတိုင်းမှာကို ဆေးလိုနေတာပါ။ ဒီတိုင်းဆက်သွားရင် ပိုဆိုးသွားနိုင်တယ်။ အနာတွေထဲ တခြား ပိုးမွှားတွေ ဝင်သွားရင် ပိုးဆိုးသွားနိုင်တယ်။ အသက်အန္တရာယ် ထိခိုက်လာနိုင်တဲ့အထိ ဖြစ်လာနိုင်တယ်။ ခက်တာက ရခိုင်မှာက လမ်းကြောင်းတွေလည်း ပိတ်ထားတယ်။ ဆေးဝါးတင်သွင်းမှုကိုလည်း တင်းကြပ်ထားတယ်ဆိုတော့ ဆေးရဖို့ကအင်မတန်ခက်တယ်” လို့ သူက ပြောပါတယ်။
မင်းပြားနဲ့ ပုဏ္ဏားကျွန်းမှာတော့ AA ရဲ့ ကျန်းမာရေးဌာနက ဆေးဝါးကုသမှုတွေ ဆောင်ရွက်ပေးနေတာကြောင့် ပြန်လည် ကောင်းမွန်လာသူတွေရှိသလို ဆေးဝါးကုသမှု မခံယူရသေးတဲ့သူတွေလည်း အများအပြား ရှိနေကြဆဲဖြစ်တယ်လို့ သိရပါတယ်။
“စစ်ရှောင်စခန်းတွေမှာ ယားနာမပေါက်တဲ့သူ မရှိသလောက်ပါဘဲ။ တချို့ဆို ပျောက်ကိုမပျောက်ဘူး။ သံတွဲမြို့နယ်ဘက်က ကျေးရွာတွေမှာဆိုရင်လည်း လူဦးရေ ရာနဲ့ချီပြီး အရေပြားရောဂါ ဖြစ်နေတယ်။ ကလေးတွေ အများဆုံးပဲ” လို့ ဒေသခံတယောက်က ပြောပါတယ်။
လက်ရှိ ရခိုင်မှာ တိုက်ပွဲတွေ အဆက်မပြတ် ဖြစ်ပွားနေတာကြောင့် ကုန်းလမ်း၊ ရေလမ်းတွေအားလုံး ပိတ်ဆို့ ဖြတ်တောက်ခံထားရတဲ့အတွက် ဒေသတွင်းမှာ ဆေးဝါး ပြတ်လပ်နေသလို စျေးနှုန်းတွေလည်း အဆမတန် မြင့်တက်နေတယ်လို့ သိရပါတယ်။
ဒါကြောင့် ဆေးရုံ၊ ဆေးခန်းတွေလည်း ပုံမှန် လည်ပတ်နိုင်ခြင်းမရှိ ဖြစ်နေပြီး ဆေးဝါးကုသမှုပိုင်းတွေမှာ အခက်အခဲတွေနဲ့ ကြုံတွေ့နေကြရတာ ဖြစ်တယ်လို့ သိရပါတယ်။
ရခိုင်ပြည်နယ်မှာ နစကတပ်နဲ့ AA တို့ကြား တကျော့ပြန်ဖြစ်ပွားနေတဲ့ တိုက်ပွဲတွေကြောင့် နေရပ်စွန့်ခွာ ထွက်ပြေးနေရတဲ့ စစ်ဘေးဒုက္ခသည် ခြောက်သိန်းကျော်ရှိတယ်လို့ ရက္ခိုင်အမျိုးသားအဖွဲ့ချုပ် (ULA/AA) ရဲ့ လူသားချင်းစာနာထောက်ထားရေးနဲ့ ဖွံ့ဖြိုးရေးဆိုင်ရာ ပူးပေါင်းဆောင်ရွက်ရေးရုံး (HDCO) က ပြီးခဲ့တဲ့ ၂၀၂၄ ခုနှစ်၊ ဒီဇင်ဘာလ ၂၉ ရက်နေ့မှာ ထုတ်ပြန်ထားပါတယ်။
Photo:CJ
Credit - VOM News Agency
#သတင်းဟင်းလေးအိုးကြီး
