“ရှိထားသင့်သည့် အရင်းအနှီးများ”

🔳 So Good They Can’t Ignore You (သူတို့ လျစ်လျူရှုထားလို့ မရလောက်တဲ့အထိ တော်အောင် ကြိုးစားပါ) ဆိုတဲ့ စာအုပ်မှာ စကားလုံးတစ်လုံး မှတ်သားဖူးတယ်။
Career Capital တဲ့။
မြန်မာလို ဘာသာပြန်ရရင်တော့ Career (အသက်မွေးဝမ်းကျောင်းအလုပ်) အတွက် ရေရှည်လိုအပ်မဲ့ အရင်းအနှီးတွေပေါ့။ အဲဒါတွေသာ ရှိထားရင် ဘယ်အလုပ်လုပ်နေတဲ့သူ ဖြစ်ဖြစ်၊ နောက်ဆုံး တခြားအလုပ်တစ်ခုပဲ ပြောင်းဖြစ်ဦးတော့ အကျိုးပြုနေမဲ့ အချက်တွေလို့ ဆိုလိုတယ်။

🔳 ဘာတွေလဲ ဆိုတော့ -
📌 ကျွမ်းကျင်မှု (Skill)
ကိုယ့်သက်ဆိုင်ရာ နယ်ပယ်မှာ ကျွမ်းကျင်ပိုင်နိုင်မှုရှိဖို့ အရေးကြီးပါတယ်။ ဒါ့အပြင် Growth mindset လို့ ခေါ်တဲ့ ဖွံ့ဖြိုးလိုတဲ့ စိတ်နေစိတ်ထားလည်း ရှိရလိမ့်မယ်။ အမှားတွေကနေ သင်ခန်းစာယူတာ၊ ဝေဖန်သံတွေကို နားထောင်တာ၊ တစ်ကြိမ်ထက်တစ်ကြိမ် ပိုကောင်းအောင် ကြိုးစားတာ၊ ဒါတွေဟာ ကိုယ့်ရဲ့ ကျွမ်းကျင်မှုကို စဉ်ဆက်မပြတ် တိုးတက်အောင် အားထုတ်သူတွေ၊ Growth mindset ရှိသူတွေမှာ တွေ့ရတတ်တဲ့ လက္ခဏာ ဖြစ်ပါတယ်။

📌 ပညာရေး (Education)
ကိုယ့်ရဲ့ ကျွမ်းကျင်မှုနဲ့ ပတ်သက်ပြီး အသိအမှတ်ပြု လက်မှတ်တွေ၊ ဆုတွေ ရထားခြင်းဟာလည်း အထူးသဖြင့် နိုင်ငံတကာထိ ဝင်ဆံ့ဖို့မှာ မဖြစ်မနေ လိုအပ်ပါတယ်။

📌 ငွေကြေးစုဆောင်းထားခြင်း (Saving)
Career နဲ့ ဘယ်လိုပတ်သက်သွားတာလဲဆို ဒုတိယအချက်ကြောင့်လို့ ပြောလို့ရတယ်။ တချို့သင်တန်းတွေ၊ ဘွဲ့တွေက ငွေကုန်ကြေးကျ ခံရပါတယ်။ အဲဒီလိုမဟုတ်တောင် တစ်ခါတလေ အလုပ်တစ်ခုနဲ့တစ်ခု အကူးအပြောင်းမှာ လစာမရဘဲ တောင့်ခံနိုင်ဖို့အတွက် ငွေစုထားတာရှိရင် ပိုအဆင်ပြေပါတယ်။

📌 ပြီးမြောက်အောင်မြင်ခဲ့မှု (Career Achievement)
ဘာလက်မှတ်တွေ ရထားရထား အလုပ်မှာ ပေါက်မြောက်အောင် မလုပ်နိုင်ရင်၊ မလုပ်ဖူးရင် အဆင်မပြေပါဘူး။ ပညာတတ်တာနဲ့ အလုပ်မှာ ရလဒ်ထွက်အောင် လုပ်နိုင်တာနဲ့ကလည်း အခါခပ်သိမ်းမှာ ထပ်တူကျမနေပါဘူး။ ဒါကြောင့် အလုပ်နဲ့ ပတ်သက်တဲ့ မှတ်တိုင် (Milestones) တွေ လိုအပ်ပါတယ်။

📌 အဆက်အသွယ် (Connection)
လူမှုဆက်ဆံရေး ကောင်းတာ၊ အပေါင်းအသင်း ဝင်ဆံ့တာ၊ အဆက်အသွယ် များတာတွေအပြင် ပိုအရေးကြီးတာက 'ယုံကြည်လောက်တဲ့သူ' ဖြစ်ဖို့ပါပဲ။ ကိုယ်ကျင့်သိက္ခာပိုင်းရော၊ အရည်အချင်းပိုင်းမှာပါ ယုံကြည်ရတယ်ဆို အားလုံးပြိုပျက်သွားရင်တောင် အချိန်မရွေး တစ်က ပြန်စလို့ ရပါတယ်။ Mentor လို့ ခေါ်တဲ့ ဆရာသမားကောင်းတွေ ရှိနေခြင်းဟာလည်း ကိုယ့် Career အတွက် အများကြီး အထောက်အကူ ပေးနိုင်ပါတယ်။

🔳 ဒီအချက်တွေကတော့ ကိုယ့်ရဲ့ Career Capital ထဲမှာ ရှိနေသင့်တဲ့၊ မဖြစ်မနေ ထည့်ထားရမဲ့ အချက်တချို့ ဖြစ်ပါတယ်။ ဘာကိုပဲလုပ်လုပ်၊ Job လို့ မမြင်ဘဲ ရေရှည်ကို စဉ်းစားပြီး Career လို့ မြင်လိုက်ပါ။ အလုပ်နဲ့ ပတ်သက်တဲ့ သဘောထားတွေ၊ ခံယူချက်တွေ၊ စိတ်အားထက်သန်မှုတွေ၊ ပြင်ဆင်သင့်တဲ့အရာတွေ လုံးဝကွဲပြားသွားပါလိမ့်မယ်။
Learn with PT
24 Feb 2024
#careercapital #learnwithpt