ရုရှားနိုင်ငံက မြန်မာနိုင်ငံကို Su-30SME အမျိုးအစား ဘက်စုံသုံးတိုက်လေယာဉ် နှစ်စီး ထပ်မံလွှဲပြောင်း
ဇန်နဝါရီ ၈
ရုရှားနိုင်ငံသည် ပြီးခဲ့သော ၂၀၂၄ ခုနှစ် ဒီဇင်ဘာ ၁၅ ရက်နေ့တွင် မြန်မာနိုင်ငံကို Su-30SME အမျိုးအစား ဘက်စုံသုံးတိုက်လေယာဉ် နှစ်စီး ထပ်မံလွှဲပြောင်းပေးခဲ့ကြောင်း သိရသည်။
မြန်မာနိုင်ငံက၂၀၁၈ ခုနှစ်တွင် အမေရိကန်ဒေါ်လာ သန်း ၄၀၀ တန်ကြေးရှိ ရုရှားနိုင်ငံထုတ် Su-30SME အမျိုးအစားတိုက်လေယာဉ် ၆ စင်း ဝယ်ယူရန် စာချုပ်ချုပ်ဆိုခဲ့ပြီး စာချုပ်စည်းကမ်းများအတိုင်း ရုရှားနိုင်ငံက မြန်မာနိုင်ငံကို လွှဲပြောင်းပေးရန် နောက်ဆုံးကျန်ရှိနေသော တိုက်လေယာဉ်နှစ်စီးကို လွှဲပြောင်းပေးခဲ့ခြင်းဖြစ်သည်။
ရုရှားနိုင်ငံမှ ထပ်မံ လွှဲပြောင်းပေးခဲ့သော Su-30SME အမျိုးအစား တိုက်လေယာဉ် နှစ်စီးသည် ဒီဇင်ဘာလအတွင်းကျင်းပခဲ့သည့် ၇၇ နှစ်မြောက် တပ်မတော်(လေ)အခမ်းအနားတွင် တပ်တော်ဝင်ခဲ့ကြောင်း သိရသည်။
ရုရှားကာကွယ်ရေးဝန်ကြီး ဆာဂေးရှိုဂူးသည် ၂၀၁၈ ခုနှစ် ဇန်နဝါရီလတွင် မြန်မာနိုင်ငံကို ချစ်ကြည်ရေးခရီးလာရောက်ခဲ့ပြီး Su-30SME အမျိုးအစား တိုက်လေယာဉ် အရောင်းအ ဝယ်စာချုပ် သဘောတူညီခဲ့ကြောင်း သိရသည်။
မြန်မာနိုင်ငံသည် ရုရှားအစိုးရထံက မှာယူထားသော Su-30SME အမျိုးအစား တိုက်လေယာဉ် ၆ စီးထဲမှ ပထမနှစ်စီးကို ၂၀၂၂ ခုနှစ် ဒီဇင်ဘာလတွင် စတင်လက်ခံရရှိခဲ့ပြီး၂၀၂၃ ခုနှစ် ဒီဇင်ဘာလတွင် ထပ်မံပြီး နှစ်စီးလက်ခံရရှိခဲ့ကာ ၂၀၂၄ ခုနှစ် ဒီဇင်ဘာလတွင် ကျန်ရှိနေသော နှစ်စီးကို ထပ်မံလက်ခံရရှိခဲ့ခြင်းမျိုးဖြစ်ကြောင်း သိရသည်။
ရုရှားသည် တိုက်လေယာဉ်များလွှဲပြောင်းပေးရာတွင် တိုက်လေယာဉ်များအပြင် လေ့ကျင့်ရေးနှင့် နည်းစနစ်ပိုင်းဆိုင်ရာအဖွဲ့တွေပါ ပူးတွဲလိုက်ပါလာခဲ့ပြီး ရုရှားထုတ်တိုက်လေယာဉ်များကို နေပြည်တော် လေတပ်စခန်းတွင် အခြေစိုက်ထားကြောင်း သိရသည်။ Su-30SME အမျိုးအစား တိုက်လေယာဉ်များသည် မြန်မာစစ်တပ်၏လေတပ်စွမ်းရည်ပိုင်း ပိုမိုကောင်းမွန်စေရန်အတွက် အဓိကအခန်းကဏ္ဍမှ ပါဝင်လာဖွယ်ရှိနေကြောင်းသိရသည်။
#centralnewsnaypyitaw
