တန်ဖိုးမြင့် EV လူစီးယာဉ်များကို အကောက်ခွန်သိုလှောင်ရုံအတွင်း ထည့်သွင်းခွင့်မပြုတော့
ရန်ကုန်၊ ဒီဇင်ဘာ ၂၈
အမျိုးသားအဆင့် လျှပ်စစ်သုံးယာဉ်နှင့် ဆက်စပ်လုပ်ငန်းများ ဖွံ့ဖြိုးတိုးတက်ရေး ဦးဆောင်ကော်မတီရဲ့ သတ်မှတ်ချက်အထက် တန်ဖိုးမြင့်မားတဲ့ လျှပ်စစ်သုံး လူစီးယာဉ်တွေကို ၂၀၂၅ ခုနှစ် ဖေဖော်ဝါရီလ ၁ ရက်နေ့မှ စတင်ပြီး အကောက်ခွန်သိုလှောင်ရုံအတွင်း ထည့်သွင်းခွင့်မပြုတော့ကြောင်း အကောက်ခွန်ဦးစီးဌာနကနေ သိရပါတယ်။
ထည့်သွင်းခွင့်ကို ၂၀၂၅ ခုနှစ် ဇန်နဝါရီလ ၃၁ ရက်နေ့အထိသာ ခွင့်ပြုပေးမှာဖြစ်ပြီး ကျန် Taxi ၊ အများသုံးယာဉ်နဲ့ လုပ်ငန်းသုံးယာဉ်တွေကိုတော့ ယခင်အတိုင်း ဆက်လက်ခွင့်ပြုမယ်လို့ အသိပေးကြေညာထားပါတယ်။
၂၀၂၃ ခုနှစ်အတွင်း တင်သွင်းခွင့်ရထားတဲ့ EV ယာဉ်တွေကို ၂၀၂၄ ခုနှစ် ဒီဇင်ဘာ ၃၁ ရက်မှာ မြန်မာ့ဆိပ်ကမ်းကို နောက်ထားပြီး ရောက်ရှိရမှာဖြစ်ပြီး သတ်မှတ်ရက်ထက် ကျော်လွန်ရောက်ရှိပါက သိမ်းဆည်းခံရမှာဖြစ်ကြောင်းလည်း မြန်မာမော်တော်ယာဉ် ထုတ်လုပ်ရေးနှင့် ဖြန့်ဖြူးရောင်းချရေး လုပ်ငန်းရှင်များအသင်းမှ တာဝန်ရှိသူတစ်ဦးက ပြောပါတယ်။
ပြီးခဲ့တဲ့ ဇူလိုင်လမှာ နိုင်ငံခြားငွေလဲနှုန်း အပြောင်းအလဲကြောင့် EV အမှတ်တံဆိပ်အချို့ကို အဆမတန် ဈေးတင်ရောင်းချမှုတွေ ရှိခဲ့ပေမယ့် လက်ရှိမှာ ဈေးချပြီး ပုံမှန်ဈေးအတိုင်း ရောင်းချလာကြတယ်လို့လည်း ဆိုပါတယ်။
လက်ရှိမှာတော့ EV ယာဉ်နဲ့ ဆက်စပ်လုပ်ငန်းတွေ လုပ်ကိုင်ဖို့ ကုမ္ပဏီ(၈၀)ကျော်ကို လုပ်ကိုင်ခွင့်ပြုပေးထားပေမယ့် အမှန်တကယ် လုပ်ငန်းလည်ပတ်နေတာကတော့ ကုမ္ပဏီ (၄၀)ကျော်ပဲ ရှိသေးတယ်လို့ ဝါရင့်ကားဝယ်ရောင်းလုပ်ငန်းလုပ်ကိုင်သူတွေက ပြောပါတယ်။