ကိုရီးယားပတ်စ်ပို့ကိစ္စများအတွက် Application ပြောင်းလဲမည်
-----------------
ကိုရီးယားနိုင်ငံကို အကြောင်းအမျိုးမျိုးနဲ့ရောက်နေကြတဲ့ မြန်မာနိုင်ငံသားတွေရဲ့ နိုင်ငံကူးလက်မှတ် ပျောက်ဆုံး တာ၊ ပျက်စီးတာနဲ့ သက်တမ်းတိုးတဲ့လုပ်ငန်းတွေကို ဆောင်ရွက်ဖို့အတွက် Glow Mate Application ကို ပြောင်းလဲအသုံးပြုမယ်လို့ မြန်မာသံရုံး၊ ဆိုးလ်မြို့က ထုတ်ပြန်ပါတယ်။
မြန်မာသံရုံး၊ ဆိုးလ်မြို့မှာ မြန်မာနိုင်ငံသားတွေရဲ့ နိုင်ငံကူးလက်မှတ် ပျောက်ဆုံးတာ၊ ပျက်စီးတာနဲ့ သက်တမ်း တိုးတာတွေအတွက် လူကိုယ်တိုင်သွားပြီး ကြိုတင်ရက်ချိန်းယူတဲ့စနစ်အစား Online Appointment စနစ်ကို ဇူလိုင်လ ၂၂ ရက်နေ့က စတင်ပြောင်းလဲဆောင်ရွက်ခဲ့ပါတယ်။
ဒီလိုဆောင်ရွက်ရာမှာ လက်ရှိဆောင်ရွက်နေတဲ့ Online Appointment စနစ် အသုံးပြုခဲ့ချိန်မှာ ကြုံတွေ့ခဲ့တဲ့ အခက်အခဲနဲ့ အတွေ့အကြုံတွေကို အခြေခံပြီး ကောင်စစ်ဆိုင်ရာကိစ္စတွေ အခုထက် ပိုမိုလွယ်ကူလျင်မြန် ထိရောက်အောင် ဆောင်ရွက်ပေးနိုင်ဖို့အတွက် Glow Mate Application ကို ပြောင်းလဲအသုံးပြုမှာ ဖြစ်တယ်လို့ ထုတ်ပြန်ချက်မှာ ဖော်ပြထားပါတယ်။
လာမယ့် ၂၀၂၅ ခုနှစ် ဖေဖော်ဝါရီလကုန်အထိ ကြိုတင်ရက်ချိန်းယူမယ့်သူတွေက လက်ရှိအသုံးပြုနေတဲ့ Online Appointment စနစ်ကို အသုံးပြုနိုင်မှာဖြစ်ပါတယ်။ ၂၀၂၅ ခုနှစ် မတ်လနောက်ပိုင်းအတွက် ရက်ချိန်းရယူမယ့်သူတွေကတော့ ဒီဇင်ဘာ ၂၇ ရက်နေ့ကစပြီး Glow Mate Application ကတစ်ဆင့် ကြိုတင်ရက်ချိန်းယူရမယ်လို့ သိရပါတယ်။
ကိုရီးယားရောက်မြန်မာနိုင်ငံသားတွေအနေနဲ့ မြန်မာနိုင်ငံကူးလက်မှတ်သက်တမ်းတာအတွက် စာအုပ်တစ်အုပ်ကို ကိုရီးယားဝမ် ၅၅,၀၀၀ ၊ စာအုပ်ပျောက်ဆုံးဒဏ်ကြေးအတွက် တစ်အုပ်ကို အမေရိကန်ဒေါ်လာ ၁၀၅ ဒေါ်လာ နဲ့ သက်တမ်းလွန်ဒဏ်ကြေးအနေနဲ့ တစ်နှစ်ကျော်လွန်ရင် အမေရိကန်ဒေါ်လာ ၁၅ ဒေါ်လာ ပေးသွင်းဖို့ သတ်မှတ် ထားပါတယ်။
အခုနှစ် ဇန်နဝါရီလကနေ အောက်တိုဘာလအထိ တောင်ကိုရီးယားကို မြန်မာလုပ်သား ၂၄၀၀ ကျော် စေလွှတ် ထားတယ်လို့ မြန်မာသံရုံးဆိုးလ်မြို ရဲ့ စာရင်းတွေအရ သိရပြီး အခုနှစ်မှာ တောင်ကိုရီးယား နိုင်ငံကို မြန်မာလုပ်သား ၁၁၀၀၀ ခန့်စေလွှတ်နိုင်ဖို့ မျှော်မှန်းထားပါတယ်။
