ရှမ်းပြည်မြောက်ပိုင်းဒေသ နယ်စပ်ကုန်သွယ်ရေးအတွက် နှစ်ဖက်ဆွေးနွေးညှိနှိုင်းနေ
ဒီဇင်ဘာ ၂၇
၁၀၂၇ စစ်ဆင်ရေး စတင်ချိန်မှ တစ်နှစ်ကျော်ကြာရပ်တန့်နေသည့် ရှမ်းပြည်မြောက်ပိုင်း မြန်မာ-တရုတ်နယ်စပ်ကုန်သွယ်ရေးလမ်းကြောင်း ကုန်သွယ်မှုပြုလုပ်နိုင်ရန် နှစ်ဖက်ဆွေးနွေးမှုများရှိနေဆဲဖြစ်ကြောင်း နယ်စပ်ကုန်သည်များထံမှ သိရသည်။
“ဆွေးနွေးနေတယ်လို့ကြားတယ်။ လမ်းကြောင်းကတော့ ပြန်ပွင့်စေချင်တယ်။ အခုက ဟိုဘက်ရော ဒီဘက်ရောက အဝင်မရှိတော့ ကုန်ဈေးနှုန်းက မတရားကြီးနေတာပေါ့။ ပြည်မကြီးဘက်ကလည်း ဒီဘက်လာလို့မရဘူး။ ပြည်မကြီးဆိုတာ မန္တလေးကိုပြောတာပါ။ တရုတ်ဘက်ကလည်း အကန့်အသတ်နဲ့ တင်သွင်းခိုင်းတာ။ ဒီလိုဆိုတော့ အဆင်မပြေဘူး”ဟု နယ်စပ်ကုန်သည်တစ်ဦးက ပြောသည်။
လက်ရှိတွင် မူဆယ်မြို့ရှိ တရုတ်-မြန်မာ နယ်စပ်ဂိတ်များဖြစ်သော နန်းတော်ဂိတ်၊ ဆင်ဖြူဂိတ်၊ မန့်ဝိန်းဂိတ်၊ ကျင်စန်းကျော့ဂိတ် နှင့် ပန်ဆိုင်းဂိတ်တို့အနက် ဆင်ဖြူဂိတ်တစ်ခုတည်းကိုသာ ကုန်ပစ္စည်းသယ်ယူခွင့်ပေးထားခြင်းဖြစ်သည်။
ထို့ပြင် စက်သုံးဆီများကို မူဆယ်မြို့ ကညနတွင် ယာဉ်မှတ်ပုံတင်ထားသည့် ကိုယ်ပိုင်မော်တော်ယာဉ်၊ မော်တော်ဆိုင်ကယ်၊ သုံးဘီး၊ ကုန်တင်(ဝန်ပေါ့)ယာဉ်များနှင့် ဌာနဆိုင်ရာမော်တော်ယာဉ်၊ မော်တော်ဆိုင်ကယ်များကို သတ်မှတ်ဂါလန်အတိုင်း ဝယ်ယူခွင့်ပြုမည်ဖြစ်ကြောင်း သိရသည်။
#centralnewsnaypyitaw
