၄၆ နှစ်ကြာခဲ့ပေမဲ့ သူပေးထားတဲ့ကတိကို တည်ခဲ့တဲ့ ကျောင်းဆရာ
ပက်ထရစ်မိုရီယာတီက အမေရိကန်နိုင်ငံ နယူးယော့ခ်မြို့ စာသင်ကျောင်းမှာ သိပ္ပံဘာသာရပ်သင်တဲ့ ကျောင်းဆရာပါ။ သူဟာ ၁၉၇၈ ခုနှစ်တုန်းက ကမ္ဘာမြေသိပ္ပံအကြောင်းသင်ရင်း နေကြတ်မယ့်လမ်းကြောင်းတွေ အသေးစိတ်ဖော်ပြထားတဲ့ စာရွက်ကို သူတပည့်တွေထံ ဝေပေးခဲ့ပါတယ်။ ၂၀၂၄ ခုနှစ် ဧပြီလ ၈ ရက်နေ့ကျရင် နယူးယော့ခ်ကနေ မြင်ရမယ်ဆိုတဲ့ နေကြတ်ခြင်းကို မှတ်ထားဖို့လည်း သူ့တပည့်တွေကို မှာခဲ့ပါတယ်။
ပြီးတော့ အဲဒီနေ့ကျရင် သူ့တပည့်တွေနဲ့ နေကြတ်တာကို ကြည့်ကြမယ်လို့လည်း မိုရီယာတီက ကတိပေးခဲ့ပါတယ်။ ဒါဟာ လွန်ခဲ့တဲ့ ၄၆ နှစ်တုန်းက ကတိပေးခဲ့တာ ဖြစ်လို့ သူ့တပည့်တွေကတော့ ပေါ့ပေါ့တန်တန်ပဲ သဘောထားခဲ့ကြပါတယ်။ ဒါပေမဲ့ လွန်ခဲ့တဲ့ ၁၆ နှစ်မှာ မိုရီယာတီက သူ့တပည့်တွေကို နေကြတ်တာကြည့်မယ့်ကိစ္စအကြောင်း ပြန်သတိပေးခဲ့ပါတယ်။
သူဟာ ဖေ့ဘွတ်ခ်ပေါ်မှာ Group တစ်ခုဖွဲ့ခဲ့ပြီး တပည့်ပေါင်းရာချီက အားတက်သရော ပါဝင်ခဲ့ကြလို့ မိုရီယာတီလည်း ဝမ်းမြောက်ဝမ်းသာ ဖြစ်ခဲ့ပါတယ်။ ပြီးခဲ့တဲ့ ဧပြီလ ၈ ရက်နေ့မှာတော့ တပည့်တွေက မိုရီယာတီရဲ့အိမ်မှာ စုဝေးခဲ့ကြပြီး နေကြတ်တာကိုကြည့်ဖို့ ပြင်ဆင်ခဲ့ကြပါတယ်။
သူ့တပည့်တွေကို တစ်စုတဝေးထဲ ပြန်မြင်ရတော့ ၈ တန်းကျောင်းသား/သူအရွယ်က မျက်နှာတွေကို ပြန်မြင်မိတယ်လို့ မိုရီယာတီက ဆိုပါတယ်။ မိုရီယာတီဟာ လာမယ့် နှစ် ၂၀ ကျရင် သူ့တပည့်တွေနဲ့အတူ နောက်ထပ်နေကြတ်တာကိုကြည့်ဖို့ ကတိပြုခဲ့ပြန်ပါသေးတယ်။
Ref:In 1978, A Teacher Told His Students They Would Get Together For The 2024 Eclipse. He Fulfilled His Promise
