ကားဈေးကွက် အရောင်းအဝယ်အေးပြီး ဈေးအနည်းငယ်ပြန်ကျ
------------------------------
အခုလပိုင်းအတွင်း ပြည်တွင်းကားဈေးကွက်မှာ အရောင်းအဝယ်အေးပြီး ဈေးနှုန်းတွေလည်း အနည်းငယ် ကျဆင်း လာတယ်လို့ ကားဈေးကွက် အသိုင်းအဝိုင်းက သိရပါတယ်။ လက်ရှိမှာ ခရီးသွား ရာသီချိန်ဖြစ်တာ၊ ဆူဇူကီး ကားအသစ်ထုတ်လုပ်တဲ့အပေါ်မှာ စိတ်ဝင်စားမှု မြင့်တက်နေ တာ၊ ငွေလဲနှုန်းတည်ငြိမ်နေတာနဲ့ တခြားသော SKD ဘရန်းသစ်တွေ ထပ်ပြီး မိတ်ဆက်လာဖို့ ရှိနေတာတွေ ကြောင့် ဈေးကွက်ထဲမှာ အရောင်းအဝယ်ရော ဈေးနှုန်းတွေပါ ငြိမ်နေတာ ဖြစ်တယ်လို့ ကားဈေးကွက် ကျွမ်းကျင်သူတချို့က ပြောပါတယ်။
ကားဈေးကွက်အခြေအနေက လာမယ့်နှစ် မတ်လအထိ အပြောင်းအလဲမရှိဘဲ အရောင်းအဝယ် ပုံမှန်ဖြစ်နိုင်သလို ဈေးနှုန်းလည်း သိသိသာသာပြောင်းလဲမှုမရှိနိုင်ဘူးလို့ မြန်မာ့မော်တော်ယာဉ် ထုတ်လုပ်ရေးနှင့် ဖြန့်ဖြူးရောင်းချ ရေးလုပ်ငန်းရှင်များအသင်း ဒုတိယဥက္ကဋ္ဌ ဦးမင်းမင်းမောင်က သုံးသပ်ပါတယ်။ ပြည်တွင်းကားဈေးကွက်ထဲမှာ ကားဈေးနှုန်းတွေဟာ ဇူလိုင်လနဲ့ ဩဂုတ်လထဲမှာ အမြင့်ဆုံးရောက်ခဲ့ရာကနေ နှစ်ကုန်ပိုင်းမှာ တချို့ကား အမျိုး အစားဈေးနှုန်းတွေက ပြန်ကျသွားပြီး တချို့ကားဈေးနှုန်းတွေကတော့ အမြင့်ဆုံးရောက်ခဲ့တဲ့ ပေါက်ဈေးနဲ့ပဲ တန့်နေတယ်လို့ သိရပါတယ်။
မနှစ်က ဈေးနှုန်းနဲ့ နှိုင်းယှဉ်ရင်တော့ အခုနှစ်မှာ ကားဈေးနှုန်းတွေက ၁၀ ရာခိုင်နှုန်းကနေ ၃၀ ရာခိုင်နှုန်းလောက် အထိ မြင့်တက်ခဲ့ပြီး လက်ရှိမှာ ကျပ်သိန်း ၁ ထောင်ဝန်းကျင် ဆီကားနဲ့ EV ကားအမျိုးအစားတွေ လူကြိုက်များနေ တယ်လို့ ကားဈေးကွက်ကနေ သိရပါတယ်။
