Part-3
ဒီမိုကရေစီ ဟူသည် (၂)
အဲသည် ဥပဒေများ စည်းကမ်းများဟူသည် အများဆုံးဖြတ်ထားချက် သို့မဟုတ် မိမိ လူ့အဖွဲ့အစည်းအတွင်း ယခင်က ဆုံးဖြတ်နိုင်သူတို့ ဆုံးဖြတ် ထားချက်များ ဖြစ်သည်။
အဲဒါတွေကို မိမိ မကြိုက်။
သို့ဖြစ်လျှင် ဘယ်သို့ ဆုံးဖြတ်လျှင် ကြိုက်မည်လဲ။
မိမိ အကြိုက်အတိုင်း ဆုံးဖြတ်လျှင် ကြိုက်မည်။
သို့သော် အများနှင့်ဆိုင်သော ကိစ္စမှာ မိမိ သဘောချည်း မဖြစ်နိုင်။ ဖြစ်သည် ဆိုလျှင်လည်း တရားမျှတမည် မဟုတ်။
အဲသည်တော့ တရားမျှတအောင် ဘယ်သို့ ဆုံးဖြတ်မည်လဲ။ စောစောက မိမိကိစ္စမှာ ဝင်ရောက် ပတ်သက် (ဟန့်တား) လာသော ဥပဒေ စည်းမျဉ်းစည်းကမ်းများနည်းတူ အများ၏ ဘဝများအပေါ် သက်ရောက်မှုရှိသော ကိစ္စရပ်များ၌ သက်ရောက်ခြင်းခံရနိုင်သူ အားလုံးပါဝင် ဆုံးဖြတ်သင့်သည်ဟု စဉ်းစား၍ရသည်။
နိုင်ငံရေးသိပ္ပံသမားတို့က အဲသည်အချက်ကိုယူကာ အစုအသင်းတစ်ရပ် သို့မဟုတ် လူ့အဖွဲ့အစည်းတစ်ရပ်အတွင်း ပါဝင်သူ အားလုံးတို့က မိမိတို့နှင့် သက်ဆိုင်သော သို့မဟုတ် မိမိတို့အပေါ်သက်ရောက်မှု ရှိနိုင်သော ကိစ္စရပ် အားလုံးနှင့် စပ်လျဉ်း၍ စဉ်းစား ဆုံးဖြတ်ရာတွင် တန်းတူညီမျှ ပါဝင်ခွင့်ရှိခြင်းသည် ... ဒီမိုကရေစီ၏ ... အခြေခံသဘောဖြစ်သည်ဟု ဆိုခဲ့ခြင်းဖြစ်သည်။
ဒီမိုကရေစီ စိတ်ဓာတ်ဟုလည်း ဆိုနိုင်သည့် အဲသည် သဘောကို အနည်းငယ် ဖွင့်၍ ပြောရသော်
ဒီမိုကရေစီက ကိုင်စွဲသည့် အခြေခံ သဘောထားများ
၁။ အများနှင့်ဆိုင်သော ဆုံးဖြတ်ချက်များကိုယင်းတို့ကြောင့် သက်ရောက်မှု ရှိနိုင် သူ အားလုံး စိတ်ဝင်စားကြမည် ဖြစ်သည်။
၂။ အရွယ်ရောက်၍ အသိဉာဏ် တင်းပြည့်ကျပ်ပြည့်ရှိသူမှန်လျှင် မိမိအရေးကိစ္စ၊ မိမိ ပါဝင်သော လူအစုအသင်း၏ အရေးကိစ္စများနှင့် စပ်လျဉ်းသည့် ကောင်းကျိုး ဆိုးပြစ်တို့ကို ချင့်တွက် ဝေဖန်နိုင်စွမ်းရှိ၍ ယင်းပေါ်တွင် အခြေခံသည့် ကိုယ်ပိုင် အမြင်လည်း ရှိကြသည်။
၃။ ထို့ကြောင့် အစုအသင်းတွင် ပါဝင်သူ လူအသီးသီးတို့၏ အမြင်များကို အများကြားသိအောင် တင်ပြခွင့်ရကြပြီး ယင်းတို့အပေါ် ငြင်းခုံ ဝေဖန်ခြင်း သုံးသပ် ညှိနှိုင်းခြင်းများ ပြုပြီးနောက်မှ ချမှတ်လိုက်သည့် ဆုံးဖြတ်ချက် တို့သည်သာ ရေရှည်အတွက် အကောင်းဆုံး ဆုံးဖြတ်ချက်များ ဖြစ်နိုင်သည်။
၄။ ဆွေးနွေးခြင်း၊ ငြင်းခုံခြင်းတို့မှနေ၍ အားလုံး သဘောတူညီသည့် တစ်ခုတည်းသော ဆုံးဖြတ်ချက် ထွက်မလာသည့်အခါမျိုးတွင် ပါဝင်သူ အားလုံးက ဆန္ဒမဲပေးသောနည်းဖြင့် ဆုံးဖြတ်ချက်ကို ရွေးချယ်ရမည်။
၅။ အဲသည်အခါမျိုးတွင် လူတစ်ယောက် မဲတစ်မဲ၊ ဘယ်သူ့မဲမှ တန်ဖိုး မပိုဟူသော စနစ်သည် အားလုံး တန်းတူညီမျှဟူသော မူဝါဒကိုထင်ဟပ်သည့် သင့်မြတ်သော စနစ်ဖြစ်သည်။
စသဖြင့် ဒီမိုကရေစီသမားတို့ ခံယူပေသည်။
#ဆက်ရန်ရှိ