ဇန်နဝါရီ၌ အားဖြည့်ရန်လိုအပ်ဟု စပါးနည်းပြပြော
................
ဇန်နဝါရီအပြောင်းအရွှေ့မှာ စပါးအသင်း လူအင်အားဖြည့်တင်းဖို့ လိုအပ်တယ်လို့ နည်းပြ အန်ဂျီက ပြောကြားလိုက်ပါတယ်။ စပါးအသင်းဟာ ပရီးမီးယားလိဂ်နောက်ဆုံး ၄ ပွဲမှာ ၃ ပွဲရှုံးနိမ့်ခဲ့ပြီး အဆင့်-၁၁ နေရာကို ရောက်ရှိနေတာဖြစ်ပါတယ်။ လက်ရှိစပါးအသင်းမှာ ပွဲထွက်ဂိုးသမား ဗစ်ကာရီယိုအပါအဝင် အသင်းရဲ့ အဓိက ကစားသမားအချို့ ဒဏ်ရာပြဿနာတွေနဲ့ ရင်ဆိုင်နေရတာဖြစ်ပါတယ်။ ဒီဇင်ဘာ ၂၆ ရက်နေ့မှာ ဘောက်ဆင်ဒေးပွဲအဖြစ် ပရီးမီးယားလိဂ် အဆင့်-၄ က နော်တင်ဟမ်အသင်းအိမ်ကွင်းကို သွားကစားရမယ့် ပွဲစဉ်မတိုင်မီ သတင်းစာရှင်းလင်းပွဲမှာ နည်းပြ အန်ဂျီက လူအင်အားဖြည့်တင်းဖို့ လိုအပ်တယ်ဆိုတာကို အဓိကထားပြောသွားခဲ့တာပါ။ အရင်ထဲကပြောခဲ့သလို လူခေါ်ဖို့အတွက် အစီအစဉ်တွေရှိပြီး အသင်းအတွက် အမှန်တကယ်လိုအပ်တဲ့နေရာတွေကို ဖြည့်တင်းနိုင်ဖို့ ကြိုးစားသွားမယ်လို့ နည်းပြ အန်ဂျီက ပြောပါတယ်။ နည်းပြ အန်ဂျီရဲ့ တိုက်စစ်အသားပေးကစားပုံအပေါ် စပါးအသင်းပရိသတ်တွေကလည်း ဝေဖန်နေကြပြီး နည်းပြအန်ဂျီကတော့ သူ့ကစားကွက်ကို ပြောင်းလဲ မှာမဟုတ်ဘူးလို့ ပြန်လည်ပြောကြားထားပါတယ်။
