ဆူဇူးကီး အာတီဂါတွေကို SKD စနစ်နဲ့ ပြန်ထုတ်မယ့် သတင်းကြောင့် ပြည်တွင်းကားဈေးကွက် လှုပ်ခတ်လာပေမယ့် အဝယ်ပျောက်နေ
ဒီဇင်ဘာ ၂၅
ဆူဇူးကီး အာတီကာတွေကို SKD စနစ်နဲ့ ပြန်ထုတ်မယ်ဆိုတဲ့ သတင်းတွေကြောင့် ပြည်တွင်းကားဈေးကွက် လှုပ်ခတ်မှုတွေရှိလာပြီး ဈေးကွက်မှာ ဝယ်လက်ရှားပါးကာ အဝယ်ပျောက်နေတယ်လို့ ရန်ကုန်ကားဈေးကွက်အတွင်းကနေ စုံစမ်းသိရှိရပါတယ်။
ဆူဇူးကီး အာတီဂါ 2025 အသစ်စက်စက် ခုံသုံးတန်း ဇီးရိုးကီလို(မော်ဒယ်အသစ်)တွေကို ရန်ကုန်လိုင်စင် အမည်ပေါက်နဲ့ လာမယ့်ရှေ့နှစ် (၄)လပိုင်းလောက်မှာ အများအပြား ရရှိမယ်လို့ ကားလောကအတွင်းမှာ သတင်းတွေထွက်ပေါ်နေတာဖြစ်ပါတယ်။
အဲဒါအပြင် အခုအသစ်ထွက်ရှိမယ့် ဆူဇူးကီးအာတီဂါ တွေရဲ့ဈေးနှုန်းက သိန်း ၁၁ဝဝ ဖြစ်ပြီး လုပ်ငန်းရှင်တွေအတွက် နမူနာတွေ စပြီးရနေသလို စမ်းပြီးစီးနေကြပြီဖြစ်တယ်ဆိုတဲ့ သတင်းတွေကဆိုပါတယ်။
"အခုဆူဇူးကီးအာတီဂါတွေထွက်မယ်ဆိုတဲ့သတင်းကြောင့်ကားလောကမှာဂယက်ထသွားတာပေါ့။တကယ်တမ်းကျ ကားက ဘယ်နားနေမှန်းမသိသေးပါဘူး။ဂယက်ကတော့ အတော်လေးထသွားတယ်။ ဒါပေမယ့် ဒီကိစ္စကလည်းစောင့်ကြည့်ရမယ့် အနေအထားမှာရှိပါတယ်။အခုကြားနေရတာက ဆူဇူးကီး အာတီဂါတွေကိုသိန်း ၁ဝဝဝ ကျော်လေးနဲ့ရမယ် ဆိုတာကလည်း ဒါကလည်းဖြစ်နိုင်ချေနည်းမယ်လို့ယူဆရပါတယ်။အပြင်ဈေးနဲ့ အခု ကြားနေရတဲ့ဈေးကလည်းကွဲလွဲနေတယ်လို့ပြောကြတယ်။အစိုးရသတ်မှတ်တဲ့မူရင်းဈေးကိုက သိန်း ၁ဝဝဝ ကျော်လေ၊အဲမှာရာဖြတ်တာရှိမယ်၊နောက်ဝင်ငွေခွန် ကညနခွန်ဒါတွေပေါင်းလိုက်ရင် အခုအသစ်ထွက်လာမယ် ဆူဇူးကီးအာတီဂါ တွေက အခုကြားနေရတဲ့ဈေးတွေနဲ့ မရနိုင်လောက်ဘူးလို့ ထင်ပါတယ်"လို့ ရန်ကုန်မြို့က ဝါရင့်ကားဝယ်ရောင်းသမားတယောက်က သူရဲ့အမြင်ကို ပြောပြပါတယ်။
လက်ရှိပြည်တွင်းကားဈေးကွက်မှာ ဆူဇူးကီးအာတီဂါတွေ Type 3 အမျိုးအစားနဲ့ Type 4 အမျိုးအစားကားတွေကို သိန်း ၁ဝဝဝ အထက်မှာသာ ဈေးခေါ်ယူရောင်းချမှုတွေဟာလည်း ယနေ့အထိရှိနေတာဖြစ်တယ်လို့ သိရပါတယ်။
"အခုဈေးကွက်မှာ ဆူဇူးကီးအာတီဂါ တွေ Type 3,Type 4 လောက်ဆို သိန်း ၁ဝဝဝ ပတ်ချာလည်နဲ့ သိန်း ၁၃၅ဝ လောက်ရှိတယ်။၁ဝဝဝ အောက်ဆိုတဲ့ ကားတွေကဂျိုကားတွေလို့ ပြောလို့ရတာပေါ့၊ကားမကောင်းဘူးပေါ့။နောက်ပြီး ပြည်တွင်းကားဈေးကွက်မှာ ဆူဇူးကီးတွေက ဈေးတန်းမြင့်တယ်၊မာနေတယ်၊ဈေးတွေစွာနေတယ်ဆိုတာကလည်း သူကဒီမှာစက်ရုံတွေ Showroom တွေအများကြီးရှိတယ်။နောက်တခါကားအပိုပစ္စည်းပေါတယ်။ကားတခုခုဖြစ်တာနဲ့ Showroom ကိုသွားထိုးလိုက်ရုံပဲ။ဘာပြင်မလဲရတယ်၊လွယ်တယ်ပေါ့။အဲဒါကြောင့် ဆူဇူးကီးတွေက ဈေးကွက်မှာနေရာရလာတယ်။လူကြိုက်များလာတယ်။
အခုကြားနေရတဲ့ SKD စနစ်နဲ့ ထုတ်မယ့် ဆူဇူးကီးအာတီကာတွေက သိန်း ၁ဝ၃ဝ လောက်ရှိတယ်လို့ပြောတယ်။အဲဒါကို ကညနခွန်တွေ ဝင်ငွေခွန်တွေထပ်ပေါင်းရမှာပေါ့။ ဒီဆူဇူးကီးအာတီကာတွေပြန်ထွက်မယ်ဆိုတဲ့သတင်းကြောင့်ဈေးကွက်ကအေးသွားတယ်၊အဝယ်ပျောက်သွားတယ်၊ဝယ်လက်ရှားသွားတယ်ဆိုတာကလည်းအမှန်ပါပဲ"လို့ သူက ထပ်လောင်း ပြောပြပါတယ်။
အဲဒါအပြင် လက်ရှိ ပြည်တွင်းကားဈေးအနေအထားကလည်း ကားမူဝါဒပြောင်းလဲမှုမရှိပါက၊ကားမူဝါဒပိုင်းဆိုင်ရာနဲ့ ပတ်သက်လို့ မူဝါဒအသစ်မထွက်လာသေးသရွှေ့ ပြည်တွင်းကားဈေးနှုန်းတွေဟာ သိသိသာသာကျဆင်းမှုမရှိနိုင်ဘဲ ကားဈေးတွေ က အမြင့်တန်းမှာသာ ဆက်ရှိနိုင်မယ်လို့ ကားဈေးကွက်ရေးရာကျွမ်းကျင်သူတွေက သုံးသပ်ထားကြပါတယ်။
"ဦးသိန်းစိန်ခေတ်ကလိုကားပါမစ်တွေပြန်ပေးလိုက်ရင်တော့ကားဈေးက ကျကောင်းကျလာနိုင်ပါတယ်။အခုကားဈေးမကျဘူး၊ကားဈေးတွေမာနေတယ်ဆိုတာ ဒါကကားတင်သွင်းခွင့် မူဝါဒနဲ့ပဲသက်ဆိုင်ပါတယ်။ကားပါမစ်တွေပြန်ပေးတယ်၊ကားတင်သွင်းခွင့်ပြုတယ်ဆိုရင်တောင် မော်ဒယ်မြင့်ဘယ်ကိုင်းတွေပဲသွင်းရမယ်၊ ၂ဝ၂၂ မော်ဒယ်
အထက်ပဲသွင်းရမယ်ဆိုပြည်တွင်းကားဈေးကကျဖို့မရှိနိုင်သေးဘူး။ဂျပန်တပတ်ရစ်ကားဈေးက ဘယ်လိုမှပြန်ကျလာဖို့မရှိပါဘူး။ဒီကားဈေးပြန်ကျဖို့ဆိုရင်နည်းလမ်းက အရင်လိုဂျပန် Use ကားတွေကိုပြန်တင်သွင်းခွင့်ပြုမှပဲရမယ်။အခုနှစ်(၂ဝ)ကားတွေအပ်ရမယ်ဆိုတာကလည်း ဒါကဦးသိန်းစိန်လက်ထက်ထဲကရှိထားတဲ့ထုတ်ပြန်ချက်ပါ။ကညန က လက်ခံရင်ဘာမော်ဒယ်ပဲဖြစ်ဖြစ်စီးလို့ရတယ်။ကညနက ခွင့်ပြုရင်ရတယ်။ အန်းဒိတ်ရှေးဟောင်းကားတွေလိုင်စင်သက်တမ်း ၁ဝ နှစ်၊၁၅ နှစ်ကျော်တွေတောင် ကညနက ယာဉ်စစ်တာမှန်တယ်။သူ့အစိတ်အပိုင်းတွေဖြတ်ဆက်မလုပ်ထားဘူးဆိုရင်လိုင်စင်ပေးနေတာပဲလေ။အခုလည်းနေပြည်တော်လိုင်စင်တွေကိုချထားပေးနေတယ်လို့ကြားတယ်။6S နံပါတ်နဲ့ကားတွေထွက်နေတာရှိတယ်။ပြောရရင်ကားမူဝါဒမပြောင်းမလဲချင်း ပြည်တွင်းကားဈေးနှုန်းတွေက သိသိသာသာကျဆင်းမှုမရှိနိုင်ဘူး။ကားဈေးကအမြင့်တန်းမှာဆက်ရှိနေမယ်။ဘာလို့ဆိုအခု Without ကားတွေတောင်သိန်းရာချီဖြစ်နေတာလေ၊ပရိုဘောက်တောင် သိန်း ၁ဝဝ၊ Crown ဆိုသိန်း ၃ဝဝ လောက်ရှိတယ်၊ဒါက Without ဈေးပါ။ဒါကြောင့်မို့ဂျပန်တပတ်ရစ်ကားဈေးကမာနေအုံးမယ်လို့ သုံးသပ်ရပါတယ်"လို့ ရန်ကုန်မြို့က တပိုင်တနိုင်ဝါရင့် ကားဝယ်ရောင်းတယောက်က သူရဲ့အမြင်ကို ဆက်ပြီးပြောပြခဲ့ပါတယ်။
SKD စနစ်ဆိုတာကတော့ ပြည်ပကနေ ကားအစိတ်အပိုင်းတွေကို တင်သွင်းပြီး ပြည်တွင်းမှာတစိတ်တပိုင်းတပ်ဆင်ထုတ်လုပ်ရောင်းချတဲ့ စနစ်ပဲဖြစ်ပါတယ်။ ဒါအပြင် လက်ရှိ ပြည်တွင်းကားဈေးကွက် မှာ ကြိုက်ရောင်း၊ကြိုက်ဝယ်စနစ်နဲ့သာ ကားတွေကို အရောင်း၊အဝယ်ပြုလုပ်နေကြပြီး ဈေးကွက်မှာ တရုတ်ကားတွေထက် ဂျပန်ကားတွေကိုသာလူကြိုက်ပိုများတာတွေ့ရတယ်လို့လည်း ကားဝယ်ရောင်းလုပ်ငန်း လုပ်ကိုင်သူတွေက ဆိုပါတယ်။
အဲဒါအပြင် အခုဆူဇူးကီး အာတီဂါ တွေကို SKD စနစ်နဲ့ ပြန်ထုတ်မယ်ဆိုတဲ့ သတင်း တွေကြောင့် ပြည်တွင်းကားဈေးကွက်သိသိသာသာ ပြောင်းလဲမှုရှိ၊မရှိဆိုတာကလည်း ဆက်လက်စောင့်ကြည့်ရမယ့် အနေအထား ဖြစ်တယ်လို့ ကားဈေးကွက်ရေးရာ ကျွမ်းကျင်သူတွေက ခန့်မှန်းသုံးသပ်ထားကြပါတယ်။
Photo - ဆူးဇူးကီး Showroom
ပုံစာ - SKD စနစ်နဲ့ထုတ်လုပ်မယ်ဆိုတဲ့ ဆူဇူးကီး အာတီကာပုံစံအသစ်ကို တွေ့ရစဉ်။
Credit - VOM News Agency
#သတင်းဟင်းလေးအိုးကြီး
