ပင်လယ်နီမှာ အချင်းချင်းမှားယွင်းပစ်ခတ်မှုတစ်ခုအတွင်း အမေရိကန်တိုက်လေယာဉ်တစ်စင်း ပစ်ချခံရ

နိုင်ငံတကာ၊ ဒီဇင်ဘာ ၂၄

ပင်လယ်နီအတွင်းမှာ ဒီဇင်ဘာလ(၂၂)ရက်အစောပိုင်းက ဖြစ်ပွားခဲ့တဲ့ အချင်းချင်းမှားယွင်းပစ်ခတ်မှုတစ်ခုအတွင်း အမေရိကန်တိုက်လေယာဉ်တစ်စင်း ပစ်ချခံခဲ့ရတယ်လို့ သိရပါတယ်။

အဲဒီဖြစ်ရပ်အတွင်း လေယာဉ်မှူးနှစ်ဦးစလုံးဟာ ထိုင်ခုံနဲ့အတူ အောင်မြင်စွာကန်ထွက်နိုင်ခဲ့ပေမယ့်လည်း အစောပိုင်းသတင်းတွေအရ လေယာဉ်မှူးနှစ်ဦးထဲက တစ်ဦးဟာ ထိခိုက်ဒဏ်ရာအနည်းငယ်ရရှိခဲ့တယ်လို့ သိရပါတယ်။

USS Harry S. Truman Carrier Strike Group ရဲ့ တစ်စိတ်တစ်ပိုင်းဖြစ်တဲ့ USS Gettysburg (CG 64) သင်္ဘောဟာ ပင်လယ်နီကိုဖြတ်ပြီး ပျံသန်းလာတဲ့ အမေရိကန်တိုက်လေယာဉ်တစ်စင်းကို မှားယွင်းပစ်ချခဲ့မိတာဖြစ်တယ်လို့လည်း သိရပါတယ်။

အမေရိကန်အလယ်ပိုင်းစစ်ဌာနချုပ် CENTCOM က "USS Harry S. Truman Carrier Strike Group ရဲ့ တစ်စိတ်တစ်ပိုင်းဖြစ်တဲ့ USS Gettysburg (CG 64) သင်္ဘောဟာ USS Harry S. Truman လေယာဉ်တင်သင်္ဘောအပေါ်ကနေဖြတ်ပြီးပျံသန်းခဲ့တဲ့ F/A-18 တိုက်လေယာဉ်ကို မှားယွင်းစွာပစ်ချခဲ့မိတာဖြစ်ပါတယ်။

#ဒီဖြစ်ရပ်ဟာ ရန်လိုမှုနဲ့ပတ်သက်တဲ့ ပစ်ခတ်မှုရဲ့ ရလဒ်တစ်ခုမဟုတ်သလို အပြည့်အဝစုံစမ်းစစ်ဆေးမှုတွေကို ဆက်လက်လုပ်ဆောင်နေပါတယ်"လို့ သတင်းထုတ်ပြန်ထားပါတယ်။

အစ္စရေး-ဟားမတ်စစ်ပွဲစတင်ဖြစ်ပွားပြီးနောက်ပိုင်းတည်းက အမေရိကန်ဟာ ပင်လယ်နီအတွင်းသွားလာနေတဲ့ ကုန်တင်သင်္ဘောတွေ ပစ်ခတ်တိုက်ခိုက်ခံရမှုတွေကနေ ကာကွယ်ဖို့အတွက် ၎င်းရဲ့စစ်ဘက်ဆိုင်ရာပိုင်ဆိုင်မှုတွေကို ဖြန့်ကျက်ချထားခဲ့တာလည်းဖြစ်ပါတယ်။

အစ္စရေး-ဟားမတ်စစ်ပွဲဖြစ်ပွားပြီးနောက်ပိုင်း ယီမင်အခြေစိုက် ဟူသီလက်နက်ကိုင်အဖွဲ့ဟာ ဟားမတ်လက်နက်ကိုင်အဖွဲ့ကို ထောက်ခံတဲ့အနေနဲ့ ပင်လယ်နီအတွင်းသွားလာနေတဲ့ ကုန်တင်သင်္ဘောတွေကို ဒုံးကျည်တွေ၊ ဒရုန်းတွေနဲ့ ပစ်ခတ်တိုက်ခိုက်ခဲ့တာလည်း ဖြစ်ပါတယ်။

#သတင်းဟင်းလေးအိုးကြီး