ဒဏ်ရာကြောင့် ဆာကာ အနားယူရမည်
---------------------
ပဲလေ့စ်အသင်းနဲ့ကစားခဲ့တဲ့ပွဲစဉ်မှာ ဒဏ်ရာရခဲ့တဲ့ တောင်ပံကစားသမား ဆာကာဟာ ရက်သတ္တ ပတ် အတော် ကြာ အနားယူသွားရမယ်လို့ အာဆင်နယ်အသင်းရဲ့နည်းပြ အာတီတာက အတည်ပြုခဲ့ပါတယ်။ ဆာကာဟာ ပဲလေ့စ်အသင်းကို (၅)ဂိုး၊ (၁)ဂိုးနဲ့ အနိုင်ရခဲ့တဲ့ပွဲစဉ်မှာ ဒဏ်ရာရခဲ့တာကြောင့် ပွဲချိန်(၂၄)မိနစ်မှာတင် လူစားလဲ ခံခဲ့ရတာပါ။
ဆေးစစ်ချက်တွေရဲ့အဖြေအရ ဆာကာရဲ့ဒဏ်ရာဟာ တံကောက်ကြောဒဏ်ရာဖြစ်တယ်လို့လည်း အာဆင်နယ် အသင်းက တရားဝင်ထုတ်ပြန်ခဲ့ပါတယ်။ ဆာကာရဲ့ ဒဏ်ရာအခြေအနေက မကောင်းတာကြောင့် ရက်သတ္တ ပတ်အတော်ကြာ အနားယူသွားရဖွယ်ရှိနေပြီး အခုအချိန်မှာ ဒဏ်ရာရသွားပြီဖြစ်လို့ ပြန်ကောင်းလာဖို့ အတွက် ကိုပဲ ကူညီပေးသွားရမယ်လို့လည်း နည်းပြအာတီတာက ဆက်လက်ပြောကြားခဲ့ပါတယ်။
ဆာကာဟာ အခုဘောလုံးရာသီမှာ အာဆင်နယ်အသင်းအတွက် ခြေစွမ်းပြကစားနေပြီး ပြိုင်ပွဲစုံ(၂၄)ပွဲမှာ (၉)ဂိုး သွင်းယူကာ (၁၃)ဂိုး ဖန်တီးပေးခဲ့ပါတယ်။ အာဆင်နယ်အသင်းဟာ အခုဘောလုံးရာသီ ပရီးမီးယားလိဂ်ပြိုင်ပွဲမှာ ချန်ပီယံ ပြေးလမ်းကြောင်းပေါ် ရှိနေတဲ့အသင်းဖြစ်လို့ ဆာကာ ဒဏ်ရာရသွားခဲ့တာက အသင်းအတွက် ဆုံးရှုံးမှု တစ်ခု ဖြစ်ခဲ့ရပါတယ်။
