ရုရှားသမ္မတပူတင်နဲ့အတူ ယူကရိန်းပဋိပက္ခကို ဖြေရှင်းလိုတယ်လို့ ဒေါ်နယ်ထရမ့်ပြော
ဒီဇင်ဘာ ၂၄
ရုရှားသမ္မတပူတင်နဲ့အတူ ယူကရိန်းပဋိပက္ခကို ဖြေရှင်းလိုတဲ့ ဆန္ဒတွေကို အမေရိကန်ရွေးကောက်ခံသမ္မတဒေါ်နယ်ထရမ့်က ထုတ်ဖော်ပြသခဲ့တယ်လို့ သိရပါတယ်။
မကြာခင်အချိန်အတွင်း တွေ့ဆုံဆွေးနွေးမှုတွေ လုပ်ဆောင်ဖို့ စိတ်ဝင်စားကြောင်းပြသခဲ့တဲ့ ပူတင်နဲ့ ဆွေးနွေးပွဲတွေလုပ်ဆောင်ဖို့ စောင့်ဆိုင်းနေတယ်လို့ ဒေါ်နယ်ထရမ့်က ပြောကြားခဲ့ပါတယ်။
ဒါ့ပြင် အမေရိကန်သမ္မတအဖြစ် ပြန်လည်တာဝန်ယူမယ့် ပထမဆုံးနေ့ကနေစတင်ပြီး ပြည်တွင်းပြဿနာတွေနဲ့ ကမ္ဘာလုံးဆိုင်ရာလုံခြုံရေးစိန်ခေါ်မှုတွေကို ဦးစားပေးလုပ်ဆောင်သွားမယ်လို့လည်း ဒေါ်နယ်ထရမ့်က ကတိပြုခဲ့ပါတယ်။
ဒေါ်နယ်ထရမ့်က "ကျွန်တော့်ကို တတ်နိုင်သမျှအမြန်ဆုံးတွေ့ချင်တယ်လို့ ပူတင်ကပြောကြားခဲ့ပါတယ်။ ဒီတွေ့ဆုံမှုတွေဖြစ်လာဖို့ ကျွန်တော်တို့စောင့်ဆိုင်းရမှာပါ။ ပြီးတော့ ရုရှား-ယူကရိန်းစစ်ပွဲကို အဆုံးသတ်မှရမှာပါ"လို့ ပြောဆိုခဲ့ပါတယ်။ဒါ့ပြင် ရုရှား-ယူကရိန်းစစ်ပွဲဟာ ကြောက်မက်ဖွယ်ကောင်းပြီး မကြုံစဖူးလူသားချင်းစာနာထောက်ထားမှုဆိုင်ရာ ဘေးဒုက္ခတစ်ခုအဖြစ် ဒေါ်နယ်ထရမ့်က ဖော်ပြပြောဆိုခဲ့ပါတယ်။
ပြီးတော့ ရုရှား-ယူကရိန်းစစ်ပွဲအတွင်း စစ်သားပေါင်းသန်းချီသေဆုံးခဲ့တယ်လို့လည်း ဒေါ်နယ်ထရမ့်က ပြောကြားခဲ့ပါတယ်။
၂၀၂၄ ခုနှစ် တစ်နှစ်အတွင်းတွင်ပင် ယူကရိန်းစစ်တပ်ဘက်မှ စစ်သားပေါင်း(၅)သိန်းနီးပါး ဆုံးရှုံးခဲ့ရတယ်လို့ ရုရှားအစိုးရက ခန့်မှန်းပြောဆိုခဲ့ပါတယ်။
ရုရှားကာကွယ်ရေးဝန်ကြီး အန်ဒရေးဘယ်လ်အုဆော့ဖ်ရဲ့အဆိုအရ ရုရှား-ယူကရိန်းစစ်ပွဲစတင်ဖြစ်ပွားခဲ့တဲ့ ၂၀၂၂ ခုနှစ် ဖေဖော်ဝါရီလနောက်ပိုင်းတည်းက ယူကရိန်းဟာ စစ်သားပေါင်းတစ်သန်းကျော် ဆုံးရှုံးခဲ့ရတယ်လို့ သိရပါတယ်။
ရုရှားဟာ စစ်ပွဲအတွင်း စစ်သားပေါင်း(၇၅၀၀၀၀)ကျော် ဆုံးရှုံးခဲ့ရတယ်လို့ ယူကရိန်းဘက်က ပြောဆိုထားပေမယ့်လည်း နှစ်ဖက်စလုံးက ထိခိုက်/သေဆုံးမှု အရေအတွက် အတိအကျကို သတင်းထုတ်ပြန်ခဲ့တာမျိုးလည်းမရှိခဲ့ဘူးလို့ သိရပါ တယ်။
#သတင်းဟင်းလေးအိုးကြီး
