Part_3
မောင်သာနိုးဘာသာပြန်တဲ့ ဘောင်းဘီဝတ်မိုးတိမ်
တစ်ခုသော သင်္ကြန်အခါ (သက္ကရာဇ် မမှတ်မိ။ မှတ်မိတာက မောင်သာနိုး မိန်းမ မရသေး) မောင်သာနိုးရယ်၊ တက္ကသိုလ် မောင်စောလွင်ရယ်၊ ကျွန်တော်တို့ သုံးယောက်သား စစ်ကိုင်းတောင် ဆရာတော် ရွှေကိုင်းသားရဲ့ အနုရုဒ္ဓါချောင်မှာ ညအိပ်၊ မနက် ပီပီလင်းတော့ ပရက္ကမချောင်ကအစ တောင်အနှံ့၊ ချောင်အနှံ့လည်ပြီး မန္တလေးဘက် ကူးခဲ့ကြတယ်။ ကိုစောလွင်အိမ်ရောက်တော့ ပဲပုပ်စေ့လှော်နဲ့ တို့ရှမ်းမ လက်ဖက်ခြောက်နှပ် အဖန်ရည်တစ်အိုးနဲ့ မန္တလေးနွေကို အန်တုဗလ ပြုကြရတယ်။ စားပွဲပေါ်မှာ မောင်သာနိုး လက်ဆောင်ပေးထားတဲ့ 'ဘောင်းဘီဝတ် မိုးတိမ်’ ကဗျာစာအုပ်ကလေး။
'ကဲ...ကိုသာနိုး၊ ကဗျာရွတ်ဗျာ'
မဆိုင်းမတွပါပဲ စာအုပ်ကိုင်ပြီး မောင်သာနိုးဟာ ‘ဘောင်းဘီဝတ် မိုးတိမ်’ကို ရွတ်ပါလေတော့တယ်။ ကိုစောလွင် . ဘယ်လိုခံစားမိသလဲတော့ မပြောတတ် ကျွန်တော်တော့ဖြင့် ကြက်သီး တဖြန်းဖြန်း။
ကဗျာသံစဉ် လှုပ်ရှားမှုနဲ့ မောင်သာနိုးရဲ့ အောင်မြင်ခံ့ညားတဲ့ အသံ၊ မာန် မောက်တဲ့ ဟန်ဟာ တစ်သားတည်း၊ တစ်ထပ်တည်း။
ဒီနေရာမှာ ကျွန်တော်ပြောချင်တာက မောင်သာနိုးရဲ့ “ဘောင်းဘီဝတ် မိုးတိမ်' ဘာသာပြန်ဟာ ရစ်သမ် ပါတယ်။ ကာရန် ပါတယ်။ အစပ်အဟပ်၊ အဖြတ်အရပ်၊ အတက်အဆင်း၊ အနိမ့်အမြင့်၊ အသံအတိုအရှည် သူ့နေရာနဲ့ သူ အထာကျကျ ဘာသာပြန်ထားတာမို့ ရွတ်ဆိုလို့ ရတယ်ဆိုတဲ့ အကြောင်းပါပဲ။
ဒီကဗျာရဲ့ မူရင်းခေါင်းစဉ်က “၁၃ ပါးမြောက် သာဝက” ဖြစ်တယ်။ နောက်တော့ ဘောင်းဘီဝတ် မိုးတိမ်’လို့ ပြင်ဆင်လိုက်ရတယ်။
အပိုင်း လေးပိုင်းကို ကြွေးကြော်သံလေးမျိုးနဲ့ ခွဲရေးထားတယ်။ အချုပ်ကတော့ ငွေ ငွေ ငွေ တစ်ငွေတည်း ငွေနေတဲ့ ဇာဘုရင်ခေတ် ဘူဇွာ လူ့အဖွဲ့အစည်း ကြီးထဲမှာ လူသားတန်ဖိုးကို ဂုဏ်ဓနပေတံနဲ့ ယှဉ်ထိုးကြည့်နေတဲ့အခါမျိုး။ မိန်းမပျို လေးတစ်ယောက်ရဲ့ ချစ်တုံ့ပြန်မှုကို မရလိုက်တဲ့ ကဗျာဆရာဟာ သူ့ခေတ်ရဲ့ အနုပညာ၊ သူ ့ခေတ်ရဲ့ အတွေးအခေါ်၊ သူ့ ခေတ်ရဲ့ အချစ်နဲ့ အိမ်ထောင်ရေး ဖွဲ့စည်းမှုတွေ အားလုံးကို စက်ဆုပ် ရွံရှာမုန်းတီးမှု အပြည့်၊ မီးလျှံ ဟုန်းဟုန်း တောက်နေတဲ့ နှလုံးသားနဲ့ တအားအော်ဟစ်လိုက်တာပဲ ဖြစ်တယ်။
‘ဘောင်းဘီဝတ် မိုးတိမ်’ဟာ မာယာကော့ဖ်စကီးနဲ့ မာရီယာတို့ရဲ့ အချစ် ဇာတ်လမ်းတစ်ပုဒ်လို ့ ပြောရင်လည်း ရပါတယ်။ ဒါပေမဲ့ စိတ်ကူးယဉ်တော့မဟုတ်ဘူး။
ဂျာမန်ကဗျာဆရာ ဂွည်ထည်ဟာ ရှေးခေတ်ကရှိခဲ့တဲ့ အလှဘုရင်မ ဟယ်လင် ရဲ့ ဝိညာဉ်ကို ပဉ္စလက်နဲ့ ခေါ်ယူပြီး သူ့ဇာတ်ကောင် ဖောစိတ်ကို ချစ်ရေးဆိုစေကာ နမ်းစေခဲ့တယ်။ မာယာကော့ဖ်စကီးရဲ့ အချစ်က ဒါမျိုးမဟုတ်ဘူး။
သွေးထဲသားထဲ သံစူးဝင်နေတဲ့အချစ်မျိုး။
#ဆက်ရန်ရှိ
