လာမည့်နှစ် ဖေဖော်ဝါရီလ၌ မန်းရွှေစက်တော်ဘုရား၏ ဗုဒ္ဓပူဇနိယပွဲတော်အား (၇၅)ရက်တိုင်ကျင်းပမည်
မကွေးတိုင်း၊ မင်းဘူး(စကု)မြို့နယ်ရှိ မန်းရွှေ စက်တော်ဘုရား၏ ဗုဒ္ဓပူဇနိယပွဲတော်အား လာမည့် ၂၀၂၅ ခုနှစ်၊ ဖေဖော်ဝါရီလ၌ (၇၅)ရက်တိုင်ကျင်းပသွားမည်ဖြစ်ကြောင်း သိရသည်။
ဗုဒ္ဓပူဇနိယပွဲတော်အား ၂၀၂၅ ခုနှစ် ဖေဖော်ဝါရီ ၂ ရက်မှစတင်ကာ ဧပြီ ၁၇ ရက်အထိ (၇၅)ရက်တိုင်ကျင်းပသွားမည်ဖြစ်၍ ပွဲတော်ကာလအ တွင်း တင်ဒါလုပ်ငန်းလုပ်ကိုင်ခွင့်များကို မန်းရွှေစက်တော်ဘုရားဂေါပကရုံး၌ သတ်မှတ်ပုံစံဖြင့် ဒီဇင်ဘာ ၂၀ ရက်မှ ၃၁ ရက်အတွင်းလျှောက်ထားနိုင်ကြောင်း သိရသည်။
အဆိုပါ လျှောက်ထားမှုများအနက် တည်းခိုဆောင်တင်ဒါလုပ်ငန်းဖွင့်ပွဲအား ၂၀၂၅ ခုနှစ်၊ ဇန်နဝါရီ ၂ ရက်နံနက် ၁၀ နာရီ၊ အထွေထွေအရပ်အရပ်လုပ်ငန်းများအား ၂၀၂၅ ခုနှစ်၊ ဇန်နဝါရီ ၆ ရက်နံနက် ၁၀ နာရီတို့၌ မင်းဘူးမြို့နယ်ထွေအုပ်ရုံးတွင် ကျင်းပသွားမည်ဖြစ်ကြောင်း သိရသည်။
မန်းရွှေစက်တော်ဘုရား၏ ဗုဒ္ဓပူဇနိယပွဲတော်၌ မင်းဘူးမြို့နယ်၊ မင်းလှကျင်းကျေးရွာမှ ရွာသူ၊ရွာသားများသည် ရှေးအစဥ်အလာဓလေ့အတိုင်း နွားလှည်းများဖြင့်လာရောက်ကာ မန်းချောင်းဘေးတွင်စခန်းချ၍ ပွဲတော်အားပါဝင်ဆင်နွှဲကြသည်မှာ ဂုဏ်ယူဖွယ်ဓလေ့ထုံးစံဖြစ်သည်။
