အူဆစ်က ဖျူရီကို ထပ်နိုင်၊ အငြင်းပွားဖွယ်မရှိ ကမ္ဘာ့ဟဲဗီးဝိတ်ချန်ပီယံ နေရာထိန်းသိမ်း
ယူကရိန်းဟဲဗီးဝိတ် လက်ဝှေ့ကျော် အိုလက်ဇန္ဒာ အူဆစ်ဟာ ဗြိတိသျှလက်ဝှေ့ကျော် တိုင်ဆန် ဖျူရီကို ထပ်မံအနိုင်ရပြီး WBC, WBA, IBF နဲ့ WBO ဟဲဗီးဝိတ် လက်ဝှေ့ချန်ပီယံခါးပတ် ၄ ခုလုံးကို ဆက်လက်ထိန်းသိမ်းထားနိုင်ခဲ့ပါတယ်။
ကမ္ဘာ့ဟဲဗီးဝိတ်တန်း ရွှေခါးပတ်အားလုံးကို ကိုင်စွဲထားနိုင်တဲ့အတွက် အငြင်းပွားဖွယ်မရှိ ကမ္ဘာ့ချန်ပီယံလို့ သတ်မှတ်ခံရတဲ့ အူဆစ်ကို ဖျူရီက ဒီဇင်ဘာ ၂၁ ရက်နေ့က ဆော်ဒီအာရေဗျမှာ မကျေပွဲ ထပ်နွှဲခဲ့တာ ဖြစ်ပါတယ်။
ပွဲဟာ အကြိတ်အနယ် ရှိခဲ့ပေမဲ့ ဒိုင်သုံးဦးလုံးက ၁၁၆-၁၁၂ နဲ့ အသက် ၃၇ နှစ်အရွယ် အူဆစ်ကိုပဲ အနိုင်ပေးခဲ့ကြပါတယ်။
ပြိုင်ဘက်ထက် အရပ်၊ ကိုယ်အလေးချိန်နဲ့ လက်တံတွေ နိမ့်ကျနေပေမဲ့ ပိုပြီး လှုပ်ရှားမှုပိုင်း အားသာတဲ့ အူဆစ်က အရင်ပွဲကထက်ကို ပိုအားထုတ်နိုင်ခဲ့ပါတယ်။
အထူးသဖြင့် ၆ ချီ ပြီးခါနီးမှာ အူဆစ်ရဲ့ ညာလက်သီးက ဝမ်းဗိုက်ကိုထိုးပြီး ဘယ်လက်သီးက နဖူးကို ထိုးတဲ့ ချက်ပေါင်းစပ်မှုက ဖျူရီကို ယိမ်းယိုင်သွားစေခဲ့ပေမဲ့ အချိန်စေ့သွားလို့ တချီ ရပ်သွားခဲ့ပါတယ်။
ဒိုင်တွေရဲ့ဆုံးဖြတ်ချက်က မျှတတယ်လို့ ထင်လားလို့ မေးတဲ့အခါ အူဆစ်က ပခုံးတွန့်ပြပြီး သူပြောစရာ မရှိဘူးလို့ ညွှန်ပြခဲ့ပါတယ်။
စကားများတတ်တဲ့ ဖျူရီကတော့ ရှုံးနိမ့်မှုကို စိတ်ပျက်ဟန်တူပြီး ဘာမှမပြောဘဲ ပွဲကွင်းကနေ ထွက်သွားခဲ့ပါတယ်။
ဆော်ဒီအာရေဗျမှာ ကျင်းပတဲ့ စနေနေ့ပွဲဟာ သူတို့နှစ်ဦးရဲ့ ဒုတိယမြောက်ပွဲဖြစ်ပြီး မေလက အဲဒီကွင်းမှာပဲ အူဆစ်က အမှတ်နဲ့ အနိုင်ရခဲ့ပါတယ်။
အူဆစ်ဟာ ၁၉၉၉ ခုနှစ်မှာ လင်းနော့ လူးဝစ် လအနည်းငယ်သာ ကိုင်ဆောင်ခဲ့တဲ့ ဟဲဗီးဝိတ်ရွှေခါးပတ်တွေအားလုံးကို အားလုံးကို တပြိုင်နက်တည်း ကိုင်ဆောင်ထားနိုင်တဲ့ ပထမဆုံး လက်ဝှေ့သမား ဖြစ်ပါတယ်။
"The Cat" လို့ ထင်ရှားတဲ့ အူဆစ်ဟာ မိုဟာမက် အလီ၊ ဂျိုး ဖရေဇာ၊ ဂျော့ ဖိုမင်နဲ့ မိုက် တိုင်ဆန်တို့လို သမိုင်းဝင် ဟဲဗီးဝိတ်ကြယ်ပွင့်တွေနဲ့ တန်းတူ အဆင့်အတန်းမှာ ရှိနေပါပြီ။
ယူကရိန်း သမ္မတ ဗိုလိုဒီမီယာ ဇယ်လန်စကီးကလည်း အူဆစ်ရဲ့ အောင်ပွဲအတွက် ဂုဏ်ပြုခဲ့ပါတယ်။
DVB
Source: Reuters
