ဘာစီလိုနာအသင်းဟာ ၂၀၂၆ နွေရာသီမှာ စာချုပ်သက်တမ်းကုန်ဆုံးမယ့် ကွင်းလယ်လူ ဖရန်ကီဒီယွန်းနဲ့ နောက်ခံလူ အာရူဟိုတို့ကို ရာဇသံထုတ်ပြန်ခဲ့ပါတယ်။
ဘာစီလိုနာအသင်းဟာ အဓိက ကစားသမားတွေကို စာချုပ်သက်တမ်းတိုးကာ ဆက်ထိန်းဖို့ လုပ်ဆောင်နေပြီး လူငယ်ကြယ်ပွင့်တွေဖြစ်တဲ့ ဂါဗီ၊ပက်ဒရီတို့နဲ့ အပေါင်းလက္ခဏာဆောင်တဲ့ ဆွေးနွေးမှုပြုလုပ်ပြီးနောက် စာချုပ်သက်တမ်းတိုးဖို့နီးစပ်နေပြီဖြစ်တာပါ။
>>>>>
ဘာစီလိုနာအသင်းဟာ ဂါဗီနဲ့ ပက်ဒရီတို့ကို စာချုပ်သက်တမ်းတိုးဖို့ နီးစပ်နေပေမယ့် လာမယ့်ရာသီအကုန်မှာ စာချုပ်ကုန်ဆုံးမယ့် ဖရန်ကီဒီယွန်းနဲ့ အာရူဟိုတို့ရဲ့စာချုပ်အခြေအနေနဲ့ ပတ်သက်ပြီး ရှုပ်ထွေးမှုတွေဖြစ်နေပါတယ်။ အဲ့ဒါကြောင့် ဘာစီလိုနာအသင်းဟာ သူတို့နှစ်ဦးစလုံးကို "စာချုပ်သက်တမ်းတိုးမလား ဒါမှမဟုတ် ထွက်ခွာမလား"ဆိုပြီး ရာဇသံထုတ်ပြန်ကာ ၂၀၂၅ ခုနှစ် ဇွန်မှာ စာချုပ်သစ်ချုပ်ဆိုဖို့ ပြောထားတယ်လို့ Relevo က ဖော်ပြထားတာပါ။
ဥရုဂွေးနောက်ခံလူ အာရူဟိုဟာ ဘာစီလိုနာအသင်းနဲ့ မကြာခင်မှာ စာချုပ်သစ်လက်မှတ်ထိုးဖို့ရှိနေပြီး ဘာစီလိုနာအသင်းဟာ သူ့ကို အရေးပါတဲ့သူအဖြစ်သတ်မှတ်ထားကာ ပွဲထွက်ခွင့်နေရာအတွက် ယှဉ်ပြိုင်နိုင်ဖို့ မျှော်လင့်ထားတာဖြစ်ပါတယ်။ အာရူဟိုဟာ ဒဏ်ရာကြောင့် တစ်ရာသီလုံးအနားယူနေရပေမယ့် သူဟာ ဘာစီလိုနာအသင်းမှာ ဆက်ရှိဖို့ စိတ်အားထက်သန်နေပြီး နည်းပြဟန်ဆီဖလစ်ကလည်း သူ့ကို နှစ်သက်မှုရှိတာပါ။
၂၀၁၉ က အိုင်းယက်စ်အသင်းကနေ ပေါင်(၇၂)သန်းနဲ့ ရောက်ရှိလာခဲ့တဲ့ ဖရန်ကီဒီယွန်းရဲ့အခြေအနေကတော့ အာရူဟိုနဲ့ ကွဲပြားမှုရှိနိုင်ပါတယ်။ ဒဏ်ရာတွေနဲ့ ရုန်းကန်နေရတဲ့ ဖရန်ကီဒီယွန်းဟာ အခုနှစ်အစောပိုင်းက စာချုပ်သက်တမ်းတိုးဖို့ကို ငြင်းဆန်ခဲ့တာကြောင့် ဘာစီလိုနာအသင်းနဲ့နောက်ထပ်ဆွေးနွေးညှိနှိုင်းမှုတွေပြန်လည်ပြုလုပ်ရဖို့ ရှိနေပါတယ်။ ဘာစီလိုနာအသင်းဟာ အာရူဟိုကို စာချုပ်သစ်အတွက် လစာတိုးပေးဖို့ရှိနေပေမယ့် ဖရန်ကီဒီယွန်းကိုတော့ ပိုကြီးမားတဲ့လစာတိုးပေးဖို့မရှိဘဲ စာချုပ်သစ်အတွက် သဘောတူညီမှုရရှိနိုင်ဖို့ အကောင်းမြင်နေတာပါ။
ရာသီအစပိုင်းမှာ ရလဒ်ကောင်းတွေရရှိနေတဲ့ ဘာစီလိုနာအသင်းဟာ ဒီနောက်ပိုင်း လာလီဂါပွဲစဉ်တွေမှာ ရလဒ်တွေပြန်ဆိုးနေပြီး အမှတ်ပေးဇယားအဆင့်(၂)နေရာက အက်သလက်တီကိုမက်ဒရစ်အသင်းထက် (၁)ပွဲပိုကစားထားပေမယ့် ရမှတ်တူညီနေပါတယ်။ ဘာစီလိုနာအသင်းဟာ ဒီတစ်ပတ်လာလီဂါပွဲစဉ်အဖြစ် အက်သလက်တီကိုမက်ဒရစ်အသင်းနဲ့ ယှဉ်ပြိုင်ရမှာဖြစ်ပါတယ်။
