ခြံအမှတ် (၅၄) ကို ကျပ် ၂၉၇ ဘီလီယံနဲ့ ထပ်မံလေလံတင် ရောင်းချဖို့ တရားရုံး အမိန့်ချ
ဒီဇင်ဘာ ၁၉
ရန်ကုန်တိုင်း၊ ဗဟန်းမြို့နယ်၊ တက္ကသိုလ်ရိပ်သာလမ်းက ခြံအမှတ် (၅၄) နဲ့ နေအိမ်ကို ကျပ် ၂၉၇ ဘီလီယံနဲ့ ထပ်မံလေလံတင် ရောင်းချဖို့ ကမာရွတ်ခရိုင်တရားရုံးက ဒီကနေ့ ဒီဇင်ဘာ ၁၈ ရက်နေ့မှာ အမိန့် ချမှတ်လိုက်တယ်လို့ အဲဒီတရားရုံးနဲ့ နီးစပ်တဲ့ အသိုင်းအဝိုင်းက သိရပါတယ်။
အဲဒီအိမ်နဲ့ ခြံကို ကျပ်ငွေ ၃၁၅ ဘီလီယံနဲ့ တကြိမ်၊ ၃၀၀ ဘီလီယံနဲ့ တကြိမ် လေလံတင်ရောင်းချခဲ့ပေမယ့် လေလံဆွဲ ဝယ်ယူသူ မရှိတာကြောင့် ၂၉၀ ဘီလီယံနဲ့ ဈေးလျှော့ပြီး လေလံတင်ဖို့ တရားနိုင်ဖြစ်တဲ့ ဦးအောင်ဆန်းဦးက ပြီးခဲ့တဲ့ အောက်တိုဘာလ ၂၂ ရက်နေ့က တရားရုံးကို တင်ပြထားခဲ့တာ ဖြစ်ပါတယ်။
အခုလို ဈေးလျှော့ပြီး လေလံတင်ရောင်းချဖို့ ဦးအောင်ဆန်းဦးဘက်က တင်ပြထားချက်ကို ဒေါ်အောင်ဆန်းစုကြည်ရဲ့ ရှေ့နေအဖွဲ့က ကန့်ကွက်ထားပါတယ်။
“တရားရုံးရဲ့ ဒီနေ့ ဆုံးဖြတ်ချက်မှာတော့ ဦးအောင်ဆန်းဦးတင်ထားတဲ့ လေလံဈေးကို တရားရုံးက လက်မခံဘဲ ၃ ဘီလီယံပဲ ထပ်လျှော့ပေးလိုက်တာပါ။ အခု အတည်ပြုလိုက်တဲ့ ကြမ်းခင်းဈေးက ကျပ် ၂၉၇ ဘီလီယံပေါ့။ တတိယအကြိမ် လေလံတင်ရောင်းချပွဲကို လေလံပွဲကို လာမယ့် ၂၀၂၅ ခုနှစ်၊ ဖေဖော်ဝါရီလ ၅ ရက်နေ့မှာ ခြံအမှတ် (၅၄) ရှေ့မှာ ပြုလုပ်သွားမှာပါ” လို့ တရားရုံးနဲ့ နီးစပ်သူတယောက်က ပြောပါတယ်။
ခြံအမှတ် (၅၄) နဲ့ နေအိမ်ကို ကျပ် ၃၁၅ ဘီလီယံနဲ့ ပြီးခဲ့တဲ့ မတ်လ ၂၀ ရက်က ပထမအကြိမ် လေလံတင် ရောင်းချခဲ့သလို သြဂုတ်လ ၁၅ ရက်နေ့မှာလည်း ငွေကျပ် ၃၀၀ ဘီလီယံနဲ့ ထပ်မံ ရောင်းချခဲ့ပေမယ့် ဝယ်ယူမယ့်သူ မရှိသေးပါဘူး။
ဦးအောင်ဆန်းဦးဟာ ခြံအမှတ် (၅၄) ပရဝုဏ်အတွင်းက ရှိသမျှကို လေလံတင်ရောင်းချပြီး ရလာတဲ့ငွေကို မောင်နှမ နှစ်ယောက် ခွဲဝေမယ်ဆိုပြီး ၂၀၀၀ ပြည့်နှစ်မှာ ဒီအမှုကို စတင်ခဲ့တာဖြစ်ကာ ၂၀၁၆ ခုနှစ်မှာတော့ အိမ်နဲ့ခြံကို မောင်နှမ နှစ်ယောက် ခွဲဝေပိုင်ဆိုင်ဖို့ ရန်ကုန်အနောက်ပိုင်း ခရိုင်တရားရုံးက အမိန့်ချခဲ့ပါတယ်။
ဒီအမိန့်ကို မကျေနပ်တဲ့အတွက် NLD အစိုးရလက်ထက်မှာ ဦးအောင်ဆန်းဦးက ပြည်တော်စု တရားလွှတ်တော်ချုပ်အထိ အဆင့်ဆင့် အယူခံတက်ခဲ့ပေမယ့် ပယ်ချခံခဲ့ရတယ်လို့ သိရပါတယ်။
၂၀၂၁ ခုနှစ်၊ ဒေါ်အောင်ဆန်းစုကြည် ဖမ်းဆီးခံရပြီးနောက်ပိုင်း ဦးအောင်ဆန်းဦးဘက်က အထူးအယူခံ ဆက်တက်ခဲ့စဉ်မှာတော့ ပြည်ထောင်စု တရားလွှတ်တော်ချုပ်က ဦးအောင်ဆန်းဦးကို အနိုင်ပေးခဲ့ပြီး အဲဒီနောက် ရန်ကုန်တိုင်း ကမာရွတ်ခရိုင်တရားရုံးက လေလံတင် ရောင်းချဖို့ ဆုံးဖြတ်ခဲ့တာဖြစ်တယ်လို့ သိရပါတယ်။
အဲဒီနေရာရဲ့ အကျယ်အဝန်းဟာ ဧရိယာစတုရန်း ၁ ဒသမ ၉၂၃ ဧက ရှိပြီး ဒေါ်ခင်ကြည် အမည်ပေါက် ပိုင်ဆိုင်တာဖြစ်တယ်လို့ သိရပါတယ်။
Photo:CJ
Credit - VOM News Agency
#သတင်းဟင်းလေးအိုးကြီး
