ပဲခူးတိုင်းက မတ်ပဲစိုက်တောင်သူတွေ စိုက်စရိတ်မြင့်တက်တဲ့အထဲ ပဲခင်းပိုးကျလို့ အထွက်လျော့နိုင်
ဒီဇင်ဘာ ၁၈
ယခုနှစ်ဆောင်း မတ်ပဲစိုက်ပျိုးရာသီမှာ စိုက်ပျိုးရေးဆေးစျေးနူန်းတွေ မြင့်တက်လာတဲ့အပြင် လယ်ထွန်ယက်ခ အပါအဝင်အထွေအထွေကုန်ကျစရိတ်တွေမြင့်တက်လာတာကြောင့် စိုက်ပျိုးစရိတ်မြင့်လာလို့ တောင်သူတွေမှာဒုက္ခရောက်နေကြရတယ် လို့သိရပါတယ်။
မတ်ပဲစိုက်ပျိုးမှုကုန်ကျစရိတ်မြင့်တက်နေတဲ့အပြင် ပဲခူးတိုင်းထဲကမတ်ပဲ စိုက်ခင်းတွေမှာ အပင်ဖျက်ပိုး၊အဝါရောင်မှိုရောဂါ၊ယင်ဖြူစတဲ့ပိုးမွှားတွေကျရောက်နေတာကြောင့် ပဲအထွက်နူန်းလျော့မှာကိုလည်းတောင်သူတွေစိုးရိမ်နေကြပါတယ်။
" ခုနှစ်လုပ်ရတာတခုမှအဆင်မပြေဘူး။စပါးရိတ်ထိမိုးက မပြတ်တော့ မတ်ပဲစိုက်ချိန်မှာ မစိုက်ရဘူး။ဒီဇင်ဘာလရောက်မှမတ်ပဲတွေစိုက်ရတယ်။စိုက်တာနောက်ကျတော့ အခင်းတိုင်းမှာ ရောဂါပိုးတွေကျနေတယ်။ငါးမြှောင်တောင်တွေခုနှစ်အကျများနေတယ်။အပင်တွေလည်းဝါတယ်။ပိုးသတ်ဆေးစျေးတွေကလည်း တနှစ်တခါကိုတက်နေတော့ခက်တယ်။ခုနှစ်အရင်းအနှီးကြီးပြီး ပဲကလည်း အထွက်လျော့မယ့်အခြေအနေရှိနေတော့ တောင်သူတွေမှာလုပ်သာလုပ်နေရတာ စားမှစားရပါ့ မလားမပြောတတ်ဘူး။" လို့ ပဲခူးတိုင်းမှ မတ်ပဲစိုက်တောင်သူက ပြောပါတယ်။
မတ်ပဲစိုက်ခင်းအတွက် မဖြစ်မနေသုံးရတဲ့ ပိုးသတ်ဆေး၊မှိုဆေးနဲ့ အပင်အားဆေး၊အသီးအပွင့်အားဆေး စျေးနူန်းတွေက ခုနှစ်မှာ အမျိုးအစားအလိုက် ၂၀၀၀၀ ကျပ်လောက်စီမြင့်တက်လာတာဖြစ်လို့ တဧကအတွက်စိုက်ပျိုးရေးဆေးကုန်ကျမှုမှာ ၂ သိန်းကျပ်အနည်းဆုံးရှိနေ တယ်လို့ သိရပါတယ်။
လယ်ယာထွန်ယက်ခကလည်း ခုနှစ်မှာစက်ငှားရမ်းခမြင့်တက်လာခြင်း၊ပဲမျိုးစျေးမြင့်ခြင်း၊မိုးမိခြင်းကြောင့် ပဲနှစ်ကြိမ်ကျဲရခြင်း၊ရေသွင်ရခြင်း၊အလုပ်သမားငှားရမ်းခမြင့်တက်ခြင်းကြောင့် မတ်ပဲစိုက်ပျိုးချိန်ကနေ ရိတ်သိမ်းခြွေလှေ့ပြီးအထိဆိုရင် တဧကကိုအနည်း ၈ သိန်းမှ ၉ သိန်းကြား လောက်အထိရှိနိုင်လို့သိရပါတယ်။
" ခုနှစ်စရိတ်အရမ်းကြီးတယ်။ကျွန်တော်တို့ခုနှစ်ကစွန့်စားလုပ်ရတဲ့သဘောရှိတယ်။ကျွန်တော်ဆိုခုနှစ် မိုးမိလို့ပဲနှစ်ခါကြီးရတယ်။အဲဒီမှာတင်ပဲအရင်းတင်နှစ်ဆကုန်နေပြီ။ပဲကဘယ်လောက်ထွက်မလဲမပြောတတ်သေးဘူး။တဧက၁၀တင်းလောက်ဆိုအရင်းသာသာပဲရမယ်။ပဲစျေးကောင်းဖို့လိုမယ်။အထွက်နူန်းကတော့ခုနှစ်လျော့ကြမှာပါ။" လို့ မတ်ပဲစိုက်တောင်သူ ကိုဝင်းနိုင်က ပြောပါတယ်။
ဆောင်းမတ်ပဲကို နှစ်စဥ် အောက်တိုဘာကနေစတင်စိုက်ပျိုးကြပြီး နိုဝင်ဘာမှာနောက်ဆုံးစိုက်ပျိုးကြ တာဖြစ်ပေမယ့်ခုနှစ်မှာတော့ မိုးမပြတ်တာကြောင့် ဒီဇင်ဘာလအထိမတ်ပဲတွေစိုက်ကြရတာဖြစ်ပါတယ်။
မတ်ပဲသီးနှံဟာ နိုဝင်ဘာလ ၁၅ ရက်အတွင်းစိုက်ပျိုးနိုင်မှသာ သီးနှံထွက်နူန်းကောင်းတာဖြစ်လို့ ခုနှစ်မှာစိုက်ပျိုးချိန်နောက်ကျခြင်း၊ ရာသီဥတုဖောက်ပြန်မှုကြောင့်ရောဂါပိုးတွေကျရောက်မှုကြောင့် မတ်ပဲအထွက်နူန်း လျော့ကျနိုင်တာဖြစ်တယ်လို့သိရပါတယ်။
Photo:CJ
Credit - VOM News Agency
#သတင်းဟင်းလေးအိုးကြီး
