❝ဆက်လက်ရပ်တည်ရန် အခက်အခဲများကြောင့် ပိတ်သိမ်းတော့မည်ဟု အင်းလေးအမွေအနှစ်ဖောင်ဒေးရှင်းကြေညာ❞

ဒီဇင်ဘာ ၁၈

အင်းလေးအမွေအနှစ် ဖောင်ဒေးရှင်းကို လက်ရှိနိုင်ငံ၏ အကြပ်အတည်း၊ ကိုဗစ်နောက်ပိုင်းအဆင်မပြေမှုများစွာကြောင့် ဆက်လက်ရပ်တည်ရန် အခက်အခဲများဖြစ်ျပါ်လာခဲ့သဖြင့် ယခုနှစ်ကုန်ပိုင်းဖြစ်သော ၂၀၂၄ ခုနှစ် ဒီဇင်ဘာလ ၃၁ ရက်နေ့ကစတင်ကာ ပိတ်သိမ်းတော့မည်ဖြစ်ကြောင်း အဆိုပါ ဖောင်ဒေးရှင်းက အသိပေးထားသည်။

အဆိုပါ အင်းလေးအမွေအနှစ် ဖောင်ဒေးရှင်းသည် (၁၅)နှစ်ကြာ ရပ်တည်ခဲ့သည့် ဖောင်ဒေးရှင်းတစ်ခုဖြစ်ပြီး မြန်မာနိုင်ငံ၌ မတွေ့ရတော့သည့် မြန်မာ့မျိုးရင်း ဗမာကြောင်ကို မြန်မာနိုင်ငံတွင် အများလေ့လာသိရှိစေရန်ရည်ရွယ်ကာ ပြန်လည်ခေါ်ဆောင်လာခြင်းမှ စတင်ခဲ့ခြင်းလည်းဖြစ်သည်။

ထို့ပြင် အမွေအနှစ် ထိန်းသိမ်းစောင့်ရှောက်ခြင်း လုပ်ငန်းများ၊ အမှတ်တရပစ္စည်း အရောင်းဆိုင်များနှင့် အင်းလေးဒေသလူနေမှုပုံစံများ သိရှိစေရန် ခြေတံရှည်အိမ်များကို တိုးချဲ့ဆောက်လုပ်ခဲ့သည့်အပြင် အင်းလေးအမွေအနှစ် ဖောင်ဒေးရှင်းမှ ဟိုတယ်သက်မွေးမှု သင်တန်းကျောင်း ထပ်မံဖွင့်လှစ်ခဲ့ပြီး ဒေသခံ လူငယ် (၃၆၆)ဦးအထိ သင်ကြားပေးနိုင်ခဲ့သည်ဟုဆိုသည်။

အင်းလေးအမွေအနှစ်ဖောင်ဒေးရှင်းကို ကိုယ်ပိုင် ရင်းနှီးငွေများနှင့် စတင်ခဲ့ပြီး အကျိုးအမြတ်ထက် လူငယ်များဖွံ့ဖြိုးတိုးတက်ရေး၊ ရပ်ရွာ အဝန်းအဝိုင်းပိုမို တိုးတက်လာစေရေး၊ သဘာဝပတ်ဝန်းကျင် နှင့် လူမျိုးစုနှင့် ဒေသတွင်း ထုံးတမ်း အစဉ်အလာများကို မပျောက်ပျက်အောင်ထိန်းသိမ်းရေး စသည့် လုပ်ငန်းများ လုပ်ကိုင်နိင်ရန်အတွက် အခြားလုပ်ငန်းများမှ ရရှိလာသော အကျိုးအမြတ်များကို ပြန်လည်ရင်းနှီးမြှုပ်နှံခြင်းဖြင့် စတင်ခဲ့သော လုပ်ငန်းဖြစ်သည်ဟုလည်း သိရသည်။

#သတင်းဟင်းလေးအိုးကြီး